「夏日熱辣辣，好熱好熱！」夏天到，相信大家一係就留係冷氣房玩，一係就去泳池或者沙灘暢泳，享受冰涼泳池水 / 海水為大家帶來的涼爽感受。不過如果帶 iPhone 去泳池 / 沙灘，又或者落雨個時想用，都會幾麻煩。Seidio 剛剛就為 iPhone 6 / 6 Plus 推出了 OBEX 四防殼，唔止可防水仲可以防跌、防塵及防雪！咁樣一年四季，或者去到世界邊一個角落，都可以鍚住部 iPhone 啦！
先講安裝啦。OBEX 保護殼安裝其實十分簡單，只要將 iPhone 放在正面的保護殼內（先攝入音量鍵的一邊），然後再蓋上背蓋，然後沿著邊啪實保護殼，就可以了！另外，要知道保護殼是否真的防水，品牌亦建議大家在未放入手機前，先將空的保護殼放在水中大約 5 分鐘（須用有一定重量的物件壓住保護殼以免浮回水面），然後拿上水抹乾，再拆開保護殼，如果殼內沒有任何水氣水點，就證明防水功能無問題了。
▲建議使用前先將 OBEX 保護殼壓在水中 5 分鐘，拿起後如果發現內裡沒有任何水點（如上圖），就代表防水功能完全無問題。
▲先從殼身右下角打開保護殼。
▲再將 iPhone 攝入保護殼的面蓋（先入音量鍵的一邊）。
▲最後裝上保護殼底蓋，然後按壓殼邊，聽到啪的聲音就代表已鎖實。
另外，安裝後使用上，始終它是四防殼，有一定的厚度，所以套上 iPhone 後會變厚了頗多，不過單手操控上還算可以，但操控熒幕又或者按下 Home 鍵時，由於始終隔住一層防水膜 / 膠，所以要比平時更大力先可以用到，初用時可能會感到不太習慣。另外，雖然官方表示它可支援 Touch ID，不過我們測試後發現，套上後 Touch ID 會比平時難按很多（須用力度大約是平時 4 倍左右），而且只有一半機會辨認得到，所以使用此保護殼時，建議用回密碼解鎖功能會方便一點。
▲裝了四防保護殼始終會比裸機用厚，初用時要一點時間習慣。
先講 OBEX 的防水防塵功能啦，它的級數具有 IP68，防塵上基本上無任何固體塵埃可以進入殼內，而防水方面，更可以在最深 2 米的水中使用最長 30 分鐘，最適合在沙灘或者泳池的水入面影相，唔單止唔會傷到 iPhone 本身的機能，影相場景亦可以更多，大家更可以盡情發揮創意，拍下 pool-side 或者沙灘 party 時的有趣一刻。
▲裝了 OBEX 保護殼，就算是落雨時、洗手時、甚至沖涼時要用 iPhone 都唔驚入水。
▲浸係水入面都無問題，大家去泳池或者沙灘玩水個時就可以隨時影相啦！
另外，防跌方面，OBEX 保護殼符合 MIL-STD-810F 美國軍用級別，就算在高至 1.8 米的地方跌手機落地，都唔驚會跌爛 iPhone 個熒幕，對於鍚機之人來講，可以避免到「無妄之災」，實在體貼。
▲具備軍用級數的防跌功能，作為超過 1.7 米高的小編，就算係耳邊位置跌部 iPhone 落地，都唔會驚跌爛個熒幕。
▲咁係更矮的檯面跌落地，自然更無問題啦。
此外，OBEX iPhone 保護殼仲可以防泥、甚至防雪！無論大家是玩「泥漿摔角」，又或者去雪山滑雪，都唔驚泥漿或者雪整壞愛機。就算平時食飯，萬一不慎倒瀉可樂、甚至紅酒，都一樣防得到，防護十分全面。
▲除防水防塵，OBEX 保護殼仲具備防泥防雪功能，可以話去到世界邊個國家，都可以用到 iPhone 6 啦！
今次測試的 OBEX 保護殼，亦是為 iPhone 度身訂造，所有按鍵位、插槽位均是按照 iPhone 本身的設計而定的，所以大家套上保護套後，唔止可以正常按到開關、音量及靜音鍵，甚至插 Lightning 線充電或者過檔案去電腦，都無問題。
▲所有按鍵位置均是度身剪裁，裝上 OBEX 保護殼都一樣用到。
▲就算插 Lightning 線充電或者駁電腦過檔案都一樣無問題。
▲影相都一樣無問題。
▲不過插耳機就需要使用延長線了。
售價：$588（iPhone 6）；$668（iPhone 6 Plus）
查詢：Legend Distribution（2123 8200）
