今個夏天唔知係咪「瀡」開有條路，之前講過既 Slide the City 都未開始， 淺水灣 the pulse 商場就截糊舉行 Endless Summer 水上嘉年華。現場唔止有瀡滑梯，仲有水上足球、巨型水上保齡和大量水槍任你玩，係咪聽到都興奮呢？我依莉詩就率先「瀡」左一日啦！
勝在唔洗排隊，點瀡都得
之前報導過既 Slide the City 有成 1000呎，聽落好似吸引好多，不過瀡一次要成 $120 ，仲好有可能有排排隊。而 Endless Summer 的滑梯雖然無咁長，不過勝在人少少，瀡多幾次都唔洗排隊。同樣，因為難度無咁高，大人細路都可以一齊瀡，撞來撞去咁，真係幾搞笑！
▲ 瀡得慢 D 都有可能比人追撞！
▲ 瀡到攰，同班 friend 玩番場水上足球都唔錯！
小朋友放電好地方
如果怕帶小朋友去沙灘危險，「水池區」確實係個好地方，玩得安全又唔怕走失。現場有多支水槍，小朋友可以隨時來一場水槍大戰。家長同小朋友玩到攰又可以浸在水池眺望淺水灣的海景，過一個透心涼的假期。
▲ 家長同小朋友浸在水池互相攻擊，大玩特玩！
食完再玩過
玩完一輪可以到各個美食攤位及特色攤檔輕鬆一下，享受漢堡、冰凍椰青及雪條等消暑美食。補充體力後更可選購短褲、
▲現場有專業 DJ Miss Yellow 即席打碟，以輕鬆明快的節奏燃點夏日氣氛。
▲炎熱的天氣又點少得一個冰凍的椰青消暑呢！
▲ 咬一啖不同口味的鮮果雪條，整個人即刻打一個冷震呢！
▲ 面對水槍攻擊，如果事前咩都無準備都唔怕，呢度有太陽眼鏡賣，立即幫你做防護！
▲ 此外，仲有沙灘褲，毛巾等夏日玩水必備的裝備任你選購。
▲ 現場仲有小遊戲玩，有機會贏到大大個天鵝水泡番屋企添！
▲ 仲可以到創意拍照區與好友拍攝特色照片，即時打印出來，
依莉詩：「夏日親子好去處！」
可能有人會問我，明明大大個淺水灣係下面，點解仲要俾錢上商場天台玩呢？如果對一班青年人來講，小編又真係覺得沒有需要俾錢上去的。但對於帶住小朋友的家長來講，如果去沙灘，又要睇住 D 袋，又怕小朋友走得太遠，而呢個既可以享受陽光海灘，又可以放心俾小朋友去放電的地方，想過一個輕鬆悠閒的假日，俾幾多錢都值得既！
日期：2015 年 6 月 13 日至 7 月 25 日 (一連七個星期六)
地點：the pulse 空中花園及三樓觀景台
開放時間： 中午 12 時至晚上 8 時
門票售價： 5 至 12 歲兒童為 $60，包括入場門票；成人為 $180，包括入場門票、一個免費美食套餐及 impulse 會籍。
分享到 :
最新影片
