除咗鬼屋，萬聖節另一個重點當然喺食恐怖嘅哈囉喂大餐同買道具扮鬼扮馬啦！今次就介紹下海洋公園哈囉喂有咩必食必買，等大家玩鬼屋可以回下氣。
多啦 A 夢全日祭套餐
唔好以為哈囉喂餐單一定好恐怖，海洋公園為咗呢個全日祭特別整咗一系列多啦 A 夢主題美食俾大人同小朋友一齊食，叫套餐仲會送多啦 A 夢紀念品一份添架！由 9月18號開始，每逢搞哈囉喂個幾日海龍王餐廳同冰極餐廳都有得食。多啦 A 夢全日祭套餐 $388 有齊前菜、餐湯、主菜同甜品，款款都有多啦 A 夢、大雄或者小夫嘅嘜頭，打卡岩晒。小朋友細食 D 就可以揀兒童餐有粟米煙雞胸沙律釀酥盒、鮮茄牛肉丸意粉、曲奇餅、迷你雪糕杯同果汁 $208，同樣有多啦 A 夢紀念品送架！另外水都餅店仲有多啦 A 夢杯子蛋糕、布甸、芝士餅等，超可愛！
▲ 前菜有煙三文魚龍蝦沙律、煙肉野菌蛋批、迷你水牛芝士紫蘇番茄串，雖然多啦 A 夢生咗對疆屍牙，但一 D 都唔恐怖囉！
▲ 菠菜帶子周打湯上面有塊蝙蝠黃椒，好 colorful。
▲ 燴牛仔膝伴薯蓉雜菜份量十足，拎住大啖大啖咁咬其實都幾嚇人。
▲ 想食得斯文 D 可以揀南瓜海鮮千層麵，隨意門曲奇好得意呢！
▲ 呢個嘅重點必定喺軟心朱古力餅伴雪糕，唔單止小夫嘅頭髮食得，連塊面都得架！
▲套餐只喺跟普通咖啡或茶，如果想飲有多啦 A 夢嘅焦糖咖啡就要另外用 $48 買啦。
「盂蘭盛宴」套餐
睇完可愛嘅哈囉喂大餐，喺時候睇番 D 恐怖套餐。海洋冰室入面嘅 「盂蘭盛宴」套餐 ($298) 每道菜都升淋淋，有眼、有殘肢，仲有刻咗自己名嘅墓碑，咪話唔得人驚！另外，小朋友都可以揀「可愛嘩鬼」兒童餐 ($198)，都有蝙蝠粟米煙雞胸沙律 同 紅淋淋嘅鮮茄牛肉丸意粉，一樣咁驚嚇。
▲ 用鮮蝦同煙雞胸所做嘅吸睛腦沙律，一粒粒眼珠望住你，問你夠唔夠膽食。
▲ 用香芧同蕃茄做嘅血滴指濃湯，成碗腦漿咁，都唔知點飲。
▲ 孝子賢孫祭祖飯其實喺瑤柱醬海鮮炒飯，最特別喺可以最少 5個工作天前預訂印有自己中文名嘅墓碑。
▲ 桂花啫喱入面有一隻隻用白朱古力做成嘅截肢，非常恐怖。
哈囉喂獨家精品
食肚肚當然要買下嘢扮鬼扮熙啦！今次海洋公園同 The Walking Dead 合作，除咗有主題鬼屋之外，仲推出一系列《陰屍路》主題服飾同精品，等你著住體驗逃亡之旅。另外，仲有好多哈囉喂發光飾物、印花 T-恤同攤位遊戲公仔，包你買得開心。
▲《陰屍路》主題服務同精品有背心、長袖衫 ($230-330)、行李牌 ($110)、頸牌 ($100)、Daryl Wings 斜肩袋 ($650) 同 索繩袋 ($100) 等，件件都充滿屍味。
▲ 小朋友都有色彩繽紛嘅南瓜 T-恤可以揀。
▲ 攤位遊戲公仔都換上新造型，等你帶佢番屋企。
▲ 你又睇岩邊隻呢？
Leave a Comment