入過去戲院睇戲，又無遲到嘅朋友都應該知道播每套戲之前都有一段短片叫人唔好講電話、唔好大聲講嘢等等。其實呢 D 好似喺人都知，但又喺咪個個都會做到呢？事實上隨住科技進步同人嘅習慣改變，原來電影院禮儀都有一定嘅改變。今日起百老匯全線 40間戲院就會喺每套戲放映前，播放由本地藝術家 B.WING 創作嘅全新短片，用輕鬆手法提醒大家要靜靜地專心睇戲。
今次短片主題喺「It’s time to enjoy the show」，比起上一次只得 A仔一個拎住爆谷入戲院，畫面色彩繽紛咗好多，仲加入咗 9個 A仔嘅朋友組成 「A仔聯盟」，好似 MV 咁邊唱邊帶出多項觀影禮儀。之所以有呢個想法，原來喺因為 B.wing 「有一日畫咗一幅 A仔彈結他嘅畫，突然想幫 A仔夾隊 Band，作首歌令電影禮儀再深入民心 D。」而呢首歌，佢就搵咗金像奬「最佳原創電影歌曲」得奬者、作曲人戴偉創作，並由本地唱作歌手林二汶主唱。
可能大家都試過一路睇戲後面一路有人傾計嘈住晒。原來 B.wing 都好唔鍾意，「對我嚟講睇戲喺好神聖嘅事，如果有人喺隔離講嘢、睇手機，完全騷擾緊我做一件好神聖嘅事。」而林二汶亦有類似經歷，「我喺一個好平和嘅人，但唯一想用暴力就喺喺戲院入面，因為「It’s time to enjoy the show」，睇戲就應該靜下來好好欣賞，珍惜呢個時刻，聽電話，傾計可以留番睇完之後做。」佢地同時希望大家喺睇短片嘅時候可以放鬆心情，準備迎接好戲之餘，同時希望更加多人知道，安靜睇一套電影可以得到嘅會更加多。
▲ 負責作曲詞嘅戴偉起初覺得作呢首歌有D難道，因為「叫人睇戲唔可以做D乜，喺好死嘅規則。後來發覺用廣東話表達，唔止表達得更到肉，仲生動好多添！」
▲ 睇戲時唔可以講電話就喺人都知，但有電話打嚟，你又會唔會忍唔住接呢？
▲ 就算唔接電話，其實 Send 短訊，螢幕光都會影響到人架！
▲ 其實室內禁煙都搞到好多年，如果隔離位仲食煙嘅話，真喺要同佢講句「先生，吸煙危害健康呀！」
▲ 中間有一部份喺用手語表達嘅，戴偉就希望聽障朋友睇條片都知做緊咩，非常貼心。
以前細個商場都會有好多機動遊戲機仔，俾入一兩蚊，架嘢播下音樂搖幾搖咁，雖然好無聊，但果陣又好開心咁。今次為配合全新短片推出，百老匯院線 同 B.WING 就特別推出咗部可供大人坐嘅「A仔雲遊大世界」室內機動遊戲機。希望將到戲院嘅歡樂延伸至放映廳外嘅空間。此外，更有一系列「A仔聯盟」限量紀念精品喺香港全線百老匯、PALACE 及 AMC 戲院公開發售。
▲ B.WING X 百老匯院線限量版文件夾 HK$45(一套3款)
▲ B.WING X 百老匯院線限量版日本製 Pikka Pikka 超細纖維布料 (適用於清潔眼鏡、鏡頭、手機屏幕等) HK$89
