S-Pen 是 Galaxy Note 咁多年的精髓所在，過往只有 Note 4 或 Galaxy Note 10.1 等旗艦產品先有。不過，想玩 S-Pen 都唔洗等二手機，因為 Samsung 最近推出全新 Galaxy Tab A 系列平板，賣點係預載 S-Pen 但價錢最平僅 $2,298 就有交易，想知部機玩唔玩得過就留意小編 速試喇！以下有更多資料：
初初見到 Galaxy Tab A （下稱: Tab A）仲以為係金屬製 Galaxy Tab，但實際 Tab A 定位相對經濟，同 Galaxy Tab 4 分別係有 S-Pen。如果大家有留意 Galaxy Note 應該都唔洗多講 S-Pen，而 Tab A 的 S-Pen 功能大至跟 Note 4 睇齊，可以從畫面裁出 ScreenShot、選取文字並 ORC 等等，換言之這些功能唔洗買旗艦機都做到！
▲ Galaxy Tab A 賣點是擁有旗艦機種才有的 S-Pen。（暫時官方資料冇透露壓感級數）
▲ 支援 Air Command、Multi Window 、S Note 及 Easy Clip 等功能。
外表方面，Tab A 會有 8 吋 及 9.7 吋兩個型號，這次速試會集中 8 吋型號，驟眼睇設計跟 Tab S 8.4 相似，但上下邊框會粗一點，而機背亦只係普通膠殼，外觀不過不失，拿起唔算好重 (僅 338g)，但單手握住就比 Tab S 8.4 或 Z3 Tablet Compact 都要困難，這點全因屏幕改用 4:3 比例令機身加闊了，因此用時就可能托底或夾邊。
▲ Tab A (8吋) 頗薄身亦唔重，但由此屏幕採用 4:3 比例，故此機身會較闊，單手比較難握。
▲S-Pen 藏於機背右上角。
▲ 機底有 Micro USB、3.5mm 耳機接口及單聲道喇叭。
▲ 機身只是比 S6 Edge 厚少少。
▲ Tab A 分別有 8 吋 (右) 及 9.7 吋 (左) 兩個版本，兩者規格大致相同。
上文提到屏幕改用 4:3 比例，小編 個人其實喜歡這個比例，但想唔到 2015 年仲見到絕跡一時的「粒粒芒」，因為 Tab A 跟 iPad Mini 及 iPad 2 一樣僅 1,024 x 768 解像度，平時用都影響唔大，但睇網頁及文字(細 Fonts) 就好明顯「起粒」，雖然放大小小就解決，但睇關高清細字的年輕用家就唔太慣。
▲ 雖然只係 TN 屏幕，但顏色及可視角度都唔太差。
▲ 8 吋屏幕只有 1024 x 768 解像度，感覺就好似睇 iPad Mini 咁，睇細字會起「粒粒」。
▲ 雖然屏幕並非 S-AMOLED，但它仍設「熒幕模式」可調至較黃的閱讀模式（為何冇黑白！）
Tab A 本身定位唔貴，因此機內只搭載 Qualcomm Snapdragon 410 處理器、2GB RAM 及 16GB 儲存空間（可插 MicroSD），性能跟「紅米 2」差唔多，於 Antutu 性能錄得約 20,000 分，配合 Android 5.0 操作都大至順暢，而且機內跟 Galaxy S6 一樣好少預載 App，需要時才到 Galaxy App 自行下載，因此閒置時都有約 850MB Free RAM。鏡頭方面，此機搭載 500 萬像素及 200 萬像素前後鏡頭，雖然介面及功能都最新，但小編 唔建議對它們抱太大期望。
▲ 搭載 Qualcomm Snapdragon 410 處理器及 2GB RAM，於 Antutu 大約錄得 20,000 分，成功跟入門手機差唔多。
▲ 內置 16GB 儲存空間，實際可用有 10.5GB，但最重要它支援 Micr0SD 擴充。
▲ 2GB RAM 閒置時大約有 850 MB Free RAM。
▲ 機內已預載 Microsoft Office，可預覽及修改文件檔案。
▲ 雖然內建 Qualcomm 處理器，但用原廠 2A 火牛輸入仍只有 1A，故此充滿都要一定時間。
▲ 雖然介面跟 Galaxy S6 差唔多，但主鏡頭只有 500 萬像素。
▲ 欠缺 OIS、大光圈等高級規格，Tab A 相機相對容易手震，而且相片雜訊頗明顯 (ISO 100)，因此只適合「純作紀錄」（評分比「純網上分享」還低）。
Tab A 仲有細分 WiFi 及 LTE 版本，其中 LTE 版最大分別係可插 SIM 卡打電話，但上網除了香港 4G LTE 制式，佢其實仲支援 TDD-LTE (中移 4G) 及 TD-SCDMA (中移 3G)，換言之中港兩地 3G /4G 制式都支持，適合一些經常穿梭兩地的用家，但可惜此機僅支援單卡設計，因此需要時須自行轉換 SIM 卡。
▲ LTE 版最大賣點係可以打電話及支援中港 3G / 4G 制式，但可惜是不設雙卡雙待。
▲ 機內冇 NFC 功能。
S-Pen 作為 Galaxy Note 王牌功能，這次下放到 Galaxy Tab A 好明顯係想 S-Pen 更親民，小編 認為此舉抵讚，更何況規格及設計都唔太差，唯獨係 1,024 x 768 屏幕「累事」，如果換成 1,280 x 1,024 (4:3) 甚至 1,280 x 800 (16:10) 效果都會好好多。價錢方面，Tab A 8 吋 WiFi 及 LTE 分別為 $2,298 及 $2,898，老實說價錢唔算好貴，但前提你需要 S-Pen 才會考慮，因此小編 認為 Tab A 可能適合學生 (做 Project) 或較年長的用家，後者甚至作為父親節禮物都係唔錯選擇。（當然父親節都可以送比媽媽）
售價：
$2,298 / $2,898 Galaxy Tab A 8.0 WiFi / LTE
$2,698 / $3,298 Galaxy Tab A 9.7 WiFi / LTE
查詢：Samsung (3698-4698)
