早前 Sony 正式在香港推出第四代 RX100 系列，Edward 眼望手中的 RX100 m2，一直係度諗：「係咪時候 upgrade 呢？」於是就從 Sony 借來手中的 RX100 m4，試用咗幾日，就同大家分享 II 用家試用 IV 的感受啦！
真係值得為新機買新卡？
RX100 IV，相比上代 III 係外形上無乜分別，最重要係升級咗 EVF 嘅像素，同埋加入 4K 拍片及 HFR 慢動作影片拍攝。不過大家要留意，RX100 IV 的 4K 影片所採用的格式，係全新嘅 XAVC S 格式，呢種格式可以話係為 4K 同埋高 frame rate FullHD 影片攝錄而生，理論上會比一般 AVCHD 或 MP4 格式拍出來的 4K 影片好得多。不過問題來了：如果要玩盡 4K 以及 HFR 慢動作影片攝錄，就一定要購買傳輸速度較快的 UHS-I SDHC 卡，而且重要買 64GB 或以上容量嘅卡種！而重點係：呢種卡真係幾貴！64GB 都要 $560 左右，128GB 就更要索價 $850 左近（對比一般 SDHC 卡，64GB / 128GB 只係分別索價 $200 / $500 左右）！
▲上網 check 價就知，一張可以俾大家用到 4K 同埋 HFR 拍片功能嘅 UHS-I SDHC 64GB 卡都要 $560 左右，128GB 自然更貴！
▲相比一般 64GB 卡，都係 $220 左右，真係平一大截！
但好啦，為咗呢兩項新功能，投資買張新 SD 卡，又係咪值得？咁要睇大家啦！我嘅睇法係：RX100 IV 用來拍 4K 片，最長都係拍得個 5 分鐘，真係用手機拍都拍得耐過佢；HFR 慢動作影片攝錄，係就係幾好玩，但最長都係拍得個 4 秒，又真係有啲無癮。而為咗呢兩個 Edward 覺得都唔太成熟又唔算實用（對於我來講）嘅功能，去買張 500 幾蚊嘅新卡？感覺唔太值得。
▲用一般 SDHC 卡，證明係唔得嘅！
▲就算用 UHS-I SDHC 卡，因為容量只有 32GB，都係唔得！
▲Edward 問同事借來一張 64GB UHS-I SDHC 卡，拍 4K 片都係拍得個 5 分鐘……
▲除了時間短，而且仲有過熱問題，短短拍咗 3 分鐘唔到就因為過熱而關機……
▲用測溫槍一試：拍緊 4K 片時握機位都接近 38 度，都慶慶地。大家要知道機身係金屬物料來，所以暖手感會比拿住手機更強。建議係冷氣房、室內或者冬天時先好用（小編 即建議：又或者~~~拿把芭蕉扇來吹住拍？Edward 即答：咪啦，一陣俾人話唔捱得［部機］就樣衰囉！）
▲用來拍 HFR 慢動作影片，就算揀「拍攝時間優先順序」都係拍得 4 秒，真係哂氣……
備註：就過熱問題，Sony 發出以下官方回應，現供各位參考：
RX100 IV相機可以連續攝錄4K影片達5分鐘，超過5分鐘便會自動停止攝錄。
如相機因使用Live View檢視功能或拍攝相片而令機身溫度增加，而隨即開始4K影片攝錄，或會影響連續攝錄的時間少於5分鐘。此外，4K影片攝錄亦會令機身產生熱，用戶只需於拍攝後關機約10分鐘 (25度室溫環境下) ，便可再次攝錄影片。
新感應器對焦爽好多！
咁好啦，既然兩個新功能唔夠實用，咁唯有用 RX100 IV 其他表現作為係咪升級嘅考量條件啦！作為超過一年 RX100 II 用家嘅我，其實都覺得部機好好用，不過對焦速度就總係差少少，每次都係襟落去半秒到先對到焦（光差對比較大的位置），如果對焦係光差對比較細的位置，甚至會有對唔到焦的情況。當升級後，發覺採用全新感應器的 IV 對焦速度真係只有一個「爽」字來形容，對比 II 來講，對焦係光差較大位置基本上係一襟快門制即刻對到，就算對焦係光差較細的位置，都只係半秒左右，未至於去到之前係 II 上對唔到焦的情況。改善了對焦速度，對於大家拍照快速移動物件，或者要一開機即拍，都好大幫助。
▲RX100 IV 對焦速度比起 RX100 II 真係快好多！（以下有片為證）
手感差唔多繼續放到入褲袋
作為 RX100 II 用家，另一樣必試嘅，就係手感有冇改變，同埋係咪繼續都可以放到入褲袋。Edward 測試後，覺得雖然在規格資料上，厚度同重量 IV 係比 II 厚同埋重，但真係拿到上手又唔係太感受得到。至於褲袋 mode，IV 就繼續「成功爭取」入到 Edward 嘅牛仔褲袋，當做 pocket-size 機繼續拿出街 snapshot 完全 no problem！
▲RX100 IV 嘅手感其實同 RX100 II 差唔多。
▲Yeah！照舊繼續放到落褲袋！
自拍超方便
其實上代 RX100 III 的熒幕已經改為可以反至機頂方便自拍個時睇到自己個樣取景，但係因為無咗 hot shoe 位所以 Edward 完全唔考慮升級；今代 IV 繼續飛走 hot shoe 位，小編唯有當 hot shoe 已經永久離 RX100 系列而去而被迫死死地條接受現實，試用個時覺得呢個反芒設計對鍾意自拍的朋友來講真係好有用，作為 II 代用家，確實欣賞 Sony 終於肯用呢個設計（因為其實而家好多機都已經係咁……）。
▲RX100 IV 個芒可以反到俾自己自拍個時都取到景，真係好方便！
▲相反 RX100 II 最盡都係反到咁……
▲結果就係每次玩自拍都要估下估下……
Wide 真係實用過 Tele…
RX100 II 個時 Edward 點解會入手？好簡單：有 28mm wide（雖然都唔算好 wide）、100mm tele、仲有 F/1.8 大光圈，去旅行個時一部機搞掂哂唔洗帶大機同一堆鏡咁笨重。但大家見到 RX100 IV 雖然仍然有 F/1.8 大光圈，但焦距得番 24-70mm，對於影 tele 的用家會覺得「不是味兒」。但我試用後就覺得，與其影遠啲啲（但實際上都唔係差好遠……），不如影 wide 啲啲！尤其是好似 RX100 呢類 snapshot 相機，係朋友 gathering 或者婚宴喜慶場合，要玩 selfie 又無自拍棍係手（又或者係唔用得嘅場合……），就算手幾長，唔夠 wide 就係唔夠 wide，就算塞得哂十幾個親朋好友入鏡，但有啲個頭細到要召喚「梁國雄議員」就唔係咁好啦。相反 RX100 IV 有 24mm wide，就算十幾個朋友一齊自拍都可以影到個個清晰（起碼唔洗用放大鏡先啦），又或者 selfie 加靚景時都可以影多啲景入鏡，所以 Edward 覺得 Sony 寧取 wide 放棄 tele 是頗正確的決定（要 tele 大家會自動波走去買 RX10 II……）。
▲RX100 II（上）係就係比 IV（下）影 tele 遠少少……
▲但 wide angel 來講，RX100 IV（下）擁有 24mm，始終比 II（上）只得 28mm 實用好多！
▲就算用來 selfie 或者 groupie，拿個景都 wide 啲靚啲啦！
EVF 真係靚過睇芒！
還記得上年出 RX100 III 個時，Sony 決定放棄 hot shoe 寧內建 EVF 個時，個種想升級嘅感覺即時無哂，因為 hot shoe 真係對於 Edward 我來講好有用，想插閃燈可以，想加 EVF 亦得，甚至拍片個時想插機頂咪收音都得，使用上彈性好多。去到 RX100 IV，繼續飛走 hot shoe，令我不能不接受現實，於是就睇下個 EVF 有幾把炮。唔睇猶自可，一睇真係嚇死咗：乜個效果咁清咁靚呀？！再睇番資料：成 236 萬像素，比起 3 吋熒幕嘅 123 萬像素真係高好多，怪唔之得個仔細度高咁多啦！
▲RX100 IV 嘅 EVF 成 236 萬像素，比本身個芒嘅像素仲要高！
▲真係好靚好仔細！
至於 EVF 有咩好？其實有時係陽光猛烈、又或者光源複雜（例如：Disco、演唱會等）嘅環境下影相，睇芒可能會唔夠清楚，呢個時候 EVF 就可以令大家睇清楚自己影緊乜，同埋唔洗用手遮住個芒頂都可以調較到唔同嘅影相設定，感覺就似玩緊單反 / 無反咁。既然係咁，可能我都要學習下放棄 hot shoe，活用 EVF 了。
▲有 EVF，係陽光猛烈或光源複雜嘅環境下，都唔洗驚睇唔清影緊啲咩。
▲相反 RX100 II 無內置 EVF，係陽光猛烈的情況下要用手遮住先睇到芒。
DR 闊咗對成像有幫助
之前係 RX100 IV 全球發佈個時，我哋編輯部同事天恩都提過，呢部機嘅 Dynamic Range 可以達到 EV-2 至 EV19，以前嘅 RX100 II 就無咁闊，雖然呢個係 1 吋 sensor 天生 Dynamic Range 窄嘅因素，但 RX100 IV 確實改善咗，不過感覺就唔算極為明顯。從下圖大家就見到，用 RX100 II 同埋 RX100 IV 以同一設定影日落同埋燈泡，暗位細節上 RX100 IV 的成像確實出色少許。
但大家可能會覺得：咁好似無乜幫助咋喎！小編於是就唔執著於用同一設定，而係用同一光圈、感光度及同樣關閉 DR 影背光相，發覺 RX100 IV 的闊 DR 確實對成像好有幫助，尤其是係影光差極大的場景時，可以影到更漂亮、背景唔會黑哂或爆哂光，而主體又清晰嘅相片，對提高 snapshot 質素真係有好大幫助。
▲用 RX100 II 影燈泡（1/800，F/1.8，ISO 400，DR：關），可以見到只係燈泡同埋周圍清，但背景的細位只係隱約見到。
▲但用同一設定，以 RX100 IV 同樣影燈泡（1/800，F/1.8，ISO 400，DR：關），背景牆的細節位雖然唔算極大分別，但都叫做睇到多少少細節。
更改了的 Fn 介面睇唔慣
每個用相機的用家，相信接觸得最多肯定係快速轉換設定的 Fn 介面。RX100 II 的 Fn 介面，Edward 覺得係咁多部之前玩過嘅相機入面最靚最易用嘅一個：襟入去，左右揀想轉換的設定，然後透過 Dial 或者控制環調整數值，而熒幕展示出來嘅係一個弧形漸變介面，真係好型仔；但去到 RX100 IV，Fn 功能目錄改為上下兩行，每行 6 項的設計，雖然可以調整嘅項目多咗，但係就無咗弧形漸變介面，感覺好唔慣，同埋無咁型仔。唔知大家點諗，但我覺得呢個改變，核突咗。
▲RX100 II 嘅 Fn 介面，真係易用兼型仔。
▲相比 RX100 IV 嘅 Fn 介面，雖然可加入設定多咗，但無咁型囉。
ISO 感光度對比（按圖可放大）
▲試相原相（紅框位為下面放大位）。
RX100 II vs IV 實拍比較（按圖可放大）
▲RX100 II：1/400；F/1.8；ISO 400
▲RX100 IV：1/400；F/1.8；ISO 400
▲RX100 II：1/60；F/3.5；ISO 1600
▲RX100 IV：1/60；F/3.5；ISO 1600
▲RX100 II：1/25；F/1.8；ISO 400
▲RX100 IV：1/25；F/1.8；ISO 400
▲RX100 II：1/20；F/1.8；ISO 1600
▲RX100 IV：1/20；F/1.8；ISO 1600
▲RX100 II：1/8；F/1.8；ISO 1600
▲RX100 IV：1/8；F/1.8；ISO 1600
RX100 IV 實拍試相區（按圖可放大）
▲1/60；F/5.6；ISO 400
▲1/250；F/5.6；ISO 200
▲1/125；F/2.8；ISO 200
▲1/400；F/5.6；ISO 200
▲1/125；F/5.6；ISO 200
▲1/60；F/5.6；ISO 400
▲1/500；F/5.6；ISO 400
▲1/160；F/5.6；ISO 400
總結：「整體都進步咗•為闊 DR 換機？」
整體來講，試玩過 RX100 IV 幾日，Edward 都已經接受咗 hot shoe 從此與 RX100 系列永別嘅現實（編按：係啦，你講過好多次啦，煩！！）。不過 RX100 IV 換咗成套感光元件，變身為 Stacked CMOS，配合 Bionz 相片處理技術，唔止對焦同我手中嘅 RX100 II 相比快咗好多，出來的相片真係幾見得人，顏色都自然咗靚咗，甚至可用 ISO 似乎都升到去 1600（之前速試時測試時間短，而且可能係 demo 機，所以當時話可用 ISO 只係去到 400；但而家拿到賣街真機似乎表現提升咗，可用 ISO 亦升至 1600），影夜景真係一流！
先唔講 4K 同埋 HFR 拍片（其實 Edward 都唔係幾用呢兩樣功能，前者拍得個 5 分鐘，後者又只係最長得 4 秒，仲要有過熱問題 Orz……），單係 DR 闊咗咁多解決咗 1 吋 CMOS 一直以來嘅死症，已經係一個說服到自己說服到人哋，好值得升級嘅理由！不過問題來了：RX100 IV 機價超過 7k，Edward 嘅 RX100 II 賣出去二手都係得 2 千幾 3 千頭……呢一刻真係想大叫：你XX，哪有錢？嗚哇！
售價：$7,280
查詢：SONY（2345 2966）
分享到 :
最新影片
