雖然 Walter Chang 本身唔算係非常著名既攝影師或者旅人，但近排小編成日見到佢段「We Call This Home – 3 Years Around the World Travel」片出現係平時睇開既幾個 Travel Bloggers feed 上面，非常之 hit 。近排 Walter 仲係 PetaPixel 分享佢自己既故事，睇完包保你即刻想同老細講：「我要去流浪啊！」(不過都係得個「想」字XD)
「係 2010 年既時候，我已經幾度想辭去工作，去亞洲各地旅行一年先返去繼續做『奴工』。我係 2008 年大學畢業，當時正值全球經濟衰退，我被困係一份從來無打算長留既工作上。」
「亦都因為咁，我開始存更多既錢，我賣晒我大部分既財產，甚至試過係做野既地方住幾個月。當我係 2011 年既 9 月上機個刻，我都唔知我最後竟然會係三年內踏遍六十個國家。」
「我去唔同既學校拍影片，因為學校係唯一最純樸自然既地方，呢個係我想記錄旅行既唯一方式。係去呢趟旅行前我並無太多既拍攝經驗，不過我決定升級 Nikon D700 同藉呢個機會改善。我有一個好初步粗略既想法關於我想拍既短片，於是我亦都寫左張設備 list 去幫我完成呢個短片。」
「我一開始帶既設備有 Nikon D700 同 Canon 7D ，至於鏡頭則有 17-35mm f/2.8 ﹑ 24-70mm f/2.8 同埋 70-200mm f/2.8 VR II 。我仲帶左 CPL filter ﹑ lee filter system ﹑ 3 stop ND soft grad 同埋 Lee big stopper 。我一開始將咁多既設備塞係正常大小既普通背包入面，但之後將相機升級到 D800 既時候我決定將換背包，換左做 F-stop Loka 。另外我亦開始用 GoPro ，我所用既係 Hero 2 ，用黎拍一啲用 DSLR 幾乎無可能拍得到既影片。」
「咁長時間既旅行係每個攝影師既夢想。而我好慶幸我能夠係旅途中涉足到每個攝影類型。從拍攝繁華既街拍，到拍攝野生動物兼 Safaris ，以及眾多既獨特風景。我實在好幸運有咁既機會每日出去捕捉新既事物，累積經驗。」
「一開始令我開心既就係來自不停旅行既興奮。作為一個 budget backpacker ，其中一個最大既好處就係能夠更親近當地文化，而最後更加慳返唔少既旅行成本，更重要既係可以體驗得到一啲獨特既 moments 同埋拍攝佢地。」
「但其實作為 budget backpacker 好多時並唔係最舒服既旅行方式。要揹住一個裝滿設備既沉重背包以及其他行李非常辛苦，仲要不停睇住自己既設備，其實對長途旅行經驗黎講係相當大既不便。」
「其中一個最主要既擔憂就當然係被盜竊。我曾經住過好多旅館﹑搭便車甚至攬住個袋同設備就訓係公園外面。你需要無時無刻既警惕，不過如果 common sense 同直覺話你知你既住宿似乎唔點安全，你就知道呢個未必係一個好想法，咁就唔係住係果個地方。如果你覺得身邊圍住你既人有古怪，就唔係拎出你既相機，直至你感覺到無問題。」
「其實當你認真看管自己既設備，呢啲事真係發生既機會非常低，不過不幸既係盜竊仍然係會發生。就好似我係智利旅行既時候就成為過受害者：經過 24 小時長途旅遊巴黎到卡拉馬，我係等一位朋友黎陪同一齊搭另一間巴士去聖佩德羅德阿塔卡馬。係南美洲好多賊會以群體式出動，一個分散目標注意而另一個就盡快搶走目標既手袋當佢分神既時候。而咁岩不幸就發生係我身上。」
「我既防衛意識稍稍一低，攝影設備並唔係我既面前，結果釀成悲劇。而最慘既唔係無晒設備，而係無晒入面過去個半月工作既相片。我三個 drives 其中一個已經損壞，而我又唔記得將剩低既兩個其中之一放落背包。」
「結果我係警署花左四個鐘用 Google Translate 同警員交代事件，問朋友借左一啲錢，然後用接下來既 24 小時搭巴士返聖地牙哥報失補領返 Passport 再飛。」
「我既不幸意外唔應該係勸阻你帶必須既攝影工具去拍攝。如果怕用佢怕唔見佢，咁你當初又點解要買佢呢？小偷小摸既發生無處不在，而你通常只聽到呢啲唔好既故事。唯一要注意既係，你一定要經常做備份，同埋盡量可以就上傳到雲端，最後更要買保險保障自己。」
「係我既旅行中，我總係各國都會遇到呢類人，願意抽時間帶一個陌生人遊覽佢地既城市 ﹑ 請我食晚餐以及為我提供一個訓覺既地方。我依家覺得好內疚，因為我獲得好多而無作出到任何既付出。呢個亦係我攝影既開始，我將相 up 上 Facebook ，為朋友帶來我旅行既印象，亦令佢地更多出外旅行同分享旅行係佢地既生活上帶到啲咩既正面影響。」
「人們總係對於行唔行出佢地既 comfort zone 猶豫不決。身處係異地，被異地文化 ﹑ 語言包圍其實係幾大壓力。呢個亦就係攝影師化身成『魔術師』既 moment ，因為從本質上黎講我地就係哄騙人。我地用捕捉到既稍縱即逝精彩瞬間靚相，令旅行變得非常有吸引力同充滿冒險，但其實背後仲有好多野並無顯露比其他人睇，未必似其他人所想咁好。」
「係旅途中有好多瞬間都會挑戰我地既生活習慣同觀念，更多時候世界會同我地係自己間房幻想出黎既世界未必吻合。而攝影既好處就在於你可以睇到對方睇事物既唔同角度以及接收方用你既新角度黎睇事物。旅行使我們警覺人與人之間既分歧，但佢亦阻止左我地狹窄無知既想法出現，學識包容多元文化。我相信，攝影有助幫人了解到呢一點。」
「隨著我既影片同攝影書開始接觸到更多我人際網絡以外既讀者 ﹑ 觀眾，去鼓勵其他人將旅行融入佢地既生活中， so far 得到既反應都非常好同驚人，超出左我原先想像之外。我相信呢個就係回報社會既最好方法。」
Walter 既分享就到此為止，完成左呢項為期三年既環遊世界旅行之後，佢目前正籌集資金，將佢既相片集成攝影書推出。如果你想知多啲關於 Walter 既作品或者旅途，又或者想出錢支持佢推出攝影書，就可以上返 Walter 既網站。(請按此)
以下就係 Walter 製作既影片「We Call This Home – 3 Years Around the World Travel」：
來源： PetaPixel
