如果大家仲記得的話， Yahoo 係 2013 年中收購左 Tumblr ；不過一直都無咩新搞作。直至到 7 月頭， Yahoo 香港正式係 Tumblr 上推出「藝造香港」，其實就係一個提供比香港藝術者創作既一個平台。小編就同來自 Yahoo 既 Celina 傾過，都覺得成個平台都幾 user-friendly 同幫到藝術者谷人氣啵！
既有邀請藝術者加入 用户亦可選擇投稿
藝造香港一開始會邀請一啲比較知名既藝術者加入，不過如果無被藝造香港睇上邀請亦唔需要灰心，用户亦可以選擇自行投稿，等藝造香港注意到你既作品，將你擺入去佢地既平台。
業餘藝術者偏多 卻不乏極具潛力者
小編所講既「業餘」，並非指佢地唔夠好唔夠專業，而係大多數都並非全職從事藝術性質工作。例如：比較多人熟悉既網絡作家「藍橘子」，佢並唔係全職做一個作家；而插畫家方面則有更多，如來自空少既「空中飛傭」同埋作為工程師既「手繪 Speeding」等等… 雖然佢地既職業同藝術並無任何關連，不過當中卻有唔少都極具潛力，加上佢地個份熱情同堅持，作品係藝造香港上好快就獲得唔少讀者既關注，唔輸比全職藝術工作者架！
藝術者定期聚會 跨界 Crossover 合作
藝造香港呢個平台並唔係 one-way 的。好多平台都只係用户上傳作品上去比讀者睇，而藝造香港注重既唔只係提供藝術者與讀者之間既平台，更係藝術者與藝術者之間。藝造香港會定期舉辦聚會，邀請各個藝術者一齊做交流同 brainstorm ，睇下互相會擦出啲咩野火花，有咩技術上既問題亦可以問返藝造香港，更重要既係令各個藝術者可以同自己鍾意 ﹑ 欣賞既藝術者見面。而就係較早之前，網絡作家藍橘子同插畫師黎特就 crossover 一齊完成「小說」，藍橘子就負責文字故事部分，而黎特就負責畫插圖既部分，黎緊 Celina 話將會有更多既 crossover 出現。
藝術種類豐富 內容不設限制
雖然以上講緊既係作家同插畫師多，但仲有好多類型同主題如攝影 ﹑ 食物 foodography ﹑ 寵物等等， Celina 表示已經接觸緊一啲 Pet lover 同埋以寵物為主題既插畫師，種類非常豐富，無論讀者係鍾意咩形式咩主題都可以搵得到。而小編當時即刻就好奇問：「咁你地會唔會有 filter 一啲敏感題材架？」Celina 都表示任何題材都歡迎，即使係涉及暴力 ﹑ 血腥 ﹑ 裸體同政治，因為每個人都有創作自由，而作品就係藝術者表達自己既最好渠道。不過要注意既係，如果涉及 18+ 既題材，就會上唔到 Yahoo 首頁既 feature 架啦，始終 Yahoo Home Page 唔可以登呢類作品。
Yahoo 首頁 feature 作品人氣節節上升
岩岩就講到 18+ 既題材唔可以上 Yahoo 首頁 feature 既，不過其他任何類型既作品都有機會被 Yahoo feature 上首頁。Yahoo 首頁既 feature 亦都非常明顯，就係首頁既左上角，另外係 Lifestyle 個欄都會有 feature ，至於會顯示幾多就視乎返個 user interest ，越鍾意睇藝造香港既讀者就睇得到越多。
Tumblr 優勢一個字：「Flexible」
雖然 Yahoo 收購左 Tumblr 用佢黎做「藝造香港」無可厚非，不過原來 Tumblr 既優勢比其他 network 強得多既就係佢夠 flexible 。佢可以擺放 GIF 圖，讀者只需要一進入 dashboard 就直接睇得到，唔似 Facebook 咁要 click 入去噤制先。而且成個 site 都可以自己設計，就好似藍橘子將自己既作品分類分系列，仲有 search 功能，讀者要搵文睇就易好多，唔似 Facebook Page 咁大限制，模板個個都一模一樣，搵返之前啲 post 係難上加難，仲要有個大大個 Facebook logo 係度，同 Tumblr 上面個條唔明顯既 user bar 相比 Tumblr 較好。更重要既係，如果藝術者有唔同既 style 或者個人 project ， Tumblr 一個帳號就可以開多個 blog ，唔需要開幾個帳號咁麻煩，仲要登出登入。
尊重原創 讀者點分享都會顯示原創作者
而第二個重要優點就係，無論用户點樣分享藝術者既內容，讀者既 share post 永遠都會顯示返原創作者。例如： A 分享左藝術者 B 既作品，就算以後 C ﹑ D 同 E 分享 A 既內容，藝術者 B 既名永遠都會個啲分享出去既內容上，唔會好似 Facebook 會無啦啦無左原創作者個名，如果無落水印從此以後就難同作品再有連繫咁。呢點其實多得 Tumblr 既 founder 本身都係一個藝術家，所非常尊重 original 。
作品受品牌和大公司關注 隨時比藝造香港推薦
小編都覺得成個平台設計唔錯，不過小編都緊隨其問：「仲會唔會後續發展就好似藝術者能夠同其他公司或品牌合作？」 Celina 都表示會主動將一啲有潛力既藝術者推介比其他公司同品牌，希望佢地既作品比更多人認識，而且都有唔少公司會主動係藝造香港搵一啲適合既藝術者聯絡，所以其實對於將來既發展亦都非常有幫助。
以下就係一啲推薦既「藝造香港」上的藝術者：
藝造香港網站：請按此
分享到 :
最新影片
