以前冇電視睇就好似世界末日咁，而作為一個不折不扣的港女，上網冇戲睇，冇劇煲，冇綜藝節目追先至係世界末日。最近睇左兩篇新聞，一篇專訪網上神秘的「字幕組」，另一篇就係講 CCTBB 唔再幫珠珠台啲電影同劇集配音，睇完真係心都噏埋?
先講 CUT 配音呢單野，先唔講配音組啲人唔同晒，我早排都覺得怪怪架喇，之前珠珠台預告播 Gotham（葛咸城），我同阿媽都好期待，蝙蝠俠前傳喎，正呀。滿心歡喜到佢播個陣，我坐定定係度，捕住係電視前面，諗住同阿媽一齊追，點知冇得較廣東話，以為個 remote 壞左，但係㩒左幾次都冇！咁逼於無奈就要聽英文睇字幕啦，但你知，呢套劇其實都多對白，一跟唔切，就 lost 左成個故仔，唔知佢做乜。一集都睇唔晒，阿媽就話，唔睇喇，聽收音機啦，就係咁，電視都冇得開。
到早幾日我先知，原來 CCTBB CUT 配音，而家淨係配紀錄片、生活資訊和旅遊節目，大佬呀，佢地係咪傻左，旅遊節目個啲都只係介紹下地方，陳述事實，講下意見，唔配音睇字幕，真係問題不大。但係劇同電影好多時要靠對白講故仔，又有文化差異，字幕你又解釋唔到咁多，放工想熄左個英文翻譯 mode 唞下都唔得，擺到明趕客啫。電視慣性收視來自於師奶s （唔知明珠台係唔係），啲阿豬媽一把年紀，又有老花，點同你追字幕呀（啲字幕仲要成日打錯字！），呢個惡性循環黎架喎！
逼於無奈都係要上返網睇算，好在呢個世界有樣野叫「字幕組」，港女睇啲韓劇韓綜都係靠佢，但我真係唔知原來佢地個運作模式咁有系統同規模：佢地啲業餘翻譯員散播係世界各地，首先有人打晒啲 transcript 出黎，然後斬件開 job 俾人 bid，搶到就開始譯，譯完有人做校對同後期製作， 有啲仲會自費租用網站或 Cloud Drive，成個生產過程全部網上進行，非常先進。我真係非常欣賞佢地嘅功勞，佢地除左譯對白，有時有專用名詞（如醫生劇、律師劇）或古裝戲，仲會附加資料，幫助你理解。上網睇的最大好處係快同埋可以 Pause，睇睇下行開又得，睇返轉頭又得，得左！
香港的電視節目質素每況愈下就人人皆知，年輕一輩一係睇黎食花生，一係就好似我咁索性唔睇，轉為上網，或寧願入戲院。想當年我由睇港劇到日劇到台劇到而家韓劇（有時睇少少美/英劇/HKTV劇），我嘅人生本來就係咁國際化，睇黎遲啲要睇埋聖多美普林西比劇架喇。
作者妍嫣每天都懷著山區兒童的心情上班的偽 OL，決意要見證 IT 業在香港發光發亮。
