極幼邊框 + Z3+ 微縮版！Sony Xperia C5 Ultra + M5 外型曝光

Sony 早前已宣佈將會係 8 月 3 日發佈新產品，外間估計應是 Xperia C5 Ultra 及 Xperia M5。今日兩部新機的外形就率先曝光！而家就等我們來睇睇啦。

未見金色機蹤影

首先之前曾經傳出 Sony 呢兩部新機均會 / 其中一部會加入金色機款，但從相片所見，就只得黑、白兩色，金色機仍未見蹤影。但估計如果真係有金色機，應該都同之前 Xperia Z3+ 的金色機顏色差唔多。

Xperia C5 Ultra：超幼邊框勁靚仔

由先出場的係 Sony Xperia C5 Ultra，從相片所見同之前傳聞採用極幼邊框的外形差唔多，根據資料表示邊框只有 0.8mm，配合 6 吋 FullHD 1080p 熒幕、內建單手操控模式及 187g 重量，就算一隻手用都應該勉強可以。至於規格方面，C5 Ultra 採用 MTK 6752 處理器、2GB RAM、16GB 內置儲存空間、1,300 萬像素主鏡頭、500 萬像素前置鏡頭及 2,930mAh 容量電池。另外，之前 C4 的前置補光燈，係 C5 Ultra 上仍然設有，令大家在較暗地方自拍時，都可以有唔錯的效果。至於售價方面，根據俄羅斯網站指大約是 US$340 至 US$360 左右（約 HK$2,652 至 HK$2,808 左右），十分合理。不過估計 C5 Ultra 應該與上代 C4 一樣，不支援防水功能。

Xperia M5：Z3+ 微縮版

至於另一部手機 Xperia M5，可以講得上係 Xperia Z3+ 的微縮版。既然係咁講，唔只外型同 Z3+ 差唔多，亦自然都支援防水防塵功能，級別都一樣有 IP68。此外，M5 同 Z3+ 一樣，不用 USB 保護蓋都可以做到防水功能。規格方面，M5 都係採用 MTK 處理器，更是採用效能不錯的 Helio X10 處理器，令人驚喜。其他規格方面，包括：3GB RAM、16GB 內置儲存空間、支援 microSD 記憶卡擴充儲存空間、2,150 萬 IMX230 感光元件 F/2.2 光圈主鏡頭及 1,300 萬像素前置鏡頭。至於外形方面，M5 厚度只有 7.6mm，與 Z3+ 的 6.9mm 厚度相差不多。

究竟最終 Sony Xperia C5 Ultra 同埋 Xperia M5 係咪真係咁嘅設計？規格又係咪真係咁？大家聽日就知道了。

來源：Xperia Blog