Samsung 之前曾經推出平價但採用金屬物料的手機 Galaxy A3 及 A5，當中採用 960 x 540 解像度 4.5 吋熒幕的 A3，都要索價 2 千中，對於有啲人來講都係貴得滯。今日 Samsung 終於推出再平啲嘅版本：Galaxy J5，雖然改用膠殼，但規格強好多，而且售價都係 $1,898，大家要買 2 千蚊樓下手機再唔洗一定買小米 / 紅米啦！
Galaxy J5 採用了 Qualcomm Snapdragon 410 1.2GHz 四核心處理器、1.5GB RAM 及預載 Android 5.1 Lollipop 作業系統，另外 5 吋熒幕亦達到高清 720p 質素，還要是 Super AMOLED 材質，十分重本！另外，鏡頭方面，主鏡頭都有 1,300 萬像素，仲有 F/1.9 光圈，認真唔失禮；而前置鏡頭都有 500 萬像素，光圈都有 F/2.2，自拍質素應該唔錯。最特別嘅係，佢無論後置定前置鏡頭都有補光燈，咁大家夜晚係室外玩 selfie 個時，就唔驚唔夠光成塊面黑哂啦。至於電池方面，容量就有 2,600mAh，對一般用家來講都夠用。
此外，雖然唔洗 2 千蚊，但 Galaxy J5 都支援 4G 網絡，而且採用雙卡雙待設計，方便中港兩地跑或者有兩張電話卡的用家使用。規格上，係平價機來講 Galaxy J5 其實都無乜嘢可以挑剔，唯一係 ROM 只有 8GB，雖然可以插 microSD 卡，但 Google 一日都唔俾大家將 APP 裝係卡度，一日都唔太夠用，所以對於鍾意裝好多 APP 嘅用家來講，就要留意。
顏色方面，Galaxy J5 設有白色及金色，Samsung 會先係聽日推出白色版本，而金色版本就會係 8 月 7 日先正式賣街。唔知呢部平價機，大家又會否心動呢？
分享到 :
最新影片
