數碼港女週記：黑暗中有光明

上星期六去左參加一個講新聞自由的講座，當日有九位講者，對我來說係星光熠熠，有傳媒老闆s，有資深傳媒人，有專欄作家等等。講座 overrun 左成個鐘，但原本我趕住走都決定要坐到尾，因為座上客仲有議員s，大律師s，同埋一班 make sense 的觀眾。個日一路聽的時候，我一邊想 share 俾各位讀者，因為連我都有感而發～

▲明報前總編輯劉進圖留意到當日活動的 Backdrop 就好似新媒體的前景咁，有陰間處，但也有光明。

 

能力愈大，責任愈大？

當日有好多位講者都有講做記者人工真係好低，以及網媒的出現對於成個傳媒生態有莫大影響。其中陳惜姿就以專欄作家的身份咁講：

網媒比起傳統紙媒，的確可以接觸更多的讀者，但有更大的掌聲的同時，亦迎來更大的壓力。

佢所講的壓力係咩呢？就係人人都可不具實名地發言，變相可以不負責任地做鍵盤戰士。你當然可以理性討論，可以好「謙謙君子」咁進行 《才子 vs 道長》 大戰啦，但更多的情況，係大家都唔覺唔覺咁被人性的弱點支配，任意謾罵／中傷／唱衰人，造成網絡欺凌。而且所有留言係一般情況下，全世界都睇到，唔會 Auto-hide 的，仲會伴隨住篇文章一生一世，次次 search 都會見到。作家好可能就會因而自我審查，無法我手寫我心。

網絡新世代，有危就有機

雖然講到好似好灰咁，但事情通常都有另一面，明報前總編輯劉進圖當日就有講到，傳媒係面臨很多有關自我審查的問題，但有危就有機，都唔係話冇出路的。佢舉左 5 點出黎：

1. 全民皆攝，令新聞審查／刪改更困難
2. 網絡 24 小時運作，而且所有野都數碼化，世界已經不能阻止記者／手握新聞資訊的人自行上載及傳播消息
3. Agenda setting 已經逐漸 fade-out，因為新聞傳播的方式改變左，讀者的權力變得越來越大，相反編輯的影響力下降
4. 以往你以為抽廣告就可以嚇唬你，等你無法經營，事實係傳媒已經分散投資，廣告收入可能係由 Google／Youtube 分成而來，點抽？
5. 係新媒體的世界，網民可以很容易聚集，你可以一夜成名，同樣亦好容易身敗名裂

做網媒？哪有錢？

網媒的出現，的確係改變左好多我地獲取資訊的習慣同方法，更令我地每日都係海量的資訊中浮沉。但係網媒的經營並唔係大家想像得咁容易，主要的原因係大家越來越習慣免費睇新聞，大家都理所當然地接收垂手可得的資訊，先唔好話做記者又要樣樣識但人工低，成間公司更要另闢新徑搵收入來源，但就連靠廣告收入都越來越難維持生計的情況下，究竟仲可以有咩新出路支持網媒的營運呢？唔通真係要靠捐錢？網媒真係要絞盡腦汁，諗諗佢喇！

都係舊酒新瓶嚟啫！

有時我都覺得個世界變得太快，我地未來得及適應各種改變，追唔切世界的進步。雖然話就話而家「暴力發展」的是「新」媒體，好似如臨大敵咁，但其實作為讀者，我地可以做的，同以前對待傳統媒體基本沒有分別，都係只有不斷提升自己的批判思考能力同埋公民素養架啫，大家一齊努力啦！