GoPro 發表全新 HERO4 Session 攝錄機，外形更細，唔洗加裝外殼已經防水，如果你都想知「骰仔」攝錄機好唔好用就記得唔好錯過。
GoPro 產品向來都係四四方方一個盒，但這次 HERO4 Session 設計就改成一粒「骰仔」，體積重量都比之前少約一半，而且新機設計已經原身防水，唔洗好似之前咁要加防水殼。雖然「骰仔」咁細攜帶輕便，但如果間唔中會手持拍攝，我就覺得 Session 有點太細頗難拎，因此考慮得 Session 都預料係夾配件使用為主。
▲ HERO4 Session 體積上比之前 HERO4 Silver / Black 細好多。
▲ 原身支持防水，可下潛 10m 水深。
運動相機一直以來都係 Sell 簡單使用，而 HERO4 Session 就將操作方式再度簡化，機上改到只剩 2 顆按鈕，分別係機頂錄影鍵及背面功能鍵，而狀態就由機頂 LED 顯示。錄影只須按一下機頂鍵，按實 3 秒就變成連拍（Timelapse）相片，而此機拍攝設定須靠手機 App 上更改。
▲ 機頂設錄影鍵及提供 LED 顯示屏。
▲ 背面的屬功能鍵。
▲ 機旁設 MicroSD 卡槽及 MicroUSB 充電接口。
小編 今日係發佈會花最多時間就係把 HERO4 Session 跟手機配對，因為唔睇說明書幾乎唔會知點搞。首先亦係最重要！就係按實錄影鍵 8 秒原來係 Reset 部機，其間 LED 又唔會有任何顯示，這點都幾詭異（連接過的 HERO4 Session 須 Reset 才可重新連接）。Reset 完就可跟步驟連接，第一步係用藍牙去設定 WiFi SSID 及密碼，第二步才正式用 WiFi 連接 HERO4 Session。
▲ Reset 後才可重新設定 WiFi SSID 及密碼，不然就會永遠配對不到。
HERO4 Session 錄影質素方面，我覺得拍片部分非常唔錯，發佈會現場低光複雜光源都可維持到正常曝光，影片細節都唔會「矇查查」，但試過不同選項都係 1080p 60p 最佳。相片方面，此機可拍攝 800 萬像素相片，不過超廣角下都唔預期質素特別好，而問題在於「油畫」頗嚴重，因此評級都係「純記錄」水平。
▲ 最高支援 1440p 解像度拍攝影片，其次還新增 Superview (4:3) 的特闊模屬。
用得 GoPro 當然唔少得配件，而今日發佈會上就展出多款新配件（適用於 HERO4 Session），包括有「Floaty（浮水）」、「WindSlayer (隔音)」、「The Strap（多用途腕帶）」及可跟 GoPro 組合成航拍機的 3DR Solo（非官方）。此外，GoPro 亦為入門用戶加推 HERO+ LCD，顧名思義機背多了 LCD 可睇返實時畫面。
▲ HERO+ LCD 主要多了屏幕，而且支援控控操作。
利申小編 冇玩極限運動，因此我對 GoPro 這類運動相機興趣不大，雖然機比機 HERO4 Session 重點係加入原身防水，而新配件令用途上可以囊括不同運動類型，但關鍵係視乎用途，我諗較少人買到自拍吧！如果你問我意見，我會鍾意 HERO+ LCD 多一點，有芒始終感覺比較方便。
售價：$3,200
查詢：Microworks (2950 0348)
