除左《喬望尼之島》，係九展星影匯《日本動畫精選》回憶三部曲嘅另外一部就係《樂園追放》，小編雖然唔睇動漫但都第一眼睇 Poster 發覺：「咁似初音既？」吸引左唔少觀眾入場，比《喬望尼之島》更見熱鬧，不過睇完之後的確抵佢咁受觀眾歡迎，因為實在有唔少值得思考既情節，而又不乏戰鬥元素。想知更多就要睇內文啦！
故事講述現實世界已經落後變成廢墟， 98% 既人類都已經轉去數碼化世界 DIVA 生存，而 Frontier Setter 自我 AI ，決定朝外太空太陽系發展，透過非法途徑向 DIVA 召募自願者跟隨；而 DIVA 系統保安局高層認為這會是個威脅，於是就派三等官 Angela 落地表世界同觀察員 Dingo 一齊追尋呢位黑客既任務。原本無乜了解以為又會係啲普通打鬥故事，但原來啲戰鬥場面主要出現係開首既數碼化世界的電子戰同埋最後既 Frontier Setter 火箭守衛戰。視覺效果既犧牲，換黎卻係更多令人思考既情節，例如：DIVA 世界數碼化人成日覺得自己高人一等，係現實世界呢個落後一代既「進步」，然而 DIVA 人需要不停證明自己對社會既貢獻來換取更多存在嘅記憶體，否則就會被壓縮，真係比較好嗎？「人類」存在係兩個世界，然而定義卻有好大既唔同， AI 有左自我意識，會溝通﹑有感情﹑知道咩係「喜歡」，咁佢同數碼化人類相比又算唔算「人類」？成套電影好多呢類值得思考既情節拋俾觀眾，有一定嘅深度。
戲中講到現實世界既人類喜好就係音樂，而來自 DIVA 既 Angela 唔明點解地表人話「用骨頭去感受音樂」，而男主角 Dingo 就慢慢去用音樂感化 Angela，正正就係配樂成功造就電影既氛圍。而且小編覺得每一首都好好聽啊，當然最好聽就緊係主題曲「EONIAN -イオ二アン-」啦，睇完之後小編特登係手機搵黎聽返幾次添啊！
雖然要戰鬥有戰鬥，要 deep 有 deep ，可惜一套電影時間有限，將唔同元素加入去係一個好好嘅嘗試，奈何比小編感覺有啲兩頭唔到岸。不過亦可以說，為觀眾帶黎更多嘅思考空間，而唔係一切問題嘅解答都由電影對白去交待；而視覺效果上戰鬥畫面嘅犧牲，亦都令部分觀眾可能會覺得沉悶（不過睇住 Angela 應該好精神啵你懂的）。
雖然可能有啲蜻蜓點水，不過小編都係好想推薦呢套比大家睇。對於唔點睇動漫嘅小編黎講，都覺得有深度之餘而又不少戰鬥場面，加上機體設計真係好型，好希望佢會有續集出！
