今日 HTC 發佈全新 One E9+，定位比 One M9 低，但單係配備 2K 屏幕就已經吸引很多人的目光，究竟佢同 One M9 邊個抵玩啲？想知就等小編 幫你試玩一下。以下有更多資料：
點解 One E9+ 比 One M9 更吸引？因為佢係 HTC 首款 2K 屏幕手機，屏幕比 One M9 大少少增至 5.5 吋，擁有 2,560 x 1,440 解像度，畫面一睇就知比 One M9 的 1080p 細緻。至於顏色表現，One E9+ 同大部分 2K 屏幕一樣顯示白色會偏冷色，同 S6 Edge 比會偏藍；同 G4 比就較紅，整體來說都算唔錯，但如果有埋色溫選項就更好囉！
▲ One E9+ 同其他 2K 屏幕一樣都屬偏冷色，但偏藍屬輕微，整體可以接受。
▲睇片時畫面亮度及可視角度都幾好，加上 BoomSound 音量都好夠。
▲ BoomSound 附 Dolby 音效優化。
▲ 白色畫面會隱匿看到鬆動的只十字紋，情況算輕微。
One E9+ 另一賣點係比 One M9 支援更多網絡制式，除了基本 FDD（多了 800MHz）及 TDD 4G 制式，兩機最大分別係佢仲支持 TD-SCDMA (中國中移 3G) 制式，在中國網絡兼容比 One M9 更強，這點同去年 One E8/M8 情況差唔多。此外，One E9+ 還具備 2 個 Nano SIM 插槽，兩邊都支援 4G，並可透過軟件切換主卡，不過佢最抵讚係 2 SIM 之外還有獨立 MicroSD 卡槽，唔似有些手機用雙卡時要犧牲 1 個 SIM 槽。
▲ 所有卡槽位於旁邊，打開免用針。內附 2 張 Nano SIM 槽及獨立 MicroSD 卡槽。
▲ 可在手機雙卡介面內選擇那張 SIM 才是主卡。
雖然 One E9+ 定位比 One M9 低，但 One E9+ 仍擁有 3GB RAM 及 32GB 儲存空間，主鏡頭為 2,000 萬像素；前鏡頭為 UltraPixel，規格同 One M9 幾乎一模一樣，而且佢都預載 Android 5.0 及 Sense 7 介面，操作及介面用落差唔多。而兩部機主要分別係 One E9+ 採用 MediaTek MTK6795 八核處理器，可能好多人聽到「MTK」都會覺得慢，但實際 Antutu 都錄得約 49,000 分，成績跟 Qualcomm Snapdragon 810 唔差好遠，加上平時操作都好順暢，暫時睇唔到「MTK」性能上的弊處，但敢肯定 One E9+ 缺點係不對應快充功能 (非 Qualcomm 關係），即使原裝火牛屬 5V/1.8A，但實際輸入僅 5V/0.9A 左右，因此充滿電就好能要稍等一會。
▲ 搭載 MediaTek MT6795 八核處理器及 3GB RAM，於 Antutu 錄得約 49,000 分，成績跟其他用 Qualcomm 的旗艦機差唔多。
▲ 3GB RAM 在閒置時會有 1.6GB Free RAM。
▲ 內建 32GB 儲存空間，實際可用大約有 21GB，而且還可插 MicroSD 擴充。
▲ 此機設有 NFC 功能。
▲ 搭載 Android 5.0 及 Sense 7 介面，感覺其實跟 One M9 大同少異。
▲ 2,000 萬像素主鏡頭，效果跟 One M9 差唔多，主要問題係 NR 及壓縮比較重手，而介面上主要分別係冇了 RAW 拍攝功能。
▲ 前鏡頭屬 UltraPixel，相片效果依然很 Sharp，表現出色。
▲ 此機不支援快充功能，用原廠火牛充入數值只有 5V /0.9A 左右，充滿 2,800mAh 都要一定時間。
One E9+ 除了規格，改動其實係改用膠殼，雖然聽到就覺得「降晒 Grade」，但它特別用了玫瑰金或銀色機面，遠睇都幾有金屬質感，要細心睇或拿起才發現係塑膠，當然機背出賣了佢，但小編 覺得玫瑰金配白色都幾靚。手感方面，屏幕增至 5.5 吋，拿起感覺跟 Desire 820 差唔多，但唔同係機身更薄更輕，單手操作冇難度，只係質感同 One M9 比缺少了金屬重量/質感。
▲屏幕增至 5.5 吋，但單手仍可操作，而且機身都很薄很輕。
▲ 驟眼睇其實玫瑰金很有金屬感覺。
▲ 機背鏡頭環係唯一金屬的部分，但機背就會明顯察覺到係膠殼。
其實睇完新聞稿，小編 已經覺得 One E9+ 肯定比 One M9 更抵玩，除了規格、網絡制式，最重要係定價僅 $4,398，價錢比 One M9 足足平約 $1,600（One M9 定價 $5,998），當然有人會質疑一部「金屬機」一部「膠機」點混為一談，但如果你係會用保護殼，咁用了 DotView Case 的 One M9 同 One E9+ 其實都係摸住膠殼，但重點係 One E9+ 屏幕大啲有 2K、有 Dual SIM、價錢仲平啲！（點解唔出個金屬保護殼！）如果 One E9+ 及 One M9 二選一，小編 肯定會揀 One E9+。
售價：$4,398
查詢：HTC（3077 5588）
