一踏入夏季，打工仔成日都「望天打掛」，睇下幾時打風搏有多一日半日假期休息。雖然上個星期已經立秋，但香港的颱風季節仲未完，通常去到 10 月都仲有機會打風架！而家科技咁先進，加上鄰近地區的天文台數據又互通，天氣預測應該好準確。不過正所謂「天有不測之風雲」天文台亦偶有失手，就好似上次八號風球「蓮花」，也無風雨也無晴，據稱係因為香港好少颱風由東面吹襲，唔夠數據所以預測冇咁準喇！咁作為一個普通市民，我地應該點樣「收風」第一時間收工提高警覺呢？今次就等我介紹幾個惡劣天氣下大派用場的Apps啦！
▲ 你地話喇，係咪右面整潔啲、靚啲丫～
我的天文台 App
【我的天文台】係由天文台自行研發的手機 App，佢曾經獲得 2014 年香港資訊及通訊科技獎：最佳生活時尚的銅獎，而對上一次重要更新之後，成個界面靚左好睇左，而且仲一站式提供好多有關天氣的資訊。識用的朋友更加一定會顯示彈出式提示，話俾自己聽天文台幾時發出警報訊號，快過睇 Facebook d 流言啦！但小編個人就比較講究，總係覺得天文台個 App 仲未夠完美，我自己電話就用另外一個叫做 Hong Kong Weather 的 App，有晒必需的功能，亦都係用左天文台的開放數據(Open Data)，所以唔駛擔心唔夠準呢！
myTV App
小編平時真係唔睇 CCTVB 的，但一到打風落雨就會好捧場，因為睇電視報天氣點都叫做信得過呀嘛！尤其是自 2012 年佢地引入左 MetraWeather 之後。主播會簡介香港及鄰近地區的雲量、降雨、氣壓、風向以及熱帶氣旋移動路徑…等等，動畫仲好好睇添。打起風落起雨上黎，個個都會好緊張外面情況架嘛，電視台其中一個好處就係會派專人去海邊現場報導等大家可以感受下打風既威力嘞！想知即時的市面狀況就話都冇咁易啦～
By the way，靜靜雞話你地知，
各大社交平台
一打風落暴雨，我地用開果啲社交平台就會被「洗版」，朋友又好，專頁又好，紛紛向你報告外面實時情況，除左有另一條渠道了解街外情況，亦都係保持通訊的好方法。不過要留意既係，通常風打得越勁雨落得越大，網絡就會越塞車，部分網站甚至可能會 load 唔到，呢個時候如果想要報平安，就千祈唔好 send whatsapp 錄音啦，好大機會傳唔到出去的，快快手打個電話報平安可能仲好呢！
earth :: a global map of wind 及 Windyty
如果你係氣象發燒友，應該有聽過上面兩個程式喇！前者用即時動畫效果，顯示出全球的風速、氣溫、降雨等實時天氣資料及預報，而後者則由一名氣象愛好者改良而成的類似系統。earth 最近加入日文版，裏面的漢字應該已經足夠大家明白唔同標示的意思，而後者則跟從系統語言及地理位置，提供更多其他綜合資訊，非常方便。小編有時無聊都會㩒入去開個全螢幕黎睇下，都幾治癒架，哈哈！呢兩個系統就比較適合係打風之前睇了，因為佢地會計算出颱風的預測路徑，可以比大家作為一個參考。
不過大家千其唔好唔記得，香港有「力場」撐起大局，所以係呢度都係勸各位打工仔唔好發咁多夢喇，聽日記住準時返工啊！
