OnePlus 於北京正式發佈「Two」旗艦手機，作風跟「One」一樣用了當代頂級規格，而且還加入指紋識別及一些特色設計，想知這部旗艦級手機實際好唔好用就記得要留意初步評測！
感覺太硬 機背物料夠特別
去年「One」俾人感覺同 Find 7 好似樣，來到「Two」設計都係大同少異，屏幕依舊 5.5 吋，但邊框金屬感更強烈，體積差距不大，而機背就有少少弧度，拎起手感唔太舒適，因為邊框厚咗加埋金屬框令感覺好硬，但單手仍算容易操作。至於機背，這次設竹、木、砂岩黑及仿炭纖（凱芙拉）等物料，木類外觀美觀，但質感接近，當中我覺得比較特別都係砂岩黑，原因係凹凸手感特別，二來深色亦較襯旗艦風格。
▲ 雖然 「Two」依舊 5.5 吋屏幕，但新金屬邊框感覺好似比之厚一點。
▲ 機背提供特別材料，例如這部就係「黑杏」。
▲ 底蓋提供砂岩黑、竹、黑杏、酸支及凱芙拉物料。
用 USB-C！有雙卡冇插卡
「Two」其實都有追加新元素，當中最明顯係仿傚「樂1」使用 USB-C 傳輸介面，用新介面係好事，但難為我用唔到 USB OTG 手指抄檔案，同時官方亦未說明會否支持快速充電。（外國網站指出不支援）其次，機旁仲有一個好似 iPhone 靜音鍵嘅物體，實際係快速切換手機模式，分別係靜音及勿擾模式，設計都幾特別。最後，此機可更換背蓋，但卻不支援換電及插卡（One 其實都係），而裡面唯一用處可放入 2 張 Nano SIM 卡，換言之支援雙卡雙待。
▲ 機底採用最新 USB-C 接口，但目前來講唔算普及。
▲ 這個側鍵可用來切換手機模式。
▲機內可插入 2 張 Nano SIM 卡。
搭載 Snapdragon 810 負載暖手
Oneplus向來都係規格先決，因此這次「Two」都搭載當代最強硬件，包括 Qualcomm Snapdragon 810 處理器、4GB RAM 及 64GB 儲存空間，現場執行Antutu 錄得約 53,000 分，成績都好高，但跟之前傳的 63,000 分就有段距離。至於「發熱」情況，我發現跑分期間機背依然會產生熱力，但佢聰明之處係設背蓋設計，熱力唔會迅速傳到蓋上，但缺點係會傳到金屬框，特別右邊會熱較快，溫度大約係「暖手」（估計38 度以上），由此可見所謂的 H-Cube 散熱設計只係把熱力導出來。
▲ 搭載 Qualcomm Snapdragon 810 處理器，於 Antutu 可錄得約 53,000 分。實施 Free RAM 有約 2.1GB ，而 64GB 儲存空間實際可用有 52GB。
▲ 機背頂部依然係發熱來源，但負載時底殼比有即時傳熱。
▲ 熱力沿住金屬邊傳到右側，負載時都會感到暖手。
▲ H2 系統（Android 5.1）風格非常簡單，感覺其實跟 ColorOS 有點相似。
▲ Quick Setting 由頂部例下變成由底拉上，感覺同 iOS 都幾似。
超通透屏幕 但 Feel 唔到
「Two」雖然 Sell 規格，但出奇地屏幕冇升級 2K 解像度，這點官方指係因客戶意見而決定，而這次它們就重點改良通透度及亮度。不過，我現場驟眼睇屏幕感覺同之前差唔多，雖然屏幕係比之前更光，但通透似乎同 S6 Edge 仍有段距離，感覺最多去到 G4 級數。至於顏色，感覺都係微偏藍，而可視角度係普通，因此我認為「Two」屏幕唔算有驚喜。
▲ One Plus 2 屏幕顏色都係微偏藍，感覺跟其他 IPS 屏幕未見大分別。(相機白平衡令 S6 Edge 由黃變紅)
▲IPS Neo 可視角度依然不及 AMOLED 屏幕。
超快指紋解鎖 ！可用「支付寶」
今年旗艦機好多都加入指紋識別，當然「Two」都唔例外，用的更是最新機面鍵設計，即 One M9+ / ME 用果款，而特色都係識辨反應超快，註冊後只要一碰掃瞄器就隨即解鎖，反應跟 HTC 差唔多，比 iPhone 及 S6 都要快。除了解鎖，佢跟 ME 一樣都支持「支付寶」保安功能。
▲ 屏幕下方設指紋掃瞄器，設計跟 One M9+ 的相似，同時可當 Home 鍵使用。
▲ 註冊指紋後，一按指紋掃瞄器就隨即解鎖。
有手動模式！相片「油畫」
這次 Two 依舊搭載 1,300 萬像素鏡頭，數字上好像跟「One」冇變，但實際配置上用了 OIS 2.0 光殼防手震及 Laser AF 對焦系統，某程度感覺好似 LG G3 加強版。不過我最鍾意佢提供「手動模式」，快門可調1/8000x -30秒，而 ISO 最高 ISO-1600。拍攝方面，相機對焦反應再快o左（One 其實都唔慢），反應跟 G4 有得揮，但相片質素我就覺得麻麻。問題在於「油畫」都頗明顯，即使佢放大後細節銳利，但特別係人像「油畫」後就變成「PlayStation」年代的起角 3D 模型 (這是 Vitua Fighter嗎？）
▲ 鏡頭下方多了 Laser AF。
▲ 提供多種拍攝模式。
▲ 手動模式可調 ISO 及快門，快門速度最慢可設 30 秒；最快為 1/8000s 。
▲ 現場環境都幾暗，但「Two」對焦反應都頗快，而且相片曝光等都準確。（可放大收看原圖）
▲ 放大睇就會發現「油畫」都幾明顯。
▲ 睇完相令我想起….
小編 ：頂級 Spec 呢個價算抵玩！
OnePlus「Two」名義稱得上新旗艦，雖然設計多了特別殼同金屬框，但感覺都係純粹換新 Spec，驚喜唔算太大。不過，以 4GB RAM / 64GB ROM 規格來講只賣約 HK$3,000 ($2,399 人民幣) 算係抵玩，試想 Zenfone 2 膠殼機都賣 HK$2,499，俾多 $500 就有金屬框、指紋識辨及 Laser 對焦，而問題只係香港冇賣，想買就要去中國網上店訂購，而且仲要冇 Google Service，因此買前都可要做下功課或等外國水貨。
售價：
$1,999 人民幣（3GB RAM 16GB ROM）
$2,399 人民幣（4GB / 64GB ROM）
分享到 :
最新影片
