傳統既指甲油 keep 得唔耐，又要等佢乾，後來就走去美甲店做 Gel 甲啦。但奇怪既係明明 D人話 Soak Off Gel 唔洗磨甲，但我次次去拆甲，美甲師都係用磨機磨走 D 甲油，有時仲會磨損埋手指邊添。為免再要個個月貼錢買難受，我依莉詩決定要係屋企 DIY！首先我就搵左少少關於燈機既資料。

傳統甲油 V.S Gel 甲油

無論係屋企 DIY 定去美甲店做 Gel甲大多數都係用 Soak Off Gel，又稱 QQ甲。優點就係可以用卸甲油軟化並卸除，唔怕打磨過頭而傷到真甲，而且擁有傳統甲油的多色同易控制。其實 Soak Off Gel 既用法同傳統甲油差唔多，只要每次塗上指甲後，經 UV 燈照一照就有美甲效果，比起傳統甲油需要自然風乾快好多，而且仲可以維持 2-3星期。

另外，同樣需要照燈先乾既就有 Hard Gel，一般用嚟做延長同矯正甲型，可以維持 1個月左右。不過因為 Hard Gel 本身係用於醫學方面，所以唔可以用油卸，只能用拋磨的方式將 Gel甲磨走。做得唔好就好容易令指甲變薄、出現指甲過軟、易反、易裂，甚至患上灰甲添！所以就唔可以輕易自己整啦。

美甲燈機大不同

講到 Soak Off Gel 比起傳統甲油方便咁多，唔多人都會自己係屋企 DIY。一般新手都會選購 Depend 或者 Nailla 等牌子既套裝，貪佢 $500內就有齊燈機甲油同卸甲油。不過女仔貪靚係永無止境既，當見到街上有其他牌子既甲油顏色靚就會買，然而番到去先發覺照唔乾。呢個問題正正就係燈機同甲油唔配引致。

普通 UV 燈機

普通 UV 燈機係最早期既燈機款式，通常係包圍式既設計，設有兩條以上 UV 燈管，利用散光原理，反射唔同波段既光以烘乾甲油。

優點：因為係比較既早期既燈機，好多山寨廠都有出，價格比較平，淘寶幾十蚊都有部，而且波段範圍較廣，無論時間長短，幾乎所有 Gel 甲油都可以照乾，所以大部份小型美甲店都用緊。

缺點：不過普通 UV 燈機占設計上都比較笨重，而且波長比較唔穩定，照燈時間都會較長，容易曬黑皮膚。照燈時仲發出既熱量，亦有可能產生燙手既感覺。另外，普通 UV 燈管既壽命比較短，3-6個月後既效能就會大幅減低，照光既時間亦會變得愈來愈長，所以要定時更換燈管。

CCFL 燈機

CCFL 燈機用的是冷陰極燈管（Cold Cathode Fluorescent Lamp），燈管一般呈螺旋形，以直束光原理烘乾甲油。

優點：因為係冷光燈，低耗電量，高效率，所以產生熱能較 UV燈少，可以減低因指甲薄而產生既灼熱感。亦因為冷陰極燈管不使用燈絲，唔會出現燈絲燒斷既問題，使用壽命亦較 UV機長。另外，波段範圍較廣，大部份 Gel 甲油都可以照乾。

缺點：由於係直束光，側面需要轉動一下先照到，現在大多燈機都會加入數顆 LED 燈輔助。另外，冷陰極燈管容易因撞到而損壞，所以搬運既時候要特別小心。

LED 燈機

LED 燈全名係發光二極體(Light-Emitting Diode) ，與 CCFL 同屬冷光燈，利用直束光原理，烘乾甲油，係比較新既機種。

優點：LED燈機既體積小，方便攜帶，而且照燈時間大約係 UV燈 1/3-1/4，所以深受喜愛 DIY美甲既女仔歡迎。另外，LED 燈效能遞減既速度緩慢，因此唔需要常常更換燈管，使用壽命長。

缺點：然而 LED 燈機既價格較高，而且LED 燈既波長同 UV燈唔同，因此除非甲油一開始就標榜 UV/LED 皆可使用，否則兩種膠無法相互適用，一般只有標籤為可使用 LED 燈既 Soak Off Gel甲油先可以照得乾。同樣甲油既固化時間亦會針對自家品牌既燈機而有所改變，有時亦會因硬化速度過快，會有燙到既感覺，所以每層盡量要塗薄一點。

混合燈機

混合燈機多數由 LED 燈同 CCFL 燈兩種燈混合，用來克服 LED 燈唔係隻隻 Gel 甲油都照得乾既問題。

優點：LED 燈同 CCFL 燈同屬冷光燈，因此唔會發出高熱量，而且兩者既波段唔同，可以大大增加使用甲油既選擇。

缺點：因為 LED 燈同 CCFL 燈既固化時間唔同，難以控制照燈時間。

曬黑與致癌風險

唔少人都聽過用普通 UV 燈機做 Gel甲有機會致癌同曬黑皮膚，而 LED 燈機就唔會。事實上，無論 UV 燈、CCFL 燈或是 LED 燈，所發出既波長都在 320-400nm ，勻屬 UVA 。 UVA 比較容易穿透皮膚，促使皮膚老化、皺紋、變黑，所以長期照都會有機會曬黑皮膚。另外，UVA 唔似 UVB 同 UVC 會直接傷害 DNA，但它可以生成高活性化學中間體、羥基和氧自由基等，會回過頭來破壞 DNA 既物質。不過因為 LED 燈機發出既能量唔大，而且照既時間比較短，所以會比較安全。

帶手套減風險

雖然美國德薩斯州大學曾發表報告指出，兩位有 Gel 甲習慣既女性，因長期使用手部因而長出癌腫瘤，但研究同時表明，即便反復暴露係燈機下，皮膚產生致癌物質既風險仍然不大。不過，如果擔心既話可以帶番對露指既防 UV 手套、卸甲時指緣最好使用凡士林做好隔離同埋最好隔最少 3星期先做一次。