小妹以前曾經幫一個讀緊小學四年班的小朋友補習，有一日補緊習個陣佢突然開著部電腦，話要俾個 Game 我試玩，我一開始是拒絕的，但佢非常興致勃勃邀請我試玩，咁我最後就玩左一鋪… 😛 個 Game 有啲似以前玩開的《極上沙羅曼蛇》，但係畫面梗係沒那麼精美。我試玩完之後問係咪新遊戲黎架？點知佢答我：「我自己寫架！」。果時覺得佢有書唔讀寫 Game 係「不務正業」，而家諗返其實佢都幾叻仔，咁細個就識得寫 Game 俾人玩。
而家有好多家長都覺得小朋友處於吸收知識的階段，所以俾好多課外活動佢地參加，全力催谷佢地學齊十八般武藝要佢地贏在起跑線上，但係偏偏又冇留意小朋友是否吃得消，同埋係咪真係鍾意學。其實只要多加留意小朋友，培養佢地的興趣，將時間同精力投放入佢地喜歡的事物上，訓練成效可能事半功倍，就以寫 Code 為例，由細到大培養佢地既興趣，好可能會有一番作為呢！就好似我個補習學生咁，如果我而家仲幫佢補習，我一定會同佢屋企人講，我發現佢係寫 Game 方面好有潛質，我會再介紹以下幾款教小朋友寫 code 的工具俾佢：
Scratch 係由 MIT Media Lab 開發的程式語言（Programming Launguge），專為 8 到 16 歲的小朋友所設計，小朋友可以從中學到重要的數學和電腦的概念，同時也學到如何做創意思考、系統化推理、以及與其他人合作。Scratch 主要靠拖曳和組合指令就能寫出程式語言，可以為角色指定動作、配音、轉換場景。Scratch 的自由度很高，雖然有固定的指令，但亦可以手動輸入文字做調整，甚至創造新的指令。
Blockly Games 係 Google 針對 5 到 12 歲的小朋友開發出來的學習工具，也是只需要拖曳圖象就可以寫出程式，不需要輸入文字。Blockly Games 有 7 關，小朋友從不同的關卡可以學到不同的概念。
呢個「CodeMonkey 」其實非常出名，但同上兩個唔同，唔係用拖曳的方式組合指令，而係通過輸入文字，幫遊戲入面的馬騮仔食到香蕉，同實際上寫 Code 的介面相似。一開始就簡單啲，例如輸入「step 15」，操作馬騮仔前進或後退 15 步食香蕉。之後難度會越來越大，例如一次過拎幾隻香蕉、轉彎、同烏龜合作過河等等，可以一邊玩一邊學。
Code.org 在 2013 年成立，目的是為了鼓勵大眾學習程式語言。網站免費提供課程學習資源，也有指南引導老師如何在課堂上使用網站內的資源帶領學生學習寫程式。不過香港好似比較少呢方面的教學，小學的電腦堂都仲係教緊一啲好基本的功能，有業內人士就曾經建議過修改學校的電腦課課程，但香港的教育本來就已經五時花六時變，再改恐怕老師都吃不消，應該短期內都難有呢方面的轉變。
雖然學校暫時冇辦法普及化學習程式語言，但其實坊間對於培養青少年對編程的興趣都做左不少工作，希望可以借此引起學生對 IT 興趣，從而鼓勵更多年輕人投身業界。例如早前的國際 IT 匯舉行期間，Cyberport 就籌辦左 「數碼港編 Code 新世紀 1000」黎推動青少年的 Coding 發展，由過千位學生集體寫 Code 構建未來智慧香港藍圖，而且仲打破埋世界紀錄添，都咪話香港人唔掂呀！
其實而家成個世界都已經網絡化，無論係小朋友的教育還是學校課程都應該與時並進，但無論點都好，當然要以小朋友的興趣為重，強行推谷都最後只會有反效果。雖然而家做 Programmer 都幾吃香，但家長一定要先多了解自己的仔女，再安排合適的活動俾佢地啊！
