Plantronics 推出頭戴式無線藍牙耳機 BackBeat Sense，小編試過真係好舒服，而且貼耳式不嬲俾我嘅印象都係唔好，唔夠密封隔音差，但依隻 Plantronics 音質真係拍得住罩耳式，最貼心的設計就係可以讓用家戴上或放下耳機時直覺式地操控音樂播放，想知多啲即刻睇下以下BackBeat Sense嘅介紹。
BackBeat Sense 有咖啡黑或簡雅白褐色兩款顏色，有別於早前推出罩耳式嘅 BackBeat Pro，BackBeat Sense 係貼耳式設計，相對上一定冇咁焗，加上耳墊高品質嘅記憶海綿，小編戴過覺得好軟熟而且都夠透氣，而包住記憶海綿嘅係蛋白質皮耳墊，真係冇呃人，名符其實係蛋咁滑，戴落係比其他耳機舒服好多。另外，我籮文花名係「大頭文」，戴其他耳機戴一陣就會有緊箍咒一樣，戴到頭痛，而 BackBeat Sense 寛窄度可以有9個刻度嘅調節，加上頭箍位彈性亦唔錯，BackBeat Sense 冇對我唸緊箍咒。
▲頭箍位彈性唔錯
耳機重量只有大約140克，拎上手好輕身，拎出街唔會係負擔。美中不足係 BackBeat Sense 冇得摺埋，比較阻掟，只有耳罩位可以擰平，好在附送嘅收納袋有好靚嘅簡約設計，對於我黎講，佢靚嘅程度真係可以凌駕佢嘅阻掟。收納袋除左放到個耳機，仲有多一格放自己野，雖然唔大，但要放得晒八達通、散紙、鎖匙絕對無難度，就咁拎個收納袋連耳機就出得街，怕咩阻掟呀！
▲BackBeat Sense 冇得摺埋，比較阻掟，只有耳罩位可以擰平，好在附送嘅收納袋有好靚嘅簡約設計，靚嘅程度可以凌駕佢嘅阻掟。
▲會場中放置左一個鎊，證明 BackBeat Sense 重量真係只有大約144克
只要喺右面耳罩位置就可以搵到所有播放嘅控制，包括上一首下一首播放同暫停，而音量操控就係以旋轉嘅方式調教。今次 BackBeat Sense 最突破的功能就是智能的動作操控 Smart Sensor，當用家需要與其他人對話或者有其他事情要做時，放下耳機BackBeat Sense 就會發送暫停播放的指令到手機，相反，用家戴上耳機，音樂就會隨即播放，有電話打入時，戴上耳機亦可以即時接通。小編就即場試過用 BackBeat Sense 配合 Spotify 聽歌，每一下放低同戴上都好準確地暫停同播放，冇 Sense 錯嘅情況。另外 BackBeat Sense 可以同時連接2部藍牙裝置，並隨時於2部裝置之間切換。
▲只要喺右面耳罩位置就可以搵到所有播放嘅控制，包括上一首下一首播放同暫停，而音量操控就係以旋轉嘅方式調教。
「睇車呀！～」，政府宣傳片都有教，過馬路唔好掛住聽歌，但係又除又戴都幾煩，BackBeat Sense 有一個 OpenMic 功能，只要㩒咗耳罩底既掣，就可以啟動 OpenMic，唔需要又除又戴都可以透過耳機聽到由麥克風接收嘅外界聲音，小編試過 OpenMic 功能，唔只聽到，仲要好清，幾乎比就咁肉耳聽得更清楚，所以以後見到仇人戴住 BackBeat Sense 千其唔好以為佢聽唔到就講佢壞話呀，可能佢開左 OpenMic。另外，小編一向都對貼耳式耳機有偏見，貼耳式一向俾人嘅印象就係隔音差，會漏聲，而驚喜嘅係 BackBeat Sense 因為採用嘅記憶海綿夠軟熟，戴起嘅時候海綿有包住對耳仔嘅感覺，一戴上耳都未播歌就 Feel 到隔音效果比想像中好好多，絕對拍得住罩耳式耳機。
▲大會請黎現場觀眾示範 OpenMic 功能
▲中頻人聲表現驚奇地好，聽 As One 嘅 Candy Ball 時人聲好近，好似喺你耳邊唱咁滯。
▲在聽 Armin ban Buuren 嘅 Intense 時前奏嘅小提琴可以聽 BackBeat Sense 高頻延展清?，惟到歌曲中段多種樂器共奏時聲音的空間感略遜。
售價：$1,398
查詢: LRT 2395-3913
