如果你覺得 6 吋芒都仲係細，又唔想用 Tablet 可以試下用佢。P8Max 有6.8 吋巨芒，依部平板手機除左大之外，當然都有其他賣點，一齊拉落去睇下啦！
金光閃閃 Bling Bling 實鍾意
P8Max 有三隻色，分別係Luxurious Gold， Titanium Grey 同埋今次我地借到嘅依部 香檳金 Mystic Champagne，機背位置金光閃閃，機身邊位都有斜位切割，唔會鎅手之餘，燈光映照下整部 P8Max 嘅輪廓都閃閃發光，喜歡 bling bling嘅我就好鍾意依部機嘅外型啦。
▲機背位置反光閃閃下，喜歡 bling bling嘅我就好鍾意啦
全金屬一體成型機身 係靚嘅但係跣手囉
6.8吋，話單手操作無難度就呃你嘅，就算要單手 揸實 都難，因為 P8max 採用全金屬一體成型機身，雖然造工好仔細，睇落亦都好靚，厚度只有 6.8mm，重228g 亦都唔算太重喎，不過揸上手都幾跣手，話說籮文我單手揸住部 P8Max 影相嘅時候都差啲跌咗部機，不過濃厚金屬感俾人感覺好堅固，兼且機面有Gorilla Glass 4玻璃塗層，好似跌極都唔會爛咁。（利申：無跌過，唔敢擔保，有興趣可以買部跌下，跌完記得話我哋知個 Drop Test 嘅結果啊～）
▲機頂有 USB 位及耳機位
▲喇叭設於機身下方，唔似某啲手機喇叭設於機背，放喺枱會好細聲。不過放落褲袋就最好機底喇叭向上，避免聽唔到電話響。（前提係要放得落褲袋）
▲無咁大個褲袋就唔好帶咁大部機。無條適合嘅褲就唯有咁樣袋住先。
▲真係要讚一下 P8Max 嘅造工，機身邊位都有斜位切割，唔會鎅手之餘，燈光映照下整部 P8Max 嘅輪廓都閃閃發光。
相關文章:
受保護的文章：【評測】Huawei Mate X6 詳細評測 紅楓原色鏡頭還原肉眼所見顏色 受保護的文章：Draft: 【評測】HUAWEI Pura70 Ultra@天通衛星通訊 香港表現詳細評測（下） 天通衛星市區表現@ 全面評測 + EMUI OS 簡介
電池大到可以當尿袋
P8Max 內置4360mAh 超大電池，就算無得換電都夠晒皮，仲要誇到支援反向充電，可以當尿袋幫其他手機叉電。反向充電需要專用嘅充電線，我就未試過，不過 P8Max 嘅續航力就真係超班，雖然用上 6.8吋芒，亦都冇影響電池消耗嘅速度，籮文將 P8Max 叉滿電之後玩左兩日小時，一路都係用最高光度，中途又上過 YouTube 睇高清片，都仲有四十幾％電。P8Max 係支援雙卡，不過同好多支援雙卡嘅手機一樣，要用晒雙 Sim卡嘅時候就要犧牲 SD 卡嘅位置啦，不過好在佢有 64GB 內置容量，唔用 SD 卡都夠用一排。
▲P8Max 開關掣、音量調節及 Sim 卡 ／SD 卡槽位置機身右側。採用類似 iPhone 嘅 Sim 卡槽設計，用支野督一督就會彈出黎，而我今次就用咗髮夾。
▲同好多支援雙卡嘅手機一樣，要用晒雙 Sim卡嘅時候都係要犧牲 SD 卡嘅位置。
芒無咁 Sharp 但尺寸大補救
P8Max 用上 6.8 吋 1920 x 1080 IPS，除返開像素密度只有 326PPI，數據上認真係輸蝕，雖然係咁，但我發現除非好仔細好近咁睇，否則實際用起上黎係唔會見到起格情況，而且飽和度令我感到好驚喜。官方就話 P8Max 用咗窄邊框設計，窄唔窄就見人見智，不過咁大個芒睇片都已經好爽，邊框唔會太影響視覺享受。
▲與 LG G4 比較，可見 P8Max 個芒有幾巨大
▲像素密度雖低，但對細緻度影響不大，而飽和度表現更是驚喜地好
後鏡用 Sony 鏡頭表現唔錯
相機方面，P8Max 用上 1300 萬像素 Sony IMX278 F2.0 光圈主鏡頭，陰暗環境拍照係佢強項，成像亦十分細緻，更加有慢快門模式，可以玩 Light Painting，而 800 萬像素前鏡就不過不失，陰暗環境自拍時雜訊略多。而由於螢幕特大，如果用 P8Max 自拍時掛住望實自己個樣，影出黎一睇就會知你冇望鏡頭。所以P8Max 就有一個好貼心嘅功能，只要開啟功能，自拍時前鏡下方螢幕會顯示一個縮細嘅畫面，望住依度黎 Selfie 影出黎就會好似望住鏡頭咁。
▲同巨大機身相比，鏡頭同閃燈都好細粒
▲相機介面貌似 iPhone。由於機身大，單手影相時有點吃力，見到我籮文隻手指尾幾用力頂住部機啦
▲放大二百幾倍，外賣紙完全清?可讀。
▲後鏡為光學防手震鏡頭，巴士行駛中拍攝，成像亦十分清?
▲放大後，可清楚見到巴士編號5519。
▲由於螢幕特大，如果用 P8Max 自拍時掛住望實自己個樣，影出黎一睇就會知你冇望鏡頭。P8Max 就有一個好貼心嘅功能，只要開啟功能，自拍時前鏡下方螢幕會顯示一個縮細嘅畫面，望住依度黎 Selfie 影出黎就會好似望住鏡頭咁。
鬼馬功能 － 敲敲個芒 Cap 圖 ＋ 問佢喺邊 佢識答你「我在這！」
▲好似我咁敲兩野個芒就可以 Cap 圖
▲只要開啓語音喚醒功能，就可以用語音 unlock 部機
▲加埋以上嘅設定，就可以大叫問你部 P8Max 喱埋咗喺邊，佢就會話你知「我在這！～」 （不過講真，咁大部機都好難唔見）
相關文章:
受保護的文章：【評測】Huawei Mate X6 詳細評測 紅楓原色鏡頭還原肉眼所見顏色 受保護的文章：Draft: 【評測】HUAWEI Pura70 Ultra@天通衛星通訊 香港表現詳細評測（下） 天通衛星市區表現@ 全面評測 + EMUI OS 簡介
總結：當手機用 大大部夠霸氣；當平板用 細細塊夠方便
如果當手機用，單手又用唔到，褲袋又袋唔到，咁大部的而且確好唔方便。但係講就咁講，如果你係一個頂天立地男子漢，隻手同褲袋都夠大 Carry 到依部手機，我係真心佩服你嘅霸氣，我就自問冇咁能耐。對於一般用家黎講，我就推介大家以 P8Max 作為平板電腦用，Size 唔大唔細岩岩好，做一啲細細地既 Presentation 都冇問題，6.8吋芒用黎搭車睇片更加係一流，你部手機用到無乜電又可以用 P8Max 幫佢叉電，所以我覺得 P8Max 真係副機嘅好選擇。
查詢：$4180（三禾電氣 2374 0618）
相關文章:
受保護的文章：【評測】Huawei Mate X6 詳細評測 紅楓原色鏡頭還原肉眼所見顏色 受保護的文章：Draft: 【評測】HUAWEI Pura70 Ultra@天通衛星通訊 香港表現詳細評測（下） 天通衛星市區表現@ 全面評測 + EMUI OS 簡介
分享到 :
最新影片
