唔知大家平時出入搭開咩交通工具架呢？因為屋企「附近」有地鐵站，所以基本上我都以地鐵代步，雖然真係越來越貴，又成日故障… 但地鐵班次又密，又容易啲預時間，對我呢啲「唔夠鐘都唔出門口」的人來講，真係好方便。其實屋企附近都有好多巴士可以搭嘅，不過由於我腎虧，好容易就暈車浪，加上路面上有太多預計唔到的突發事件，所以有得揀我都唔會揀搭巴士。
雖然我唔鍾意搭巴士，但一直都有裝晒地鐵、九巴、新巴城巴 App，主要都係用黎查路線，冇乜用其他功能。年頭個陣，有新聞講話九巴個 App Update 左，終於識得預報到站時間，但就只限部分路線，對我來說都仲係冇乜用，因為我搭個啲都冇預報。但我記得對上一次睇九巴 App 的時候，我讚過佢終於肯用 Google Map，唔再用核突地圖。
啱啱 7 月個次更新又有「驚喜」，仲要出晒新聞稿，話增設鄰近巴士站的巴士線到站預報服務，睇到 269 條巴士線的到站預報時間。開頭完全係不以為意，可能係我對佢太冇期望 XD，一直都諗住個 App 都係廢廢地架啦，未必準。咁啱早兩日開 OT 夜收工，好攰，就諗住搭巴士返屋企，順便係架車度瞓一陣，去到個站度，貪得意 check 下個 App，睇下我搭個架巴士有冇到達時間可以睇，竟然有！我見到個 App 仲識得實時 Update，覺得都 ok 喎，冇我想像中咁流，哈哈。結果，可能因為已經過左繁忙時間，架巴士非常準時，係預計時間內到達，都幾喜出望外！
九巴仲話今年內會分階段推展到全部 400 多條路線，仲會係使用率高的巴士站，設置電子屏幕，俾市民係屏幕睇到巴士幾時到站。但新巴和城巴就話，到站系統涉及龐大成本，但會研究是否進一步擴展這服務（即係短期內唔會有 =.=）。
我對於九巴呢一種「突然積極」的做法係表示相當歡迎，因為我地實在落後鄰近地區太多喇，早在起碼 5 年前，人地一早已有巴士到站預報系統！報站系統我都費事講，成日都壞機，九巴好似仲停留係手動狀態（？），未搭過嘅巴士真係唔識落車，逼住要成日 check 實 Google Map，跟住又暈車浪；新巴城巴叫好啲，識自動報站，但脫班問題極嚴重，難怪地鐵港島西延線開通之後少左一半人搭巴士。
今次「大躍進」都算係一個驚喜嘅，雖然個技術一啲都唔新，但遲到總好過冇到啦～
分享到 :
最新影片
