Panasonic 繼 GX7 後再推出新一代 Lumix G 系列 M43 可換鏡相機 ， LUMIX GX8，雖然售價賣到過萬，但 GX8 係首款超2000萬像素嘅 M43 機，亦都係 Lumix G 系列數碼換鏡相機中第一部用上雙影像防震系統，想知 GX8 係咪真係值依個價，繼續睇落去！
手感更佳用內閃換操控
外型上，GX8 同上一代一樣都係走復古風。有銀色及黑色兩隻色選擇。機身用鎂合金並有防塵防水滴效能。而升級了的 Hand Grip 比上一代更深，就算我籮文隻手咁大都可以輕鬆揸得穩部機。GX8 缺少了 GX7 嘅閃光燈，換黎嘅係機頂旋鈕有重新設計，除咗上一代固有嘅前後旋鈕，仲加多一個曝光補償旋鈕，用家除咗可以用前後旋鈕調教光圈快門，仲可以喺 Fn 制自定不同設定，仲有 Dial Operation Switch 功能，可以切換旋鈕嘅功能，咁就可以跟據自己需要黎定義旋鈕嘅功能啦！
▲ 除咗上一代固有嘅前後旋鈕，仲加多一個曝光補償旋鈕
EVF 大如 35mm 全片副相機
今次 GX8 增設咗一個 3吋嘅多角度觸控式屏幕，相比起 GX7 只能上下翻，GX8 更加方便用家高低角度構圖或者拍片，仲可以俾用家自拍，絕對係一個大進步。原有嘅可90度向上翻揭式電子觀景器有經過改良，今次嘅電子觀景器具有 1.54倍／0.77嘅放大率，相等於35mm格式，主體細節更清楚，用家就更加可以確保對焦準確，方便構圖。
▲ 原有嘅可90度向上翻揭式電子觀景器經改良
▲3吋嘅多角度觸控式屏幕，相比起 GX7 只能上下翻，GX8 高抄低抄拍片更方便，仲可以自拍。
4 ＋ 2 軸防震抗衡對家 5 軸
GX8 係 Lumix G 系列數碼換鏡相機中第一部用上雙影像防震系統 Dual I.S. ，喺上一代嘅 GX7 上，用家可以選擇機身防震或者鏡頭防震，但全新嘅 GX8 Dual I.S. 功能可以同時使用機身嘅四軸防震同鏡頭嘅兩軸防震，4+2軸防震可以發揮全面嘅修正效果，夜晚出去影相都可以拍出清?影像絕對無問題，不過就要搭配兼容嘅鏡頭，部份鏡頭只要升級 Firmware 就支援到。
▲發佈會現場，大會於一個搖擺裝置上放置一部 GX8 及一部某牌子嘅五軸防震相機，筆者從電視 LiveView 可見， GX8 畫面搖擺幅度比另一部五軸防震相機細得多。
打破1,600萬像框框 高畫質升級
M43 機一直未能打破1,600萬像嘅上限，籮文心諗我部 LG G4 都有 1,600萬像啦，今次 GX8 終於突破，用左 2,030萬像素 Digital MOS 影像感應器，感光度升級，動態範圍亦比 GX7 多 1/3 級，光位暗位都可以保持細節，而 Venus Engine 影像處理器亦能夠喺低光環境降低相片嘅雜訊，ISO 可以達至 25600。
4K 影片 + 60fps 4K 連拍超實用
相比起上一代只可以拍 FULL-HD 嘅 GX7 ，GX8 可以拍攝 MP4 格式嘅 4K 影片 （25fps / 24 fps），拍到 4K 片之外，仲有一個4K 相片拍攝模式，用家可以從 30fps 嘅 4K影片中擷取相等於 800 萬像素嘅 4K 相片，而 4K 相片 有3個模式，分別為 4K Burst Shooting ，4K Burst S／S 及 4K Pre-Burst。4K Burst Shooting 就係㩒住快門進行 30fps 高速連拍。4K Burst S/S 係 Stand for Start/Stop，即係㩒一次就開始連拍，㩒多次就停止連拍。最後 Pre-Burst 模式就係會紀錄低你㩒快門嘅前後2秒嘅60張相。嘩 4K Photo 都咁多個 Mode，就岩晒用家拍低精彩嘅一瞬間。
▲只要按下方 4K 連拍按鈕 就可以拍 4K Photo！
夜空下連星星都對焦到
對比上一代 GX7 ，GX8 AF Mode 由23個對焦點增至49個對焦點任你揀。除咗臉部自動對焦，GX8 加入 眼部辦識自動對焦功能，換言之就係對焦落對眼度，對眼 Sharp 啲，影出黎個人都精神啲。而最勁就係 Starlight AF 功能，對焦偵測區域會集中於中間並更細小，用黎影星星嘅時候只要揀選星星所處嘅一格對焦區域，對焦就更準確，連星星都影到！但籮文唔明點解咁辛苦.. MF 無限遠咪得囉 …
▲Starlight AF 功能，對焦偵測區域會集中於中間並更細小，用黎影星星嘅時候只要揀選星星所處嘅一格對焦區域，對焦就更準確，連星星都影到！
特色創意功能 超廣角全景模式
GX8 亦有各種藝術功能，總共有22款濾鏡可供選擇。此外仲有創意全景模式，就好似用開嘅智能手機咁，一掃就拍晒你所處嘅環境。
▲共有22款濾鏡可供選擇
▲創意全景模式，一掃就拍晒你所處嘅環境。
測試相片
▲（ISO200／f 3.6 ／1/160）放大後可見成像十分細緻，沒有油畫化問題
▲（ISO250／f 3.6 ／1/60）隻馬雖然於逆光位，都唔會失去細節，感光度及動態範圍都有好表現
▲（ISO400／f 3.6 ／1/60）放大後，價錢都可以讀得到
籮文：「其實貴係 4 K 及 4 + 2 軸防震拍片度，而不是相片」
GX8 淨機身售價 $10,390 ，過萬蚊係咪貴呢？籮文覺得如果單論影相質素係貴嘅，不過其實我覺得 GX8 強項是在拍 4K 片，為今次加入嘅 Dual I.S. 防震比 GH4 更穩定，而剛剛評測過的五軸防震嘅 Olympus E-M10 Mk II 則偏向影相方面，如果比較著重拍片的話，我籮文會選佢 !
分享到 :
最新影片
