好似 Edward 呢種成日要出街工作的人來講，「搵食機」要夠輕是必然的常識。一般平板又限制多，更加唔可以用唔番平時電腦用開的 APP。Microsoft 近日就正式發佈 Surface 3，$3,888 起就可以有部又輕薄又行電腦 OS 的平板出街，其實都幾抵。但用落又點？Edward 就同大家分享一下初步用後感啦。
其實早前 Microsoft 都已經推出過已效能主打的 Surface Pro 3，而今次的 Surface 3 售價更相宜。主要分別是由高效能 Intel i 系處理器改為採用 Atom x7 1.6GHz 四核處理器。Surface 3 的 Atom 處理器主要是作一般的文書工作，例如電郵、MS Office、簡單的圖像編輯等，如果需要處理 HD 影片的特效及電影剪接、3D 繪圖及電玩遊戲，則 Surface Pro 3 更加合適。
由於 Atom 專為流動裝置所設計，所以非常慳電，官方聲稱可以連續播放 10 小時影片。究竟是否屬實？這就有待之後借到機進行詳細測試先知道，不過根據 Edward 以往試過其他採用 Atom 處理器的機款來講，這使用時間應該「雖不中亦不遠」，隨時慳慳地用甚至可以用超過 10 小時呢！
▲今次改用全新的 Atom x7 四核心處理器，雖然效能比不上 Core M，但用來做文書、上網機絕對綽綽有餘。
另一項「搵食機」的必要條件，就係夠輕夠薄。Surface 3 由官方提供的資料可以見到，重量是 636g，而厚度就是 8.7mm。單睇數字，好似重量同厚度都比一般平板厚同重唔少，但其實拿到上手又另一個感覺：手感其實同一般 10 吋平板差唔多，重量分佈幾平均唔會側埋一個位，所以單手拿住一陣都唔會累。而且因為邊框有一定粗度，所以就算橫向拿住都唔會覺得太累，直向用就更加舒服啦。
▲Surface 3 在設計上重量分佈好平勻，就算連埋 TypeCover 3 鍵盤一齊單手拿，都唔會太重。
▲邊框有一定粗度，橫向長時間拿都唔會太累。
▲當然打直拿就更就手啦！
Surface 3 的熒幕採用 10.8 吋 ClearType Full HD Plus 熒幕，解像度有別於一般手提電腦或平板的 1920 x 1080，Surface 3 的熒幕解像度是 1920 x 1280，即是瀏覽文件或網頁時，可以比在其他平板、電腦睇多半行到一行字。
▲Surface 3 配備的 10.8 吋熒幕，解像度達到 1920 x 1280，比其他 1080p 熒幕的平板可以睇多半行到一行字。
至於質素方面，Surface 3 的色準都算唔錯，基本上字體顯示都幾銳利，而且都未見偏色情況，所以無論係上網睇料、甚至娛樂上用來睇戲甚至打機，都有幾唔錯的視覺效果。
▲Surface 3 的熒幕質素唔錯，字體顯示都幾銳利。
▲可視角度都幾高，打側睇都無問題。
▲用來睇高清片，質素都幾唔錯，顏色自然影像又夠銳利。
雖然 Surface 3 跟機唔送 TypeCover 3 鍵盤，需要另外購買，但今次這款鍵盤保護蓋，對於需要經常打字的人來講，絕對值得購買！一來它並非藍牙鍵盤，而係採用磁石端子接駁，不會造成對其他藍牙裝置的干擾；二來它的按鍵鍵深適中，基本上同一般手提電腦鍵盤鍵深差唔多，用佢打字同係一般手提電腦打字無分別，就算長時間打字都幾舒服。唯一缺點係它的 TouchPad 面積仍然較細，所以如果要操控較順暢，建議大家使用無線藍牙滑鼠，或者使用Surface Pen 操控會較好。
▲Surface 3 的 TypeCover 3 鍵盤，打字時由於按鍵有足夠鍵深（同一般手提電腦差唔多），所以都幾舒服。
▲唯一就係個 TouchPad 面積仍然偏細，不過靈敏度幾高。
▲ Surface Pen具備壓感操控，而且好似 WACOM 筆咁樣凌空都感應得到。
▲支 Surface Pen 唔用個時可以收係上圖呢個位，而且個位有少少凹入去，合埋個時唔驚整親個靚靚熒幕。
當然，作為「搵食機」，另一項 Edward 幾重視的設計，就係端子。Surface 3 雖然比 Pro 3 在規格上降 grade，但端子仍算足夠，唔止有一個全尺寸 USB 3.0 插頭，亦有 Mini DisplayPort 供用家輸出熒幕到外置 LCD 顯示器，甚至玩雙芒都得。另外，它亦內建 microSD 讀卡器，方便讀取手機內的相片或檔案。而最特別的地方，是它設有一個 Micro USB 充電連接埠，用一般外置充電器就可以為 Surface 3 充電，雖然沒有用本身的火牛充電咁快，但對於係外面工作又搵唔到插蘇差電個陣，以外置充電器為 Surface 3 充電作「應急」，都係一個唔錯的選擇。
▲Surface 3 機身用金屬物料製造，手感都算幾唔錯。
▲有 USB 3.0 一個加埋 Mini DisplayPort，好夠小編用囉！
▲最特別係可以用外置充電池充電！
至於效能來講，Surface 3 作為主攻輕薄及文書、上網為主的平板電腦，算係唔錯：內建 Intel Atom x7 1.6GHz 處理器，始終係 x64 架構的處理器，配上最高 4GB RAM，無論係做文書處理、上網睇網頁、甚至上 YouTube 睇最高 2K QHD 解像度的超高清影片，都十分暢順。另外，相比其他 ARM 架構（即係大部分 Android、及 iOS 系統）的平板來講，x64 架構平板好處係可以用番曬傳統 Windows 上面用開的程式，對於用慣 Windows 的人來講，真係好方便，至少唔洗係 APP 商店入面搵其他「替代品」，然後仲要重新適應另一個 APP 的介面。而對於鍾意打機的 Edward 來講，Surface 3 甚至可以係上面玩平時玩開的遊戲，好似：Age Of Empire、SimCity，都算係咁啦！
▲內建 Microsoft Office 365，用來做文書處理完全無問題啦。
▲另外用 x64 架構的平板，最好的地方係睇 YouTube 可以直上網站睇，而且最高仲可以素到 4K！唔洗俾 APP 限住哂。不過，Surface 3 要推 4K 片始終唔係太夠力，建議最高睇 1440p 好了。
▲用來玩啲唔洗太高 graphic 要求的 game 都無乜問題。
講到呢度，大家係咪都有啲心動呢？其實 Surface 3 已經係近日正式發售，而三間指定零售商，包括：豐澤、蘇寧及衛訊，以及 Microsoft 官方網上商店都可以買得到。據了解首批 128GB 版本 Surface 3 已經賣斷，而家訂貨微軟會於 6月頭免費送貨！
不過 Edward 建議大家如果真係有心買 Surface 3，就真係透過 Microsoft 官方網上商店預訂著數啲啦！除了可以享受免運費，仲有 14 天保證退貨服務，即係大家買部機番屋企，如果覺得真係唔夠用，想換部高效能啲的 Surface Pro 3，只要係交貨日起計 14 日內退貨，都唔洗俾一分一毫。咁樣先試後買，大家就可安心啦。如果有興趣購買的 unwire.hk 讀者，可按此進入 Microsoft 官方網上商店預訂。
售價：$3,888（2GB RAM + 64GB）/ $4,688（4GB RAM + 128GB）
查詢：Microsoft（3071 3709）
