TSUM TSUM 香港場測開始！依莉詩落「機舖」測試

Disney Tsum Tsum 街機出咗成年，但 Fans 們要玩就唯有去日本。等咗咁耐，終於有好消息啦！因為香港場測就喺 8月 18號開始咗，不過大家要玩就快啦，去到 23號架咋！今日我依莉詩就到咗進行嘅場測 Virtual Zone 親身試玩。

女人錢最易賺？

Disney Tsum Tsum 本身就喺一隻主打女性市場嘅手機 Game (雖然小編身邊都有唔少男仔玩)，依家出街機加扭蛋機，女粉絲們仲唔玩完一次又一次？幸好今次場測嘅價錢唔算貴，就咁玩一次就 $7，如果想扭埋 Tsum Tsum 手機掛飾就 $35。現場所見，玩嘅大多都喺情侶，而且仲扭完一隻又一隻，睇嚟燒嘅都喺男士們嘅錢為多啦！

三種玩法，連機對打

遊戲玩法方面除咗同手機版玩法一樣嘅模式之外，仲有圍圈圈同旋轉消除兩種，而且仲有得同隔離連機對打添！當然啦，嚟得玩嘅，都喺想玩原始玩法嘅。

▲ 另外兩樣都喺消除遊戲，不過依莉詩都喺鍾意玩番原始玩法。

▲ 除咗多咗玩法，仲可以揀連機比賽。

▲ 個 mon 大咗咁多，邊隻打邊隻都睇得清楚晒！

扭蛋抽最強 Tsum Tsum

雖然日本宣佈咗 7月會出 Vol.1，不過今次嚟香港嘅都仲喺 Vol.1 ，只有 10隻 Tsum Tsum 抽咋！只要俾 $35就可以喺玩之前抽一隻，抽到之後就可以放喺機面做辨識，咁佢就會出現喺你個 Game 入面啦。每次最多可放 5 隻 Tsum Tsum，仲可以揀邊隻做隊長添！

▲ 最邪惡又最燒人錢嘅，一定非中間嘅扭蛋莫屬。

▲ 睇到呢個畫圖就可以將手上最強嘅 Tsum Tsum 放上去逐隻掃瞄啦！

▲ 我抽到唐老鴨啊！

▲ 如果唔 scan 抽到嘅 Tsum Tsum，基本上佢都喺俾米奇你玩。

買卡儲紀錄

同手機版唔同嘅喺，佢要靠張 e-PASS卡先可以記錄遊戲等級、實績、金幣數等。但小編問過負責人，佢話今次場測之後，呢部機唔知幾時先正式登陸香港，所以我就無買到張卡啦。不過，如果自問喺機迷，不妨買張放定喺銀包嘅。

▲ 第一次玩就有 30幾萬分，算喺咁啦！

依莉詩：「個 Mon 夠晒大，兩個人玩最岩！」

我一路都玩開手機版 Tsum Tsum，貪 D 公仔得意之餘，玩嘅時候又唔洗點用腦，搭車瞓前都會玩。而呢部機最唔同嘅地方就喺個 Mon 大咗，可以兩個人一齊玩，都喺另一番樂趣。可能喺新機，個 Mon 都幾清同玩落都幾順，不過就略厭少咗 D Tsum Tsum 揀，就好似我最鍾意用嘅小魚仙同黑魔后都無。至於價錢方面，我就覺得唔太貴，依家出去抽一隻掛飾都二三十蚊，佢 $35 包埋玩一局，算喺咁啦！