就開學呢段時間就最多 oday，ocamp，都未開學就話要 re－u，係咁瘋狂約人，com時間。單係就日子都改左九千次，全無效率，真係開學都未約得齊人咁。皓藍係 unwire 做左一段日子，睇得艾露貓的實用技巧多。今次就等我教教大家用一d app 大大加快約人效率，仲可以令潛水嘅組員上水添！
皓藍今年第一年玩 ocamp （唔通我好後生又話你地知咩～），覺得 「dorm」個 whatsapp 群組有幾個特點：第一，係咁震；第二，唔知點解佢唔會唔震；第三就係成日都會係咁 loop 同一個訊息去比大家填時間表，約下一次meeting、練舞、食飯等。一個群組有起碼十個人，但唔係十個人都同一時間都可以覆到你，有人依家覆，有人今晚。但係個訊息水蛇春咁長，有時覆咗，但又可能同人地撞，唔夠更新。真係覆到 2046，開晒學都可能未知覆晒未！所以呢，就等我呢個「科技小先鋒」教教各位同學點樣可以快手 d 約齊人 dem beat、食飯、練舞、去 camp、re-u、再 re-u、再再 re-u啦！
潛水的人兒無所遁形！
其實 Google Forms 呢個功能就係人都知，但係多數人都會應用係正式嘅約會，例如參加 unwire 嘅試玩會～ 不過，到咗係咁多人一個群組，同埋「xx號到唔到啊？」訊息無限 loop 嘅時候，我覺得係時候要出動到佢啦！
簡單寫上活動嘅標題，然後就係組員嘅名，同埋時間，地點，或者你自己想加嘅嘢就得。白紙黑字，有規律咁樣幫你記錄曬～ 重唔洗特登係咁掃掃掃個 whatsapp 先見到究竟今日有邊個到，一開條 link 就都睇到曬啦！
連覆都唔覆去唔去啊你？
Doodle 呢個 App 原理同頭先嘅 Google Forms 係差唔多，不過佢有個好處就係顯示嘅介面比 Google 更靚同埋人地幫你 preset 曬格式唔洗煩。電腦使用 doodle 係會比手機易上手，同樣佢都係會可以比條 link 你 send 比人去填。當所有邀請嘅人填好曬，就會自動選出一個大家都得閒嘅日子同時段，幫你入埋去 schedule 提你個日有嘢做添㗎 （呢個入埋 schedule 嘅功能就要你 download 埋佢個 app 先會有嘅）
