夏天為大地帶黎美腿？錯啦，依家興「夏天為大地帶黎腹肌」！作為紙片男既小編，其實次 次講到游水沙灘船P 都非常尷尬，因為自己無身材又要企係啲「 gym 狂」隔離，都咪話唔自卑。一聽到 SIXPAD 既出現，小編雙眼簡直發光咁，一定要借佢返黎玩。
小編我最期待就係呢部 Abs Fit ，皆因 SIXPAD 代言人 C 朗拿度既 Poster 上腹肌迷人到不得了，天真既小編望住佢腹肌上既 Abs Fit 就覺得自己用左佢就可以變到 C 朗咁（請不要恥笑我）。
其實每個人都有肌肉，只不過可能被表面既脂肪亦即係肥肉遮蓋住左，而所要做既就係令肌肉既線條返返黎，所以 Abs Fit 就採用左 EMS (Electrical Muscle Stimulation)。到底咩係 EMS ？ EMS 即係經由電流刺激，直接向肌肉傳達信號，促使肌肉運動。市面上都有唔少呢類產品，效果強差人意既就係好多用高於 20Hz 既頻率，結果肌肉收縮同放鬆程序無法完整咁完成，所以效果多數唔理想。而 Abs Fit 就岩岩好用左 20 Hz 頻率，即使經過一段時間亦都可以保持到肌肉張力。
SIXPAD 設有預設好既 23 分鐘專業肌肉鍛鍊程式，運動強度會隨時間逐漸提升，去到最後一分鐘就節奏減慢，強度減弱以慢慢放鬆返肌肉。成個 23 分鐘既鍛鍊模式都會有 15 段既強度調節功能，用家可因應返自己個人身體負荷黎任意選擇體感強度。
第一次用完當然唔會即刻睇到效果，不過小編用到最強既 15 度測試，發現都幾震同埋肉眼睇到佢收縮同放鬆既動作幾大，不過完晒 23 分鐘鍛鍊都唔太覺有咩明顯效果住，但都感覺到 firm 左啲。不過小編有樣野擔心既係，假設佢係好有效整到腹肌，但我每次痴都痴得衰過人，歪歪斜斜咁，到底出黎個腹肌又會唔會有影響呢？
至於 Body Fit ，其實所有原理同技術都同 Abs Fit 一樣，不過所訓練既位置唔同， Body Fit 既可以用黎訓練上臂，亦都可以用黎訓練大腿外側同內側。老老豆豆，雖然兩個產品係同一個系列，技術同用法都一樣，但唔只小編就連 Unwire 既同事們都同意 Body Fit 係幾有驚喜啵。
三個字：「好鬼痺」四個字：「小兒麻痺」。因為小編為左測試，將佢調較到最強強度；結果係完全控制唔到手指動作，一整個痺到不行。不過正正因為佢夠強先咁痺，雖然上班族無可能戴住佢做得到野，但只係單單用一次已經 feel 得到啲 bye bye 肉其實已經 firm 左少少，個感覺係幾明顯睇到。如果要係大腿內外側用，用到最強強度係無可能郁得到，可能小編身體負荷唔到既問題，甚至跑步測試時有少少抽筋。雖然佢同 Abs Fit 用法同電流等等相同，但可能擺係手臀同大腿位，個感覺相對比腹部大得多。
對於呢類型既器材，好多人都會有一個錯覺，覺得只要買左一用即刻就會變六舊腹肌大隻仔，做唔到就即係廢。不過操肌就好似減肥咁，「羅馬不是一天建成的」。小編係拎到部機時，都誤以為幾日時間就可以做得到 before & after 既效果圖比大家睇，但奈何太瘦無乜肌肉，所以線條都唔算好出。
不過我仍然會比 SIXPAD 正評，點解？首先，我鍾意佢夠老實叫「健肌儀」而無好 gimmick 咁叫「腹肌機」之類既名，始終由無到有並非易事，而佢真真正正幫到長時間坐低對住電腦上班族既人士即係小編，去 firm 返啲肌肉線條出黎；再者，戴住佢無論做運動定工作，非常輕既重量戴係身都唔太覺， 23 分鐘鍛鍊話都無咁快就過左。但係仍然有啲野小編都覺不足既就係：隨 SIXPAD 附贈既專用軟膠貼只有一次份量，而佢只有約 30 次既黏貼次數，雖然之後有得買返專用軟膠貼（Abs Fit 同 Body Fit 專用軟膠貼價錢分別為 $250 同 $170），不過兩部機本身價錢都唔平，點解唔附送多啲呢？
始終 SIXPAD 屬於輔助器材，唔係用黎打敗運動，而係互相配合：如果讀者本身無腹肌，諗住買左佢就會爆晒六舊出黎，小編可以勸你慳返唔洗買；如果你做開 Gym 或者其他運動，想加強返啲線條既突出，就好似下圖水球運動員馮剛政咁，不妨可以考慮下；而對於同小編一樣朝九晚五都要坐係到對住電腦的上班族，我就強烈推薦比大家，幫你去一去大肚腩同手臂 bye bye 肉都抵啊！
SIXPAD Abs Fit 建議零售價： $1620
SIXPAD Body Fit 建議零售價： $1280
SIXPAD Abs Fit 專用軟膠貼 (6張)： $250
SIXPAD Body Fit 專用軟膠貼 (2張)： $170
