仲記唔記得以前小息係圖書館成班朋友圍住一本書，係一幅幅好多人仔既插畫入面搵 Wally 呢？大家還記得那種搵到 Wally 既快樂嗎？其實一切都可以好簡單、好純粹。就係今日到 8月9號，英國大冒險家 Wally 同佢一班朋友從繪本跳左出，化身立體裝置出現係海港城。今日小編就實地考察一下，到底 Wally 去左邊呢？
《Whare’s Wally？》系列入面最難既一關係要係數個 Wally 入面，搵一個只著一隻鞋既 Wally 。而今日小編一去到海運大廈露天廣場就見到好多本立體繪本，其中一本仲霧出左 48隻 Wally 啊！每一隻 Wally 既神情都唔同，形態各異，好似發現新大陸咁興奮。但到邊一隻先係真正既 Wally 呢？
▲ 原來 Wally 28年來一直係書中世界遊歷，但有一日，佢係威利國唔見左隻鞋，點知搵搵下就嚟左香港啦！
▲ 仲唔快 D 搵下 Wally 係邊？
▲ 記住啊！真正既 Wally 係著得一隻鞋架咋！
眼見呢度咁多 Wally 熱愛旅行既真人版 Wally 更遠道而來同粉絲見面。佢更打算把握今次機會，到山頂、淺水灣同天星碼頭等景點大冒險，將香港成為佢既快樂國度之一。
▲ 作者既摰友兼經理人 Michael Gornall 更從英國嚟到香港，同小編大談 Wally 既秘密啊！
Michael Gornall 帶小編嚟到海港城既美術館，呢度唔單止有作者馬丁‧漢福既工作枱，更有佢從未出版、自薦去出版社既畫稿、兒時創作同珍藏，揭開作者創作 Wally 既靈感之泉。
▲ 作者既工作枱放滿佢最愛既音樂、電影同模型公仔，可見呢一切都有 Wally 幽默既影子。
▲ 原來係 Wally 未延生之前，作者已經鍾情畫好多好多人仔係同一幅畫度。
▲ 最初設計既 Wally 原來係咁既樣，同依家都差唔多。
▲ 另一邊廂仲有《Whare’s Wally？》系列既 7本繪本，有成 72個群眾場景俾你慢慢搵！
海港城美術館入面仲有好多 Wally 既精品等你帶番屋企。除左有砌圖、繪本、遊戲卡等從英國空運到港既精品，仲有唔少為今次展覽設計既限量精品，例如： Wally 同 小狗 Woof 既限量 Figure、紀念杯、紀念碟等。
▲ 除左有做工精緻，有 6個關節可扭動既 Wally Figure 外，仲有單色既小狗 Woof Figure，每隻 $550。
▲ 用紅白藍為主色既香港版明信片，每一張都有 Wally 等你搵佢出嚟啊！一套 10張 $160，單買就 $20張。
▲ 香港版既瓷碟將香港既紅白藍袋條紋同 Wally 衫既紅白條紋結合，非常有特色。而另一隻就融入左冰室隨處可見既紙皮石圖案，勾起大家對舊日香港既回憶，一套 $320。
▲ Wally 遊香港既紀念杯一隻 $200，一套$300。
走到港威商場既地下走廊，有一條 Where’s Wally? X MINI 快樂跑道，5架 MINI 都為 Wally 同佢既朋友度身訂造，色彩繽紛。商場仲有活動，只要上網答兩條問題就有機會揸其中一架遊香港一日添！
▲ 每架 MINI 旁邊都有 Wally 或者佢既朋友呢！
▲ 每架 MINI 既車牌都有名啊！
行左咁耐，小編都肚餓啦！海運大廈地下既 PizzaExpress 變身成為 Wally 限定店。除左 3款限定美食外，更有多個 Wally 藏身店內，只要搵得晒佢地，仲會有紀念品送添！
▲ Wally 最鍾意就係食 Pizza 。今次呢個仲要係由車厘茄同水牛芝士做出紅白橫間，食落口感清新。
▲ 芝士蛋糕下用了山莓果醬畫出紅白橫間，再用可可粉灑上 Wally 既頭，特別之餘蛋糕又香濃幻滑，睇得又食得。
▲ 主題餐廳永遠都唔少得一杯有卡通人物主題既咖啡，今次亦唔例外呢！
搵左成個商場，小編終於係海運大廈露天廣場搵都少左隻鞋既 Wally 啦！呢個遊戲雖然簡單，但搵到之後又真係好有滿足感呢！ 原來快樂真係可以好簡單。
▲ 各位 Wire民都嚟一齊尋找快樂啦！
