Moto G 號稱 Motorala 最成功嘅手機型號，主打平價市場嘅 Moto G 終於出到第三代。雖然係平價，但機身有勁多種顏色任君選擇，相機有著 1,300 萬像素可以拍全高清影片嘅主鏡頭，同 500萬像素前鏡，機身仲要係防水架添！四個字，抵到爛！想知有幾抵，繼續睇落去！
今日籮文化身為開箱文，為大家揭下依部第三代 Moto G 嘅神秘面㠺。一開箱嗰陣呀，應聲彈出嘅係兩腳叉電器連 USB 線同線控耳機一條。原來香港暫時未有行貨，所以依部係我哋於 Expansys 買嘅水貨黎嘅，內附嘅叉電器係兩腳嘅，不過相信大家屋企都大把叉電器，依個唔係大問題。個附送嘅耳機唔係入耳式，而係近年少見嘅平耳式耳機呀，好 Cheap 懷舊嘅感覺呀！
▲今日籮文化身為開箱文，為大家揭下依部第三代 Moto G 嘅神秘面㠺
▲一開箱嗰陣呀，應聲彈出嘅係兩腳叉電器連 USB 線同線控耳機一條
▲依部係我哋於 Expansys 買嘅水貨黎嘅，內附嘅叉電器係兩腳嘅。個附送嘅耳機唔係入耳式，而係近年少見嘅平耳式耳機呀
一拎起手，喺依個大 Mon 機橫行嘅時代，Moto G 回到最基本，機身大小恰到好處，一隻手就好舒服到揸得晒，係我最喜愛的「吸手」機。機背用咗類似橡膠嘅物料製成，摸落手感較柔軟，亦唔怕會?花，有斜條紋，不怕跣手。相機所處嘅位置係一塊金屬片，Motarola 標誌位置同 Moto X 一樣有個小酒窩，成為近代 Motorola 機最象徵性嘅位置，相比起上一代 Moto G 平平無奇嘅機背，今代更為有特色。
▲機身大小恰到好處，一隻手就好舒服到揸得晒，係我最喜愛的「吸手」機
▲機背用咗類似橡膠嘅物料製成，摸落手感較柔軟，亦唔怕會?花，有斜條紋，不怕跣手。相機所處嘅位置係一塊金屬片，Motarola 標誌位置同 Moto X 一樣有個小酒窩，成為近代 Motorola 機最象徵性嘅位置
▲開關及音量制於右側
▲USB位於機底
▲輕巧！
細心睇，背蓋係可以拆開，不過 2,470 mAh 電池係內置，唔可以換電嘅，拆開背蓋只係用黎讓用家插入 Sim Card 及 SD Card，無錯，黎到第三代終於可以插 SD Card，雖然只支援到 32 GB，不過相信足夠大部份用家使用。除咗插卡，可拆式背蓋最大用途就係用黎換顏色！喺 Moto Maker 網頁，買家可以揀選想要嘅顏色，但可惜依項服務未支援香港區啦，所以籮文今次就唯有試住依部最唔 Colorful 嘅黑色先啦。籮文就諗，身為一部防水手機，背蓋竟然係可以拆開，其實好冇安全感，裝返個蓋嘅時候記得㩒晒四邊，仲有金屬位置四周都要㩒下先好濕水呀。
▲喺 Moto Maker 網頁，買家可以揀選想要嘅顏色，但可惜依項服務未支援香港區啦
▲背蓋係可以拆開，不過 2,470 mAh 電池係內置，唔可以換電嘅，拆開背蓋只係用黎讓用家插入 Sim Card 及 SD Card
如果你問我點解 Moto G 可以賣得咁平，我諗個 Mon 係一大因素，當云云手機之中有 FULL HD 芒，2K 芒，甚至 4K 芒都黎緊，Moto G 一反常態，繼續沿用上一代嘅 720p 屏幕，只能講一句，一分錢一分貨。雖然只係得 720p ，但望落唔會覺得太差，始終 5吋芒黎講，720p 都有 294ppi 嘅像素密度，就算睇文字都唔會明顯起格。
色準方面，測溫錶測出 6800K 比白色輕微偏藍了一點，但絕對是可接受範圍。可是最大亮度只有 262 cd^m2 ，對比起最近 Edward 試過的 Note 5 的 390 cd^m2 光亮度明顯有差別，即使調到最光亦未達到理想效果，戶外日光下觀看會有點難度。
▲雖然肉眼睇到 Moto G 螢幕比 LG G4 暗及稍黃，但其實是我的 G4 過份偏藍，Moto G測溫結果是 6800K 絕對合格
▲利用 Spyder 5 評測螢幕亮度及色溫，得到結果如下圖
Moto G 第三代 預載原廠 Android 5.1.1 Lollipop 作業系統，Vanilla Android 用家介面，讓用家有最原汁原味嘅 Android 享受，預料當 Android 系統有升級時，Moto G 亦會是最快可以獲得升級的一批。Motorola 亦加入少量方便用家嘅功能，例如 Moto 智慧手勢（可以用手勢開啓閃光燈及相機）、通知顯示（有訊息或其他通知時，就算 Lock 咗 Screen 都可以概覽得到）等等。
▲超乾淨，預載 Apps 兩頁睇晒（安兔兔係我 Download 嘅）
▲Motorola 亦加入少量方便用家嘅功能
▲Moto 智慧手勢（可以用手勢開啓閃光燈及相機）
Moto G 身為兩千蚊唔使嘅入門機，竟然有高達 1,300 萬像素主鏡頭，仲拍到全高清影片，已經係超額完成，而前鏡有 500萬像素亦超過合格水平。相機用上一個非常簡潔嘅介面，簡潔到連快門制都冇，只係右邊有兩個制：影片錄影及切換前後鏡，影相就只需要輕輕觸碰一下畫面就會自動對焦並觸動快門，長按就係連拍，咁嘅介面係簡潔定簡陋就見仁見智，籮文就覺得都係有個快門制爽啲。建議用家可以開啓「控制對焦與曝光」功能，咁就可以先對焦後拍照，仲可以調較曝光，對岩光度同焦距先影相。另外有一個快速開相機嘅功能，只要啓動咗，快速擰你手腕兩次就可以啓動相動，再擰兩次就可以切換前後鏡，籮文試過依個功能，係非常敏捷，亦好方便。
▲建議用家可以開啓「控制對焦與曝光」功能，咁就可以先對焦後拍照，仲可以調較曝光，對岩光度同焦距先影相
▲從左邊可拉出一個轉盤，所有設定或進階功能如閃光燈、HDR等都在此
▲即使黑夜拍照，對照片質素未有太大影響，線條非常清?。
▲光暗層次分明，顏色飽和度表現好好
▲雖然放大後沒有過份油畫化，表現不俗
黎到第三代，終於都支援 4G Lte，換言之香港嘅 4G 用家都可以用今代 Moto G 享受高速上網啦！Wi-Fi 亦支援 b/g/n 制式，不過要注意今代 Moto G 係唔支援 Wi-Fi ac 制式，同埋係冇 NFC 功能，Check 八達通餘額都係落返港鐵站啦。跑分仲差過小米2，不過籮文玩咗成日，睇 YouTube 高清片都未 Lag 過。電量雖然只得 2,470 mAh ，不過可能係 720p Mon 慳咗唔少電，5個鐘左右都只係用左 20% 電，一定夠用全日。
依部係我哋喺 Expansys 買嘅水貨，賣$1,595 ，淨係防水已經值回票價，加上有 1,300 萬像鏡頭，而籮文最愛嘅就係乾淨嘅 Android 系統，無多餘嘅 App，種種因素夾埋，簡直係超值，等埋行貨就有保養，仲有多啲顏色揀，不過就唔知等到幾時啦！
查詢： Expansys 2405 8071
