其實自從平板電腦愈來愈普及之後，好多人都寧願買部平板作為日常生活隨身攜帶的裝置。不過由於 OS 及使用習慣關係，手提電腦始終有佢嘅價值。HP 昨日就推出了走大眾化路線而且可以「扭芒」的平價手提電腦 Pavilion x360，$4,599 的機價係咪抵玩？以下有更多資料：
機身幾靚但幾重
HP Pavilion x360 機價係幾平，5 千蚊唔洗已經買得到，不過佢並唔係走輕薄機路線，因為 11.6 吋熒幕的機身都有 1.46kg 重，小編單手拎起一陣都覺得好重，如果大家想買部成日拿得出街的電腦，呢部未必係心頭好。不過機身設計就幾靚，磨砂機面摸落手感好好，而且粉紅色同 Tiffany Blue 機殼都幾吸引到青年人，尤其是少女的眼球！鍾意靚機的朋友，應該會幾 like！
▲Tiffany Blue 的機身，相信應該迷死唔少女士吧？
▲採用磨砂機面，手感都算唔錯。
▲唯一缺點係部機都幾重，小編好勉強先可以單手拿起部機……10 秒咁大把！
可扭「芒」似 Lenovo Yoga
x360 另一個特點，就係好似 Lenovo Yoga 系列手提電腦咁，可以扭動熒幕角度，令用家可以有唔同的使用模式，包括：正常使用、平放使用、A 型使用或平板模式 4 種。而且 x360 熒幕的機鉸位都幾實淨，唔驚扭多幾扭就會斷，耐用程度應該都幾高。
▲x360 好似 Lenovo Yoga 系列咁，都有幾種使用模式供用家使用。
▲反轉的時候鍵盤會自動失效。
▲此時就只能使用觸控功能操控電腦。
▲不過機側亦設有 Windows 鍵，可以在平板模式時讓用家在 Desktop 模式及 Metro UI 模式之間切換。
內建 B&O 音效睇片一流
HP Pavilion x360 的第三個特點，就係內建音效名廠 B&O 的音效：B&O Play，用來加強聽歌、睇片甚至 voice 聊天（例如：Skype）時的音效質素。Edward 亦試過用它來欣賞 YouTube 上的 Ironman 影片，並開啟「Movie」模式，音效確實比一般震撼，環繞聲效果亦十分明顯，人聲亦非常出，以一部 4 千幾蚊的電腦，可以有呢個音效享受，真係可以講得上「蔗渣嘅價錢，踢出燒鵝嘅味道」！
▲內建 B&O Play 音效功能，強化音響效果。
▲睇影片時使用 Movie 模式，確實有助提升人聲清晰度，環繞聲效果亦比平常為佳。
▲亦有 Music（音樂）模式及 Voice（人聲）模式，方便聽歌或以 Skype 等 IM 程式與別人聊天時，加強相關音效效果。
▲而 x360 的喇叭位於機底左右兩側，由於機邊採用弧形設計，所以就算平放係檯面，都唔會驚啲聲「焗」住出唔到來。
熒幕質素一般
平價機，用家一般都唔求效能、熒幕質素好超班，HP Pavilion x360 係呢兩方面確實唔係有好大驚喜，但整體質素都算對得住個價錢。先講熒幕質素方面，解像度只有 1,366 x 768，同一般 11.6 吋電腦機款差不多（例如：MacBook Air），顯示字體邊緣位會有啲化，唔夠實淨，但用來做文書或者睇網頁都好夠用，只係可視角度差少少，左、右側睇還好，但如果從上、下側睇，就會完全變反白，尤其是使用平板或平放模式時，呢一點就要留意。
▲只有 1,366 x 768 解像度，似乎低了一點。
▲用來睇網頁或做文書工作，還好，但字體邊緣不夠銳利。
▲從左、右側睇，可視角度還算不錯，至少仍然睇到。
▲但從上、下側睇就會變哂反白，可視角度極差。
▲用來欣賞 YouTube 上 1080p 畫質的 Ironman 2，質素都算唔錯。
效能屬文書水平
至於效能方面，x360 採用了 Intel Pentium N3700 1.60GHz 四核心處理器，應付一般文書來講都夠用，但如果要打機或者剪片，就唔好苛求太多啦，不過點都應該比 Atom 機款好。幸好佢仲內建 8GB RAM，至少同時 run 多幾隻 APP，都唔驚部機太窒，而且內建 500GB 硬碟（可用容量為 400GB 左右），無論放多幾個 file 或者裝多幾個 APP，都唔驚無位。不過由於無用 SSD，所以開機點都會慢少少，不過 1 分鐘內開到機基本上都無問題。
▲x360 的硬件配備，屬於文書處理級數，打機就唔好諗了，用來睇網頁、用 Word、Excel 等軟件、或者睇下片都算夠用。
▲打字來講，鍵盤都算舒適，鍵面夠大，而且按下去回彈力都唔錯（最少好過新 MacBook！）。
▲TouchPad 用落都唔錯，反應還好，襟落去都唔洗好大力。
▲唯一缺點係雖然支援 multi-finger gestures，但用來瀏覽網頁翻頁時，反應似乎有點慢。
端子齊備夠用
其實今時今日的手提電腦，尤其是 11.6 吋呢種機款，好多機款的端子只係夠就得，但講到齊備，點都唔夠 13 吋或以上的機款。不過 HP Pavilion x360 就十分齊全，包括有：SD 讀卡器、USB（2.0 x 1 + 3.0 x 2）、HDMI 輸出、LAN 等都齊備，可說係應有盡有，就算帶來出 trip 或者去其他公司做 presentation，都唔洗特登帶 adapter。
▲端子好齊，基本上就算帶出街見客或者帶出 trip 用都唔洗帶 adapter。
▲小編最 like 就係有內建 LAN 頭，出 trip 去到無 Wi-Fi 的酒店要上網，就唔洗再帶 adapter。
總結：「扭芒抵玩」值得入手
整體來講，HP Pavilion x360 係主攻一啲打算買部電腦但預算唔多的用家，例如：公司、學校、學生等，雖然效能只屬文書機水平，但唔止端子齊全，仲要有好嘅音效，以 4 千中的機款來講已係值回票價。唯一係機身真係有啲重，同埋熒幕質素同可視角度差少少，如果唔係就真係成為今年嘅最高性價比機款啦！
售價：$4,599（日落火紅 / 薄荷粉綠型號同價）
查詢：HP（800 938 833）
Leave a Comment