市面而家好多平價的智能手機，千中甚至千頭已經有交易，唔少仲要係中國品牌。不過有些人會覺得用中國手機唔耐用之餘，仲有可能秘密將手機內的敏感資料傳送到不知何方的伺服器，看似有點危險。BlackBerry 今日就係香港推出 Leap，$2,588 就買得到，感覺好似俾多 1k 買個安心？但實際用落又點？Edward 而家同大家講講。
先講 Leap 的手感吧，它與過往的 BlackBerry 手機相比，它的機背採用較有質素的膠殼，拿係手度感覺係幾唔錯。另外，它的機背兩邊都採用「收邊」弧形設計，令用家單手拿住有 5 吋熒幕的 Leap 時，更容易以單手操控。不過作為塑膠手機，Leap 相比其他同價手機（例如：小米），機身有點墜手，雖然未至於會累，但感覺就係太有「份量」了。
▲機背採用呢種粒粒塑膠殼，手感比之前的 BlackBerry 平價機更好，不過遺憾是以後就無了可拆殼換電的設計……
▲機背邊位採用「收邊」弧形設計，單手操控算係舒服。但係機身又有一定「份量」，長時間拿又會抵消了那份舒適感……
▲既然唔可以拆機背殼，所以插 SIM 卡同 microSD 記憶卡都要在機身左側，而 SIM 卡是採用 Micro SIM，而非時下流行的 Nano SIM。
▲入門機支援 64GB microSDXC 卡算令小編意外，不過記住要下載 patch 先至可以支援得到（係呢個介面直接下載就得）。
Leap 的另一特點，就是特長的使用時間。官方表示，Leap 在 Heavy Use 的情況下，可以最高使用 25 小時，原因除了內建 2,800mAh 容量電池外（BlackBerry Passport 表示有 3,450mAh 電……），新的 BB 10 OS 亦加入了電池省電模式管理（Android 陣營表示早已有此功能……），因此可令手機使用時間有效提升。不過 Edward 從內建的電池管理介面睇到，它的 2,800mAh 容量電池，實際只能用到 12 小時左右，未去到官方所稱的 25 小時。由於測試時間有限，所以 Edward 很難確認它的真假啦（或者它的省電模式真係咁勁都唔出奇……），但對此使用時間，Edward 仍有保留。
▲Leap 內建了 2,800mAh 容量電池，在 BlackBerry 手機來講算係多（比佢多的就只有 Passport）。
▲在 Leap 採用的 BB10 OS 內，更加入了電池省電模式管理，令手機使用時間能有效延長。
▲不過從手機內建的電池使用量監察介面，可以見到 89% 電池可以使用 9 小時，這就奇怪了：為何 100% 電池的情況下可以用到 25 小時？就算加了省電模式應該都無可能咁誇張掛……（如以此使用量推斷，Leap 應該只能用到 12 小時左右……）
相信大家見到 BlackBerry 手機賣到 2 千幾，都會好奇怪：BlackBerry 好似一向都唔太打超平價市場架喎，之前部 Z3（已經係接近一年前）先至平得過部 Leap！今次又咁好死？無錯，呢個係「將貨就價」的機款！點解咁講？佢用的規格，可以講得係 4 年半前 HTC Sensation XE 所採用的硬件（影片內講錯了是兩年前，謹此致歉~~~）：Qualcomm Snapdragon S4 Pro MSM8260 1.5GHz 雙核心處理器、2GB RAM（呢個就比當年的 Sensation XE 多一倍幾）、16GB ROM、同埋 5 吋 720p 解像度熒幕（熒幕係靚過 4 年半前嘅……）。Edward 本以為部機一定窒到阿媽都唔認得，但係配合 BB10 OS 又出奇地順暢，無論係入 APP、操作或者出 APP 都唔見有窒的情況，十分驚喜！不過始終呢粒係舊到唔舊的 CPU，RAM 又得 2GB，所以係 multi-tasking 上 Leap 的表現只屬一般，開得 5 至 6 個 APP，部機就會 hang hang 地。
值得一提的是，Leap 同其他採用 BB10 OS 的 BlackBerry 手機一樣，都可以透過裝 APK 或者 Amazon App Store 下載並安裝 Android APP，平時用開的 MTR、布卡漫畫、HKTV 等全部都裝到而且 run 到，一部手機可以用到兩個 OS 的 APP，係其他平台俾唔到用家的彈性體驗。
▲雖然採用 4 年半前的 CPU，但係配合 BB 10 OS，部 Leap 又出奇地順暢！
▲BB 10 OS 本身個介面都幾易用。
打字鍵盤都有建議字，打左幾粒字，當出到之後係個字母度向上一劃就輸入得到。
▲最重要係連 Android APP 都可以 run 到，大家見到 myTV、MTR Mobile、白貓、布卡漫畫全部都裝得到。
▲試過 HKTV APP，入到 APP 兼可以流暢睇直播。
▲用布卡漫畫來睇漫畫都無問題。
Leap 採用了 5 吋 720p 熒幕，整體表現上算係還好啦，不過其實而家比 Leap 平但提供 1080p 熒幕的機款都有唔少（例如：之前推出的小米 4i），係咁嘅情況下，小編就覺得係性價比上硬係差少少喇，畢竟 720p 同埋 1080p 熒幕係顯示質素、銳利度上都差唔少。不過如果大家係為了「保安」，咁就無得好講啦。
▲5 吋 720p 熒幕，質素嘛……還好啦。
▲文字顯示上係 720p 熒幕來講算係不錯，而且亦無明顯偏色情況。
最後就講講鏡頭啦。同之前的 BlackBerry 手機一樣，今次係 Leap BlackBerry 仍堅持唔升級，繼續沿用同一個 800 萬像素鏡頭，質素來講小編覺得只是一般，雖然色彩算自然，但係銳利度唔夠，而且放大後有明顯油畫化的情況，Edward 可以講用於「網絡用途」是夠用的。
▲BlackBerry 睇來學 Apple，堅持繼續用 800 萬像素鏡頭唔升級。
▲相機介面算係易用，可以較的東西唔多，拍片方面最高可支援 1080p 或 720p 60fps。
▲相機拍攝出來的相片，質素嘛……只屬一般。
▲100% 放大相片，可以見到油畫化情況幾明顯。
整體來講，BlackBerry Leap 係表現同埋規格上，確實係一部 BlackBerry 入門機，亦俾到入門機應有的表現俾大家，對於想買部 2nd phone 玩玩的 BlackBerry 粉絲來講，應該可以收貨。不過，用呢個價錢，買部用 4 年半前出的 CPU 的手機，真係有冇搞錯！（小編 ：清舊貨都有個譜呀！！！！）或者咁講，如果大家想俾多 1k 買個安心，以免個人資料洩漏到唔知世界邊個角落，BlackBerry Leap 係值得嘅。但如果以性價比來講，隨時買部 Moto G 都真係比佢抵玩！
售價：$2,588
查詢：BlackBerry（hk.blackberry.com）
