之前係 Amazon 有預訂第 3 代 Paperwhite 電子書，今個月都應該陸續送到府上，想買又冇訂到？最近有舖頭都訂咗返來，想知今代 Paper White（2015）值唔值得入手，等連自己都想買嘅小編 幫大家試真下！
外觀冇變 日版多了廣告版？
小編 借來的 Kindle Paperwhite（2015）屬日本版，包裝以日文為主，對於唔多識日文o既我只知佢係一部 Paperwhite，但係咪「廣告版」就連借俾我間舖頭都唔太清楚（sosad）。包裝裡面只有 Paperwhite、1 條 USB 線（充電）及 2 部多國語言說明書，部機外觀同上代 Paperwhite（2014）幾乎完全一樣，重量亦差唔多（新機 205g 舊機 213g），唔睇包裝實在難分新舊型號。
▲ 外觀上跟去年的 Paperwhite（2014）完全一樣。
▲ 機背都冇特別改變，但橡膠質地容易印上指紋。
▲ USB 及開關已經設於底部。
▲ 盒內其實只有 Paperwhite 及 USB 線。
▲ Paperwhite 同手機比都唔算好大部。
▲ 廣告版待機時會顯示 Amazon 廣告，但不影響平時閱讀。（在網上訂購時可選擇廣告或冇廣告版，在日本 Amazon 訂購的話價錢會差日元$2,000）
300ppi 完全冇起粒！
外表分唔到，但開機後就會一清二楚，因為 Paperwhite（2015）屏幕明顯更細緻，並冇去年借同事部 Paperwhite（2014）睇有種唔夠清晰嘅感覺，現在把字體調到最細都很銳利！其次，我亦覺得背光感覺都增強咗，開到最光都拍得住手機亮度，不過在房裡關燈開一半背光都已足夠閱讀。
▲ 全新 300ppi（1,440 x 1,080）屏幕， 即使看最細 Font 的文字都仍然很銳利。
▲ 開關屏幕背光的差別。
▲ 關燈後把背光調至最光會覺得光到有點刺眼。
反應快咗啲 有新 Fonts
畢竟 Paperwhite 只係要來睇電子書，即使去到 Paperwhite（2015）介面都同之前差唔多，只要登入 Amazon 賬戶便可從雲端下載自己的書籍，300ppo 屏幕睇書固然更舒服，但原來新機還加入一款 Bookerly 新字體，其次硬件上亦升級到 512MB RAM，操作反應好似更順暢，或許最實際係試下上網。老實說速度都係麻麻，但我覺得尚可接受，而問題仍然係間中會出現彈 App 情況，因此娛樂用途大家還是用 Tablet 或 iPad 吧！（專心睇書..）
▲ 新機另一特色係新增 Bookerly 新字體。
▲ 操作介面跟之前的 Paperwhite 大同少異，但操作反應就順暢一點。
▲ 有多國語言介面，但唯獨冇繁體中文，只有簡體中文選項。（反正都係用英文）
▲ 用內置 Experimental Browser 都可以照常上網，速度麻麻，而且仍是會間中彈 App。
小編 ：睇書冇得頂！我都要課金！
小編 上年都掙扎過買 Paperwhite (2014) 定 iPad Mini 2 來睇電子書，但最終兩部都睇唔啱（當時偏愛高 ppi 的 Voyage 但太貴），直至 Amazon 再推新 Paperwhite (2015) 屏幕 ppi 竟追上 Voyage，而且設計、價錢都冇大變動，感覺就好似免費 Upgrade 咗咁，當然電子書唔係每個人都睇，但對睇書人來說 Paperwhite (2015) 絕對係抵買實用！
售價：$1,180
查詢：三禾電氣（2374 0618）
分享到 :
最新影片
