之前 JAYS 推出了數款耳機，售價抵玩之餘聲底都唔錯，所以引來唔少人留意。不過可能有 wire 民會問：JAYS 係咪得平價耳機揀？其實唔係！最近 JAYS 就推出了可能係現時全球最細的雙單元入耳式耳機 q-JAYS「二世」，究竟用落係點？就等 Edward 同大家分享一下。
雙單元耳機超細佩戴舒適
今次 JAYS 推出的 q-JAYS 是屬於第二代，第一代是 2007 年推出，當時都係屬於全球最細耳機。而今次的 q-JAYS「二世」，亦同樣是暫時擁有全球最細體積的耳機。但唔好以為耳機體積細就唔好聲，事實上 q-JAYS「二世」擁有雙單元設計，擁有全球最細小的雙平衡電樞單元，實在十分細小，而且戴上雙耳，亦因為重量極輕，所以幾乎感受不到重量。而且 q-JAYS 亦設有一套由 XS 到 XL 共 5 款尺碼的矽膠耳塞，更再附送一對 Comply Foam 記憶綿耳塞供用家選用，Edward 就試過，只要選中合乎自己耳道大細的耳塞，戴上去就算跑步都唔甩之餘，亦唔會因長時間佩戴入耳式耳機而導致耳道痛的問題，呢一點筆者就頗為欣賞。
▲耳機單元細細但已內藏了如此多部件，真係好厲害！
雙單元聽 POP、女聲尤佳‧耳機唔難推
今次的 q-JAYS「二世」，承繼上代的聲譽，依然繼續好聲。它採用了全新設計的分頻濾波器，可以將低音揚聲器及中高音寬頻驅動器無縫結合，令它可以既擁有細小的單元，但卻可以某程度上將不同音頻的聲段傳送到雙耳，令用家可以享受到不錯的音色。Edward 亦試用過 q-JAYS「二世」，感覺它的表現十分平衡，可以講低音及高音不算突出：低音潛得唔夠深，高音亦不算極為清脆，所以如果大家想用來聽 rock 或者古典音樂，雖然都算唔差，但表現唔算特別出色。反而如果大家用來聽 POP 流行音樂，尤其是女歌手女聲演譯的音樂，由於 q-JAYS「二世」的中音特別出色，所以表現最為理想。
另外，相信有 wire 民都會擔心 q-JAYS 採用雙單元設計，會唔會好難推？Edward 就配合 LG G4 及 iPhone 5c 試用過，基本上都唔難推，聽歌都算有層次，值得一讚。
耳機設計更耐用
用二千幾蚊買對耳機番來，相信大家都唔想佢咁易壞。JAYS 就考慮過呢一點，係 q-JAYS 新的入耳式耳機上作出了特別設計，首先它的耳機線配備了全球最細的螺旋紋鍍金 SSMCX 連接器，以及鍍金螺旋紋連接口，對耳機線連接耳機時的穩定及耐用度大有幫助。此外，它的耳機線亦採用高純度銅線及 Kevlar 人造纖維製造，而線身更採用高彈性 TPE 物料包裹，加上插頭採用 L 型插頭，線身耐用度高之餘，亦可以有助減低插頭附近的電線折斷的機會。當然，它亦採用了可換耳機線設計，即使不慎弄壞了耳機線，只需要換條線就得，不會整隻耳機報銷。
▲採用可換耳機線設計，即使耳機線壞了都唔洗驚要整隻耳機報銷。
▲耳機線與耳機接駁位配備了全球最細的螺旋紋鍍金 SSMCX 連接器，以及鍍金螺旋紋連接口，對耳機線連接耳機時的穩定及耐用度大有幫助。
▲收藏耳機線時都有個膠蓋保護線頭，以免不慎弄壞，十分體貼呢！
設便攜盒方便保護耳機
此外，q-JAYS「二世」入耳式耳機與其他 JAYS 耳機一樣，設有原廠設計的耳機外攜盒，只要抽出內裡的海棉，就可以將整隻耳機放進去，就算帶出街用，既可以保護耳機，又唔洗擔心唔知放了在哪而不慎遺失。此外，針對手機聽歌用家，JAYS 亦為 q-JAYS 推出了兩條耳控線，只要另外購買，就可以享受到不錯音色之餘，亦可以用來講電話或聲控控制手機了。
▲設有原廠耳機外攜盒，方便外出使用時收藏及保護耳機。
▲JAYS 同時為 q-JAYS 入耳式耳機推出專為 iOS 及 Android 手機而設計的三鍵式遙控器，方便配合手機使用。
售價：$2,999（q-JAYS 音樂耳機）；$399（iOS / Android 專用三鍵式線控耳線）
查詢：Towervision（2553 1151）
Leave a Comment