《Ultra Q》由 1966年播出到依家已經差唔多 50年，超人家族既成員亦愈來愈多，無論係超人阿鄉、七星俠、佐飛、ACE，總有一個係你既兒時回憶。由 7月9日至 12日，一連 4日係亞洲國際博覽館就會舉辦「ULTRA HEROES ACROBATTLE LIVE IN HONG KONG 2015」。依莉詩就率先去左呢個以超人做主題既互動遊樂場。
10大互動展區
未夠鐘睇舞台劇，小編就先去 Hall 9 同 10 睇下有咩玩先。Hall 9 主要係互動展區，入面最注目既就係 7米高既超人 ZERO 同黑暗超人貝利亞巨型裝置，仲有 1:1初代超人、1:1 超人七星俠、1:1 巴魯坦星人、 1:1 紅王 同 好多 Q版超人、怪獸等緊同大家影相。此外，只要買一隻戰機手錶就可以一邊玩入面既遊戲一邊儲積分，儲夠 100,000積分就可以換取紀念品。可惜小編去到既時間 Hall 10 仲未整好，所以無相俾大家睇，估計入面會有 ULTRA HEROES 既 Pop-up Store，售賣全球限量版 ULTRA HEROES 珍藏模型、超人壁燈同超人印花 T恤等，仲會有 ULTRA HEROES 主題攤位。
▲ 除左入場費，要玩遊戲就需要購買一隻戰機手錶，每一個遊戲都會收取一定既光力。
1) 超人怪獸介紹區
對於超人知識貧乏既小編來說，個個超人同怪獸都好似差唔多，嚟到超人怪獸介紹區就可以惡補一下。呢度展示左會係舞台劇出現既 24個超人同怪獸既名同資料，睇舞台劇之前要好好認下邊隻大邊隻先得。
抵玩度：★★★★☆
光力：0
積分：0
▲ 係嚟呢個展之前，小編唯一認識既只有超人迪加呢！「銀河唯一的秘密，天際最強人物…」
▲ 另一邊就係嚟自唔同星球既怪獸。
2) M78 星雲機密館
再行入少少就係 M78 星雲機密館，呢度展出左超過 100款絕版珍藏、不同超人系列電影道具戲服等。只要拎住 iPad ，將鏡頭對住展品，螢幕就會出現相關既資訊，無論對超人熟唔熟悉都可以慢慢睇下超人系列既演變。
抵玩度：★★★★★
光力：0
積分：1000
▲原來唔同系列入面，地球保衛隊用既槍都唔同架。
3) 超人實感錄影廠
鍾意影相既朋友就一定要去超人實感錄影廠，入面有 4個超人打怪獸既場景，每個超人同怪獸都係 1:1 身高，你同最多 4個朋友可以走入去幫超人一齊打怪獸呢！
抵玩度：★★★★☆
光力：9
積分：10000
▲ 巴魯坦星人入侵香港，超人迪加嚟到保護我地啊！
▲ 超人七星俠大戰艾雷王呢個經典場景，連小朋友都要企定定影埋一份呢！
4) 宇宙迷你天地
如果小朋友怕同逼真既怪獸合照，咁 Q版既就應該唔驚啦掛？宇宙迷你天地就有多個同小朋友差唔多高既 Q型超人同怪獸俾大家影相，隻隻好可愛架！
抵玩度：★★★★☆
光力：0
積分：0
5) 地球防衛隊戰車
卡通片入面，地球防衛隊除左戰機有型之外，其實戰車都係佢地既重要工具，唔少超人都係入面變過身呢！
抵玩度：★★★☆☆
光力：0
積分：0
6) 超人格鬥特訓專區
超人格鬥入面包含左唔少彈跳等特技部份，係超人格鬥特訓專區地下就有張彈床，方便係就出高難道動作。就係你同最多 5個朋友彈跳既一刻，會有多部相機 180度捕捉最型既一面，拍下既立體相片仲會係 1小時後 send 番俾你添！
抵玩度：★★★☆☆
光力：24
積分：20000
7) 超人專門動作令
唔少人都會模仿超人既動作，而呢個遊戲就係要睇下你模仿得幾似啦，愈似既分數自然愈高啦！
抵玩度：★★☆☆☆
光力：9
積分：0-20000
8) 貝利亞魔爪
貝利亞魔爪就係一部巨型夾公仔機，只要夾到咕臣都可以換取相應禮品，不過其實都幾難夾架！
抵玩度：★★☆☆☆
光力：18
積分：0-20000
舞台劇其中一部份講到巴魯坦星人入侵香港，你同最多 3個朋友可以一齊就螢幕面前幫手收拾巴魯坦星人啊！
抵玩度：★☆☆☆☆
光力：9
積分：0-20000
10) 反斗銀河
反斗銀河入面有三個吹氣裝置，包括滑梯同彈床，每一次可以有 1位成人同 1位小朋友入場，每節 20分鐘。
抵玩度：★★☆☆☆
光力：27
積分：0
依莉詩後感
坦白講，小編對超人沒有太大興趣，要山長水遠去到亞洲國際博覽館真係有 D 難道。雖然入面既遊戲部份係俾小朋友玩，如果一家大細俾完入場費再要逐個遊戲俾錢，應該會令唔少父母卻步。不過，呢度展出既超過 100款絕版珍藏同埋 Pop-up Store 既限量品精品，相信已經可以吸引到唔少超人迷入場參觀。
真人舞台劇短評
作為 2015年最新既鹹蛋超人舞台劇，故事延續左上一套電影既發展，講述邪惡超人貝利亞被超人 Zero 打擊後，借地球防衛隊既成員翻生報仇。
現場效果夠逼真
舞台劇同電影唔同既就係現場感，今次舞台劇除左噴火、射燈等效果外，仲加入左 3D Projection Mapping 技術。每當超人攻擊既時候，背景都會有光束等射出，睇落十分逼真。
大量高難道體操動作
既然係超人打怪獸，舞台劇當然唔少得大量打鬥場面，令人驚喜既係，除左借位交手，踢腳、揮拳之外，仲加入左大量高難道體操動作，令打鬥場面更具觀賞價值。
以香港作為戰場
雖然舞台劇係全球巡迴表演，但當中特別加入左香港既場景，而且連警車既聲音都係香港既警車聲，睇落多左一番親切感。
廣東話配音岩小朋友
起初小編以為舞台劇係日本加中文字幕，但原來係以廣東話配音。雖然呢點可能會令唔少超人迷失望，而且有點突兀，不過廣東話配音同舞台劇中間幾次呼籲現場觀眾舉手以收集光之力量，可以令小朋友更加投入。
Leave a Comment