小編係第一次以記者的身份參加這類型的活動，論規模、型式及陣容，這次的確是亞洲區最大型的 Startup 盛會！有別於一般的商業博覽，這種搞創意及科技行業的活動，給人一種非常有活力及熱鬧的感覺。以往小編出席的博覽會，參展商通通西裝骨骨，說句話都很有距離感，但這兩天不停逛逛逛、聊聊聊，創辦人都穿上牛記笠記，甚至有點當年大學 O’camp 的感覺，很親切，很 hyper！
▲RISE Conference 節目非常豐富，有即場 Pitching，有擺檔，有講座，仲有投資者聚會… 等等！
小編還發現除了香港 Startups 佔的比例十分高，還有來自金磚四國之一－印度的朋友也有很多！兩天下來，場內有超過 500 間來自世界各地的新創企業雲集香港，大家的目的各有不同，有的要來找投資者，有的要合作伙伴，有的純粹為宣傳，他們各自有一套方法吸引人注視，而令小編最印象深刻有 3 點：
有咁多人，咁多公司在場，想有人睇，奇裝異服少不免。
▲一身機師 look，差咁副黑超呀！
▲佢頸個條巾可以拉上去遮埋塊面架，成套裝備齊晒！
參加展會必定會有的「紀念品」就係 Batch 喇，今次 RISE Conference 有十幾款唔同顏色的 Batch，而小編兩日身上都戴著一個屬於 Media 的綠色 batch，人地一睇到就知我地係傳媒喇，而有趣的事情就發生了！
▲佢手上的並不是 SmartPen，因為真個支只是在構思階段。
我一直係場內走來走去，左看看右看看，突然有人拍我膊頭，仲要大叫我個名（Batch 上面有寫），我以為遇到朋友啦，點知係個陌生人，佢同我講，「我見你拎住本 Notebook 周圍走，覺得你一定對我的產品有需要，我想同你介紹一下！」不好意思，小編份人危機意識比較高，一開始以為係騙案 XD。跟住佢就開始同小編介紹佢支 SmartPen 喇，支筆可以將你寫低的字 / 圖像數碼化記錄低… 講完一大輪，仲問我意見係點添！小編直言，「多謝你介紹支 SmartPen 俾我，但老實講我唔會買，因為我會索性錄音或拍片。」我講完都覺得自己有點太直接… 小編其實好欣賞佢咁主動 pitch 人，雖然我有少少嚇親，哈哈！希望他的 Startup 會成功啦！
同每一間公司傾完之後，小編都會跟他們交換卡片，及幫他們的檔口影相。有一次傾完之後，我就走喇，諗住搵第二間再睇。行開左兩步又有人嗌返我轉頭！
▲佢地好齊心架，一話影相，全隊人企好，有晒隊型。
嗌住我個位就係上圖最左手面的哥哥，佢好有誠意向我介紹佢地間公司－pstakecare。係一間以孟買為主要市場的公司，將醫院裏面的醫療項目分門別類放上佢地個平台俾人格價、睇 review等等，幫病人搵到最適合的醫療服務。開業兩個月已經有 6,000＋病人用過，果然市場大就是有優勝！但最有心思的是他們的卡片，附送一塊膠布：
的確，有如去一趟旅行，活動中，最令人難忘的是人。至於其他節目的安排、流程…真的有待改善。
小編聽到不少人對於講座有很多意見，例如，要花很多時間排隊，但夠鐘的時候，沒有離場安排，變相大家都霸著座位不離開，排隊的人入場後也不能安坐。另外，因為同時四個台都有演講活動，對於入場想多聽幾個講座的朋友來說，就很困難了，除了要取捨，還要每次重新排隊入場。
但整體來說也是一個大開眼界的機會，可以一次過跟幾十個不同國家的人講 Startup，講創意，講科技，希望不久的將來會有更多的類似的機會啦！
P.S. RISE Conference 已經決定於下年 5 月 31 日至 6 月2 日再於香港會展舉辦，下年搞三日，希望會愈搞愈好啦！
相關文章：
Unwire Space 創業：十國Startup 一覽＠RISE Conference
Unwire Space 創業：各國創業風氣 ＠RISE Conference
unwire.hk 作為生活科技網站，一直有報道科技生活之餘，亦有採訪科技創新企業，試透過我們的綿力推動一下香港創業文化的發展，因此推出類似現時流行的 co-working space 概念工作間 – UNWIRE Space。就在我們位於觀塘區的編輯室旁方便我們採訪報導，Co-working space 結合新媒體宣傳力就是我們與眾不同的 unwire.space 了。
