就算已經重播過幾次，但《大時代》仍然是不少觀眾每晚追看的劇集，星期五晚大結局後，預計不少人又會回到熄電視上網睇片的習慣。最近有電視生產商力推網絡電視服務，認為傳統電視已死，由於沒有對手，要做到本地收費電視節目供應商龍頭沒有難度。
真係咁容易嗎？現時開著電視，免費電視台選擇雖然有好幾個，但重複的內容不少，睇得上眼亦不多。亞視擺到明等執笠，可以放棄；而 TVB 節目亦每況愈下，縱使我不是電視製作人無法深入評論，但作為觀眾都明顯睇到 TVB 因為冇對手而「Hea 做」。
分享一個 Hea 做的例子，我是 J2 日本節目《日本人妻在遠方》的捧場客，星期日會特別開電視收睇。有好幾個星期節目都是 Sharp Cut 結束，即是主持發問了一條問題，未等觀眾回答節目就突然完結。起初以為這是節目播出時的小失誤，為了知道答案，我特別在重播時段再睇一次，發現情況完全一樣。無論站在製作還是觀眾的角度，只要有少少 Common Sense，將主持人的問題剪走或者播多幾秒讓觀眾講出答案，就不會出現有問無答的兀突畫面。
當娛樂版現時還做《大時代》專題，Facebook Timeline 仍然晚晚有慳妹玲姐截圖，就知道香港人的電視娛樂在過去 20 年幾乎沒有進步過。在沒有競爭，電視台繼續 Hea 做的情況下，可以肯定我的電視除了接駁電腦睇片和打機，應該沒有別的用途了。
分享到 :
最新影片
