波波池可以說係小編這些 90後的童年回憶，以前幾乎間間冒險樂園都有得玩，可惜後來因為衛生問題，已經買少見少。隨著自己慢慢成大，就算見番，波波池都只係為小朋友而設，想入去都有難度。幸好，太古城中心將於 6月13至 15日，一連三日，將溜冰場變成超大型波波池，注滿大大小小黃色、灰色及淺啡色膠波，而且仲設有成人區域，讓大人們都可以重拾童年夢。當然啦！貪玩的我知道消息後，亦無懼新沙士，立即衝去試玩！
這個名為「Sea of Happiness」的冰上波波池，只搞 3天，1日仲只得 9節，以每節只容納 80人計算，就只得 2160人有得玩。想成為其中一位就一定要做足準備啦！
1) 為小朋友度高
由於小童池的身高限制係 0.8米以上，如果小朋友的身高矮過限制，就最好放棄啦，免得浪費左排隊的時間。而成人池身高限制係 1.4米或以上，萬一真係唔夠高，就要有心理準備去唔到成人池啦！
2) 預早消費，拎定收據
因為今次只需要憑任何一張 6月份係太古城中心既消費單據就可以換領一張入場券，每人最多可以換取 4張飛，即係話 $3蚊的老麥雪糕的可以換到飛了。但根據現場職員所講，換飛的時間最早會係當日早上 8點，即係可能成個商場既鋪頭都未開，所以最好就早幾日買定野，留番張單。
4) Like 定 Facebook
有收據都未夠，換飛的另一條件係要 Like 「Cityplaza Hong Kong」的 Facebook Page ，為免到時有咩閃失，就 Like 左先吧！
5) 清楚換領入場劵地點
到時一定會打晒蛇餅，搵唔到個換飛地點，所以依家就可記住啦！係太古城中心一樓（近時間廊）啊！
6) 比換飛時間早去排隊
雖然每日都有 4個時段派飛，不過根據現場職員的口風，好似會睇情況而提早開始派飛，所以大家都最好早D排定隊啦！
雖然每節有 40分鐘，但計埋事前放袋除鞋同事後清場的時間，實際上真正係波波池入面的時間可能只得 20分鐘，所以依家就好了解清楚程序，到時快快脆跳入池啦！
1) 入場前先量高度、體溫
為左安全，排隊入場的時候會有工作人員先量體溫，所以唔好亂咁走開或遲到啊！
2) 拎定隨身物品
入場之後會有工作人員派一個細袋，最多都只可以放到部手機，要唔要放入去就早D諗定啦！
3) 揀好儲物櫃
另外會有工作人員派一個儲物櫃的代幣俾大家，入到場就快快手將個袋放入去 D 仲有鎖匙既儲物櫃。不過記住，每個儲物櫃只係可以開一次架咋！
4) 除鞋
放好袋就要即刻除鞋除襪放係鞋櫃。
5) 著上大會長襪
衣著方面大會建議大家穿著厚身長襪，最好唔好著船襪。不過由於波波池底仲係溜冰場，小編唔洗玩一陣對襪就濕晒，所以著定大會派發新襪的襪吧。
6) 準備相機
如果想玩波波池中間的 5米滑梯，不妨係池邊借用 Go Pro。拍下的影像會係活動完左之後俾番你。
準備左咁耐，就好好享受係波波池的時光啦！可惜因為小編掛住準備同影相，仲未點玩就已經夠鐘，所以無咩秘訣講到俾大家知，只好 Post 張官方的玩方俾大家參考啦！
其實約埋成班朋友玩傳波都可以好開心。
小編係入場之前拖得太耐，而且掛住排隊玩滑梯同影相，所以最後都未能盡興。如果有多次機會，我應該唔會排隊玩滑梯，而係係波波池中 HEA 足 20分鐘。
地點： 太古城中心冰上皇宮溜冰場
日期：2015年6月13至15日
時段：10am-10pm (40分鐘/節，共9節)
(清潔小休：1pm-2pm/ 4pm-5pm/ 7pm-8pm/ 10pm後)
人數：每節時段最多可容納80人
查詢： (852) 2568 8665
