講到旅行，相信好多港人同小編一樣好精明，識上網蜎窿蜎罅搵最平既機票同酒店；但你又有無諗過，其實有個平台可以集合晒網上既所有優惠資料，幫你格到最好最抵？講緊既就係旅遊搜尋引擎。如果聽過的話，相信對小編以下所做訪問既品牌絕對唔會陌生： Skyscanner 。其實除左港人比較喜愛常用既 Expedia 之外，係全球比較知名既當然就係 Skyscanner 啦。小編就訪問左 Skyscanner 既董事總經理 Steven Pang 和市場部經理 Fang Fang ，講下佢地點睇港人旅遊，同埋 Skyscanner 點樣比同類平台優勝。
講到港人鍾意去邊，小編睇到近幾年韓風大盛，就連電視既旅遊節目都係韓國為主；但原來最受歡迎既仍然係日本，韓國排第二。而呢個趨勢並唔只係香港，就連英國同美國地區既人都係搜索日本為最多。至於 Top 5 港人旅遊熱點分別就係台灣 ﹑ 新加坡以及泰國，而台灣咁岩又係英國地區今個暑假入面最受歡迎既旅遊地點，睇黎大家去旅行都會寧願揀返啲就腳既亞洲地區啵。
Top 5 既港人旅遊熱點就無懸念無驚喜啦，不過原來港人除左鍾意去呢啲常見既國家城市之外，亦都會用旅遊搜尋引擎搵一啲新地方。其實講緊既就係 Skyscanner 既 Search Everywhere ，原來有唔少港人鍾意用呢項功能，皆因可以發掘下一啲新地方，只要輸入返出發同回程日期以及價錢，係目的地欄留空佢，就會自動幫你搵晒世界各地最平既航空公司以及酒店等。一開始小編都以為港人去旅遊只為 Relax ，所以只揀一啲比較熟悉既地方；但 Fang Fang 同小編講，原來有 7% 港人有用 Skyscanner 的呢項功能，雖然數字上不算多，但 Fang Fang 好開心見到有部份 early-bird 港人非常鍾意呢個功能，並鼓勵大家都 click 入去睇，相信呢個強大功能可以幫到港人搵到心水地方。
Skyscanner 係全球旅遊搜尋引擎上既地位絕對不容置疑，不過黎到香港，可能對某啲港人都係有啲陌生。然而總經理 Steven 卻話唔擔心，因為三個字：「覆蓋率」。作為一家全球性公司， Skyscanner 無論係目的地 ﹑ 航空公司以及酒店等等，覆蓋率都係比同類型平台高，唔怕貨比貨。而且 Steven 仲話，Skyscanner 最好就係「What you see is what you pay」，因為任何需要附加既費用都加好晒為總額比用户，咁就唔需要擔心無啦啦被啲附加費影響左成個旅遊支出。
Skyscanner 除左自己網頁之外，亦都有推出 Mobile App ，不過同其他旅遊搜尋引擎既係： Skyscanner 將航班 ﹑ 租車同酒店分開為三個 App 。小編一開始都好奇問：「例如我 9 月 5 號到 9 月 14 號放假，想用手機搵地方旅遊，唔係 group 晒三個一齊睇好啲方便啲咩？」 Steven 就話 Mobile Site 可以做到三樣一齊查晒，而黎緊亦都可能將三個 App 整合埋一齊。不過小編估計，將三個拆開變相 workload 少左，無論係伺服器定係用户數據上；而且介面更加清晰直觀，拆開晒亦未嘗唔係一件好事。
作為旅遊搜尋引擎，雖然上返佢自己官網同官方 App 都好夠方便，不過如果能夠係平時去開既網頁都可以搵得到就好啦。而 Skyscanner 明白到呢點，所以就係今年 7 月正式同 Yahoo! JAPAN 以及 MSN Travel Search 合作，用户可以係呢啲網站既搜索引擎上，直接搵到 Skyscanner 既搜尋內容，可以一次過睇晒目的地資料同埋旅遊網頁既資訊。不過呢兩個網站並非香港網頁，港人並不常用，所以 Skyscanner 最近亦都同左 U Travel 合作，係 U Travel 首頁上亦都可以用到 Skyscanner 既搜索引擎，變相就可以令更多人接觸得到旅遊搜索引擎。
