講起超跑，法拉利相信無人不識吧！而係今年三月於瑞士日內瓦車展首度亮相的最新超跑 Ferrari 488 GTB，近日就首度抵港！難得有如此機會，Edward 自然第一時間去他們的陳列室，為大家帶來第一手的試「坐」速報啦。
車身更流線型•風阻大幅降低
今次的 Ferrari 488 GTB，雖然車架上同上代 Ferrari 458 差唔多，但係單睇外形已經同上代有分別，最明顯係係車身設計上作出了唔少改動，採用更加流線型設計，氣流能夠順利通過車頭部分去到車尾，令風阻大大減低。據廠商表示，488 GTB 的風阻系數達到超低的 1.67，比 458 的風阻足足減低了 53%！
▲488 GTB 係車身設計上變為更流線型，令氣流可以順利通過車頭部分，並經過車頂，再由車尾上圖的凹位帶走，據官方稱風阻可比上代 458 大幅減低 53%。
▲同時睇番 458 就無用呢種設計，唔知今次改動有否令 458 車主們心動升級呢？
馬力更強速度更快
每一代 Ferrari 超跑的注目點，其中一個肯定係引擎。而今次 488 GTB 另一特點，就是搭載了 3.9L V8 雙渦輪增壓引擎，最高馬力可以達到 670 匹，同上代 458 的 570 匹相比，足足多了 100 匹！此外，油門加速所需時間只係 0.8 秒，即係幾乎係一篤油就去，成架車控制響應速度更只係 0.06秒，反應超快。另外，0 至 100km/h 只需 3 秒，而 0 至 200km/h 更只需要 8.3 秒，比起上一代 458 快好多。相信呢個表現，絕對可以滿足喜愛速度感的超跑迷。
▲搭載全新的 3.9L V8 雙渦輪增壓引擎，馬力輸出比上代 458 足足大 100匹。
▲另外車身兩側加入了扇貝式入氣口，用以引入生風為引擎降溫，亦有助減低風阻。
▲因為未能試車，唯有俾大家睇睇 Ferrari 係賽道上試揸 488 GTB 的影片，等大家可以用雙眼、雙耳感受一下 488 GTB 引擎的威力啦。
引入 LaFerrari 級數剎車系統
如果對 Ferrari 有一定認識的 wire 民，應該都知道 LaFerrari 呢個系列的超跑，基本上唔係有錢就買到，因為全球係限量發售，只有獲得 Ferrari 邀請先可以買到。而今次的 488 GTB，係剎車系統上就以 LaFerrari 為基礎來開發，它採用了 Brembo 製碳陶瓷制動系統，令 100 至 0km/h 的距離只需要 29.5 米，而 200 至 0km/h 的距離更只需要 117 米，同上代 458 相比，分別短了 3 米及 9 米。另外，據官方表示，Brembo 製碳陶瓷制動系統亦可以令制動系統不會因為過熱而令剎車距離增加。
▲488 GTB 採用全新的 Brembo 製碳陶瓷制動系統，相比以往同系列的制動系統，可以有更穩定及更短的剎車距離。
坐落超舒服！懷舊風格皮椅要加錢
有坐過 Ferrari 超跑的 wire 民，應該都知道座位一向都係好舒服，今次呢部 488 GTB 都唔例外。雖然唔揸得出街，但 Edward 坐上車就覺得張真皮坐椅真係好舒服，而且採用人體工學設計，坐上去的包圍感好強，簡直好似瞓係度駕車一樣，真係好爽。另外，相比上一代，張椅亦係採用電子設計，只要按動椅側就可以升高降低或移前移後整張椅，亦可以弄直或攤平椅背，十分方便。值得一提的是，標準配置係跟淨黑色真皮皮椅，但大家都知道 Ferrari 的超跑一向都係 tailor-made，如果大家想懷舊一點，可以考慮另外加錢換上下圖的座椅，令車身內籠可以睇起來更靚呢！
▲真皮皮椅配上懷舊風設計，無論舒適度定係視覺效果都一流。
▲透過移後座位，就算好似 Edward 擁有較長腳的駕駛者，都可以好舒服。
▲軚盤揸上手都好舒服！
▲預設的車載音響系統為 JBL，估計應該都幾好聲。
Edward：「希望香港有地方比佢地板油。」
今次 Ferrari 488 GTB 首次抵港，由於只係左軚車，香港行貨就算訂了，最快都要下年一、二月先有貨，所以暫時未能為大家體驗路面上駕駛感受。不過 Edward 始終覺得，呢類超跑係香港呢個「踩 Brake 多過踩油」加上車多路窄燈位多的路面環境，比你行得再快都冇用，很難發揮 Ferrari 呢類超跑的真正長處。如果大家可以係其他國家體驗，相信會有更爽的感受。
不過話又說回來，如果願意俾得 $3,998,000 買 Ferrari 488 GTB 的用家，都係作為身份的象徵的愛好者！又點會在乎個少少油錢呢，right？最後一提的是，如果大家對 Ferrari 488 GTB 有興趣，而家落訂就要 2017 年先至可以拿到車，但以一部 tailor-made 的超跑來講，算快架啦！
Leave a Comment