正所謂：「不怕神一般的對手，只怕豬一般的隊友。」做 Startup 無論點賺錢，但最重要的反而係點樣搵一個 / 一班信得過、靠得住的隊友同你一齊努力實行計劃。究竟要搵到呢啲隊友，要有咩必備條件呢？
你以為 Startup 請 Chief Marketing Officer 就一定要搵個有好強 Marketing 經驗 / 技能的人黎坐呢個位？現實係呢個世界有越黎越多的 Marketing 方法，除左啲好傳統的 print ad 、電視廣告及擺 Roadshow 之外，仲有好多網上的傳播工具，如 Social Media，banner ad，軟性報導等，而且唔同公司類型亦都有唔同的營銷手法，即便你是 B2C 公司或 B2B 公司就已經好唔同。所以，搵人的時候，要留意返，佢係咪對你間 Startup 有相當的認識，了解整個行業，亦有能力幫到你達到目標。
繼續用 CMO 做例子，點解有啲人會抗拒請大公司入面好有經驗的人入自己間 Startup 做同一職位呢？原因好簡單，就係佢地做慣左大型 Project，未必識用 growth hacking 的技巧，以小搏大，令你的公司做到高速增長，更何況你要求佢地落手落腳一齊參與？所以，有搞過 Startup 的經驗的確會加分。能夠在有限的 Budget 中發揮最大的可能性，有由零到一的實戰經驗，方是適合人選！
Startup 某程度上係 24/7 冇得唞，你地名義上放左工，實際上，腦入面都會諗緊點樣做好啲，甚至真係會繼續揼石仔揼好佢，所以你係會有好多時間同你的拍擋及同事一齊做嘢。如果有個同事唔啱 Channel、唔啱 Key、或者性格上唔夾，咁就會好麻煩，因為你冇咁多時間去處理呢啲糾紛或衝突。所以你請一個返黎的時候，為了保持著高效率及溝通暢順，除左諗佢係咪有能力勝任工作，仲要諗埋佢同個團隊係咪夾得埋，無謂請個人返黎製造問題丫。
小編相信有不少做 Startup 的朋友都會遇到過同樣的問題：不懂得將你的想法「同步」至你的拍擋 / 同事中。譬如說，你哋嘅目標係想砌架車出黎，好似好 Straight forward，好清晰易明丫！但問題係，你冇講清楚想砌架點樣的車喎！跑車定房車？巴士定小巴？Google Car 定 Tesla？各有不同。所以你請個人返黎一定要有共鳴，如果想法南轅北轍，好難溝通喔！
最後，亦都係最重要，就係創業者必須具有的特質：對於理想有熱情，落場的時候有團火。創業同打份工最唔同的地方就係，你無時無刻都會將工作掛在心上，想盡辦法瞓身落去，只求離理想再近一步。創業是艱辛的，有好多制肘、有好多難題、好多冷水，所以有團火先能夠一直走落去。你係，你嘅拍擋都應該係。
有一個強勁的工作團隊是重要的，因為由一個 A 級的團隊去做 B 級的目標，效果一定好過一個 B 級的團隊去做 A 級的目標。人才，方是一間 Startup 入面最重要的資產。
來源：Forbes
unwire.hk 作為生活科技網站，一直有報道科技生活之餘，亦有採訪科技創新企業，試透過我們的綿力推動一下香港創業文化的發展，因此推出類似現時流行的 co-working space 概念工作間 – UNWIRE Space。就在我們位於觀塘區的編輯室旁方便我們採訪報導，Co-working space 結合新媒體宣傳力就是我們與眾不同的 unwire.space 了
