頭先同大家介紹過 Samsung Galaxy Note 5，其實今次仲有另一個主角：Galaxy S6 edge+。呢部號稱為 S6 edge 放大版的新機，究竟係咪只係熒幕放大，機身加大咁簡單？而家就等 Edward 同大家分享一下。
誤觸情況獲改善
無疑，S6 edge+ 係設計上，確實沿用了 S6 edge 的款式，所以先會叫做 S6 edge+。不過既然叫得「+」，就肯定係「巨無霸」版。事實上 S6 edge+ 係採用了比 S6 edge 更大的 5.7 吋熒幕，不過 Edward 覺得之前 S6 edge 係 5.1 吋熒幕上採用了雙弧面熒幕，當單手拿起用時就會比較容易誤觸熒幕邊位；但係 S6 edge+ 上，由於熒幕大咗，呢個情況反而少左發生。至於重量上，無論係從 spec 定係手感來睇都確實係重咗，不過單手使用就都唔覺得重，呢點值得一讚。
▲如果只提單手操控，舊的 S6 edge 確實比較輕鬆。
▲不過由舊 S6 Edge 機身較窄長，拇指同食指之間的虎口位可能會係使用時誤觸熒幕。
▲但 S6 edge+ 的熒幕雖然加大了令單手操控無 S6 edge 輕鬆。
▲不過機身闊了，反而令虎口位誤觸熒幕情況大幅改善。
▲再從呢張相，大家就更見到 S6 edge（左）同 S6 edge+（右）係機身大細上有幾大差別。
▲S6 edge（左）同 S6 edge+（右）係厚度上基本都係無分別的。
側熒幕更實用
如果講到 Note 系列最大特色在於 S Pen，S6 edge 的側熒幕就係呢個系列的獨一風格。不過之前係 S6 edge 上，側熒幕就唔夠實用，只係可以係熒幕關閉時捽開，瀏覽各種提示、時間、天氣等資訊，又或者係熒幕開啟時拉出它聯絡 5 個常用聯絡人。而係 S6 edge+ 上，除了仍有以上功能外，亦加入了 App Edge 應用程式側屏功能，令大家可以更方便打開常用程式，情況就好似舊年推出的 Note Edge 咁。雖然只限於 5 個 APPS 而唔似 Note Edge 咁可以加入更多程式捷徑，不過對於一般用家來講，已經好夠用。
▲今次係 S6 edge+ 的側熒幕，首次加入 APP Edge 功能，令大家可以係呢度快速啟動 5 個用家自選的常用 APPS。
OnCircle 功能玩味居多
至於 People Edge 人物側屏功能，係 S6 edge+ 上亦獲得強化，唔止可以方便聯絡 5 個常用聯絡人，仲加入了 OnCircle 功能。只要雙方均是使用 S6 edge+，就唔止可以快速以電話、視像通話、電郵等方法聯絡對方，更可以向對方傳送 emoticon 顏文字，又或者寫出或畫出簡單文字或圖案向對方傳情。呢項功能確實係夠特別，不過情況就好似 Apple Watch 可向常用聯絡人傳送手繪文字 / 圖畫或心跳等，只係玩味性質居多，講實用性就只是一般般。另外值得一提的是，如果大家要啟動 OnCircle 功能，手機內一定要有 SIM 卡，否則是會啟動失敗的。
▲OnCircle 功能需要有插入 SIM 卡先可以啟動得到。
▲有了 OnCircle 功能，用家就可以向其他 S6 edge+ 用家以不同方法傳情，第一種係 emoticon 顏文字。
▲而第二種就係透過簡單圖案、文字與對方通訊。
▲而點按相機圖示按鍵，就可以即時與對方分享相片，或者不同的繪圖。
下回預告：熒幕、相機質素又點樣？
今回同大家介紹過 Samsung Galaxy S6 edge+ 的手感及它的獨特側熒幕功能，但加大了的熒幕，以及強化防震效果的鏡頭上，又有冇改進呢？呢一方面，就留等下回 Edward 再同大家分享吧！
分享到 :
最新影片
