唔知大家仲記唔記得幾個月前我依莉詩走咗去 Bosch 嘅 workshop 挑戰用電動打蛋器整菠蘿包同班蘭蛋糕呢！我見中秋節就快到，而且想一洗自己喺失敗者嘅形象，於是就決定學好點整又香又有口感嘅奶黃月餅，將食譜同心得分享俾大家。食過嘅同事個個都話好味架！
Stage 1 : 準備材料
今次整奶黃月餅嘅材料唔喺好多，同整曲奇、海綿蛋糕差唔多，喺普通超市都買到。反而要似月餅，最重要喺個月餅模，初學嘅就建議用膠模先，比較易控制之餘又平 D，呢個月喺 D DIY 蛋糕材料專門店都應該有得買，大約 $40-50 個。(過埋中秋可能會特價添！ $15個，我都見過)
奶黃餡部份
- 牛油………………………56g
- 麵粉………………………60g
- 吉士粉…………………..28g
- 粟粉………………………56g
- 砂糖………………………56g
- 蛋………………………….3隻
- 煉奶………………………50g
- 水………………………….225g
- 鹹蛋黃……………………6-8隻
曲奇皮部份
- 牛油……………………….75g
- 麵粉……………………….110g
- 吉士粉……………………12g
- 奶粉……………………….18g
- 糖霜……………………….36g
- 蛋…………………………..20g
▲ 同上次一樣，我嘅喺呢部專業級 BOSCH MaxxiMUM 廚師機，而整過過程都喺用膠槳將材料攪勻。
Stage 2 : 製作奶黃
準備好材料就要先整奶黃餡先，因為要蒸大約半個鐘再放涼先用得。
▲ 首先將牛油溶液、粟粉、麵粉、吉士粉 同 糖放入廚師機內，由慢速，慢慢加到快速攪勻。直至無粉粒後，將蛋分 3次加入，然後再慢慢加煉奶同水，一定要要逐樣逐樣落，唔喺會唔夠時間俾佢地結埋，起咗粒 D 餡就唔滑架啦！攪到好似水咁就可以倒入蒸盤。
▲ 之後將奶皇放入蒸爐以 100 度蒸 20-30 分鐘，如果奶皇愈厚就要蒸愈耐。
▲ 蒸熟咗嘅奶皇會呈糕狀，而且唔黐手。整好就可以放埋一邊備用。
Stage 3 : 焗香鹹蛋黃
奶皇餡另一個重要元素當然喺鹹蛋黃，落得愈多就愈香愈有口感，但就愈唔健康，所以落幾多要自己控制啦！
▲ 由新鮮鹹蛋取出鹹蛋黃後，就要將蛋黃壓平喺焗盤上，壓得愈平就愈快熟。之後放入已預熱 170 度嘅焗爐，焗到鹹蛋黃邊位有泡泡出現同開始散開就可以拎出嚟。
Stage 4 : 攪成月餅餡
奶皇同鹹蛋碎都準備好，就要將佢地合體，變成有彈性嘅月餅餡。其他步驟無廚師機都可能做到，但呢一 Part 如果無廚師機幫手，就要自己用手搓成個鐘啦！
▲ 放涼嘅奶皇同蛋黃碎無咁黐手，會比較易控制。
▲ 將奶皇同蛋黃碎倒入廚師機，用中速加快到高速，10分鐘左加，奶皇餡就會變成鬆身一糰，不但唔黐手，仲好有彈性！
▲ 不過記著啊！要打得快之餘，一定要加番個蓋，唔喺佢咁有彈性，會彈晒出嚟架！
月餅餡心得分享 :
1) 蛋、水同奶先坐暖
蛋、水同奶唔可以凍，最好先坐暖或者放喺室溫 15-20分鐘先好用，因為凍嘅加落去會令牛油凝固，浮起面，蒸完個面會油立立，個餡就會好實。
2) 用牛奶代替水會滑 D
今次奶皇嘅食譜喺用水，因為想奶皇味香 D ，但如果想滑 D 可以用同等份量嘅牛奶代替。另外，如果唔想食咁甜都可以適量減糖，唔會因為減咗糖就整唔到，不過都建議唔好減太多，始終喺甜品，如果鹹蛋嘅鹹味太重就會好怪。
3) 無廚師機可用手提打蛋機代替
呢個步驟其實唔一定要用好專業嘅工具都做到，如果屋企無廚師機可用手提打蛋機代替將 D 粉攪勻，而如果無蒸籠就可以用鑊蒸，不過個盤可能細D，倒出嚟厚 D，蒸嘅時間要長番 D。
4) 原隻鹹蛋先夠香
雖然市面有鹹蛋黃賣，不過原隻鹹蛋先夠香，打出嚟唔好沖水洗，就咁隔個黃出嚟，因為洗咗會無咁多油出，就會唔香。
5) 鹹蛋黃有咁碎整咁碎
焗到一半，當鹹蛋黃邊位熱到有泡泡要將佢輕輕界碎，令鹹蛋黃受熱更均勻，唔喺可能會出面燶入面未熟。
Stage 5 : 製作月餅皮
今次奶皇月餅嘅皮其實喺曲奇皮，做法同做曲奇差唔多，只喺加咗吉士粉，而鳳梨酥嘅皮做法都喺差唔多，只喺多咗芝士粉，所以皮嘅材料預多 D 都唔怕，一來包到失敗咗有得再整，兩來多咗可以用嚟整曲奇都得。
▲ 先用慢速將牛油打散，然後加入糖霜用 3度速度攪勻，攪到無白色粉末就停機。再加入蛋液，之後要用最短時間打勻，開到最快。打到無白色粉末同蛋液，但唔洗打到乾身，仲濕濕底就得，打太耐就會黐立立唔要得。
▲ 之後加入麵粉、奶粉同吉士粉攪勻，唔好攪太快，一攪到無粉就要停機，唔好繼續攪，正常喺唔黐手嘅。如果攪得太耐，麵糰會溶，咁就搓唔到形架啦！
▲ 最後將麵糰搓成一糰，用保鮮袋裝好，放入雪櫃雪 30分鐘。
月餅皮心得分享 :
1) 唔可以用砂糖代替
雖然月餅皮做法似曲奇，不過唔可以用砂糖代替糖霜，因為糖唔溶會影響口感。
2) 唔可以攪得太耐
呢個步驟睇落只喺將 D 材料攪埋一齊就得，但就要注意唔可以攪太耐，D 材料一勻就要停，唔喺攪到黐立立就搓唔到形。
Stage 6 : 搓出月餅形
完成月餅皮同餡料就到最講技巧嘅搓形，月餅似唔似月餅就要靠呢步啦！
▲ 首先你要諗好用傳統木模定膠模整月餅，對於初學者，膠模當然易控制好多啦。
▲ 今次嘅份量可以整到 11個膠模份量嘅月餅，所以只需要將皮同餡分別搓形條狀，分成等份就可以。
▲ 記得要粒粒差唔多大啊，唔喺整出嚟 D 月餅就會有高有矮。
▲ 用膠模份量可以唔洗咁準確每個大約 10g皮、 25g餡 就得，但用木模就要用磅量好份量，一個要有 53g 重，大約為 15g皮、35g餡 ，因為材料太少會蓋唔到花紋，太多個擠出嚟，收唔到個底。
▲ 分好之後就要喺枱上灑少少麵粉，放一粒月餅皮，壓扁。然後將皮放喺一粒奶黃餡上，慢慢將皮向下拉，同時將餡各上推。最好反轉將餡收好。
▲ 記得要將搓好嘅麵糰接口放低，唔喺焗出嚟個月餅就會裂開。
▲ 然後將麵糰搓成楕圓形，灑少少麵粉喺表面。如果用膠模，就將接口向下，放入模中壓出月餅嘅形狀。
▲ 如果用木模，麵糰接口就要向上，然後壓平。
▲ 整出嚟嘅時候要先將木模打則左右各拍一下，就整出來。
Stage 7 : 掃上蛋漿，準備入爐
▲ 倒好模就要掃上薄薄一層蛋漿，風乾後，再掃多一至兩層，令花紋突出。
▲ 然後放入已預熱嘅焗爐以攝氏 200度焗約 15分鐘，一有裂紋裂紋就拎出嚟。
▲如果裂紋唔深，放涼後會自動消失。
▲ 因為無防腐劑，整好之後最好喺兩星期內食晒佢。食嘅時候可以用微波爐叮 20秒等佢暖暖地，咁 D 奶皇就會好香，好好味架啦！
搓形、入爐心得分享 :
1) 皮要薄、餡要多
月餅要好食一定喺皮薄餡多，但皮愈薄相對就愈難包，所以最好就預多 D 皮嘅材料，如果失敗咗都可以再整過。
2) 皮壓愈大，愈易包
搓形個陣，皮最好壓過餡一半，咁就易 D 包，唔係好多時會為咗想收口，整到個面裂晒都唔知。
3) 皮唔好落太多粉
為咗搓皮唔黐手，通常都會加少少麵粉，但加咗之後千祈唔好搓咗入麵糰，咁會增加咗麵糰嘅粉，令佢硬身，包嘅時候就會好易裂。
4) 多掃一層蛋漿
蛋漿可加入 1比1嘅牛奶，待第一層蛋漿乾後，再掃多一層，可以令月餅表面花紋更突出之外，亦會更鬆脆。
依莉詩感言
整月餅好多步驟都要用人手完成，特別喺搓形真喺好講技巧，好彩依家有廚師機幫手，唔喺就要用手慢慢搓，慳番好多時間同體力，學識咗之後，今個中秋就可以送親手整嘅月餅送俾人，自家製當然更岩口味同健康 D 啦！
分享到 :
最新影片
