尋日簡介過 9大蛋黃哥點心 款款都咁可愛，我依莉詩當然急不及待去尖沙咀the ONE 嘅新派點心店－點心代表試食啦！機會咁難得，我仲約埋超級蛋黃哥粉絲嘅 YouTuber 柏力芝 同我一齊玩轉蛋黃哥添！
實物同宣傳相一樣萌！
我諗大家都試過因為望到雜誌 D 靚靚退地相就以為實物都喺一樣，點知去到先發覺走晒樣，就算用盡手機 app 點執都無用。今次蛋黃哥嘅 Fans 就包保唔會失望啦！事關每碟點心上嘅蛋黃哥表情都喺用可食用嘅米紙黐上去，保證個個一樣咁 hea ，唔會走樣。
▲ 梳乎蛋蝦漢堡同宣傳相一樣有菜、有蕃茄、有芝士，最重要喺有蛋黃哥！
▲ 蛋黃哥 hea 完喺漢堡包上，轉個頭又去咗雜菜沙拉上，佢幾時行得咁快架？
▲ 原來仲有隻蛋黃哥哩咗喺沙律後面架！
▲ 蛋黃哥平時最鍾意將煙肉當被蓋，偏偏今次佢就壓住張被，唔通 D 五榖米太硬瞓得唔舒服？
▲ 乖乖食晒 D 飯就可以見到另一隻蛋黃哥啦！
▲ 睇到網上有人搞到蛋黃哥嘔奶，我同柏力芝真喺笑咗好耐。本來想自己試下，不過影得太耐相，凍到唔識嘔了！
唔好掛住影相，熱辣辣先好食！
雖然蛋黃哥真喺好可愛，大家都想同佢地影多幾張靚相。不過梳乎蛋流沙包就一定要襯熱食啦，唔喺就唔流沙架啦！就算梳乎蛋蝦漢堡同梳乎蛋煙肉五榖炒飯都一樣，凍咗就會好硬了。同樣，因為我地玩得太耐，食嘅時候已經凍晒了，所以味道方面，我只能同大家講不過不失啦。
說好的佈置同 Pop-up Store 呢？
除咗野食，應該大家都好關心佈置同限定衣物，可惜我地太早嚟到，仲未裝修好，所以未能同大家報告。暫時只喺見到餐紙換咗做蛋黃哥，不過 15號正式開幕嘅時候，牆上面嘅明星相就會換埋做蛋黃哥沙龍架啦！至於限定衣物到時就會係餐廳左手面有得賣，食完記得去望下啦！
▲ 雖然限定衣物未有得睇，但見到呢個杯墊喺咪好想擁有呢？咁記住除咗叫點心之外，俾多 $20 歎番杯茉莉花茶啦！咁你就可以一睹肥版蛋黃哥風采，之後佢肯唔肯跟你番屋企就要睇你啦！
▲ 另外，呢把心形蛋黃哥扇將會喺尖沙咀街頭隨時出現，如果喺條街見到好多人拎住，就喺你嘅好機會啦！
8月 18日更新
▲ 依莉詩今日經過，牆上貼滿了蛋黃哥海報。
▲ 另一邊窗上都有好多蛋黃哥貼紙啊！
▲ 鋪頭左面有一間迷你 Pop-up Store，只有幾件衫同布袋掛喺度。
▲ 只喺得番黃色同黑色兩款咋！
▲ 布袋質地都唔錯！
講咗咁耐想知柏力芝用咩方法食蛋黃哥落肚？留意 Unwire 嘅短片啦！
点心代表
地址：尖沙咀彌敦道100號 The ONE L3層L308號舖
營業時間：星期一至五11:00–23:00、星期六至日10:30-23:00
分享到 :
最新影片
