小米今日係香港發佈全新「小米手機 4i」手機，雖然規格比不上「小米 4」，但香港售價僅 $1,599，價錢比「紅米 Note LTE」貴唔係好多，如果你都想知這部「小米手機 4i」用落感覺如何就要留意速試文章。以下有更多資料：
夠晒輕薄！質感完勝「紅米」
睇完之前印度發佈會，相信有人都會跟小編 一樣覺得「小米手機 4i」（下稱: 小米 4i）只係國際外銷的「雞肋」貨色，原因無非都係規格比「小米 4」弱。不過「小米 4i」始終較便宜，我就暫時放下偏見睇下佢有咩特別。首先，設計上「小米 4i」棄用金屬改用塑膠外殼，驟眼睇成部紅米咁，但拿起就會發覺很薄，而且質感亦跟「紅米」完全唔同，唔反光亦唔易有指紋，感覺唔似平機。
▲ 機背雖改用塑膠物料，但表層唔反光亦唔易有指紋，而且感覺亦唔似「紅米」。
▲ 機身相比「紅米 2」薄了很多。
▲ 機旁有雙 Micro SIM 卡槽，但就不支援插入 MicroSD。
▲ 「小米 4i」外殼有多款顏色，而且保護殼亦一樣，其中摺殼更有 Smart Cover 功能。不過要留意的是，香港首批推出的 4i，只有黑、白兩色選擇，保護殼亦唔係咁多色揀住。
屏幕超光！小小偏藍
「小米 4i」配備 5 吋 1080p IPS 屏幕，雖然規格冇咩特別，驟眼睇顏色都頗鮮艷。不過，佢令我意外係背光非常光，拍埋 S6 Edge 亮度竟然差唔多，要來播片甚至覺得光到 Over，但可惜白色顯示比較偏冷微藍(冇 G4 咁藍)，而且今日天陰陰亦試唔到佢標榜的「SunLight Display」。
▲ 「小米 4i 」（右）屏幕亮度竟然跟 S6 Edge（左）差唔多，但顯示白色就微偏藍。
▲ 播片時「小米 4i 」（上）顏色比較自然，但光位會有少少 Over 情況（最光時），而 S6 Edge（下）就色彩更濃。
規格還好有雙卡 4G、但冇得插 MicroSD
「小米 4i」搭載了 Qualcomm Snapdragon 615 處理器，雖說是「第二代」性能比 Desire 820 等機種高，於 Antutu 可錄得約 38,000 分，成績其實跟 Snapdragon 800 差唔多，雖然操作起來問題不大，但當試播 4K 影片時就發現在 MX Player 冇法啟動硬解，播起來「窒下窒下」（編按：千幾蚊手機播 4K，玩嘢咩！），但一般 1080p 就冇類似問題。此外，機內配備了 2GB RAM 及 16GB 儲存空間，搭載 Android 5.0 版本的 MIUI 介面，操作都很順暢，而此機還有中港 4G LTE 制式（FDD + TDD）、雙卡雙待及 3,120mAh 特大電池，但缺點是不支援 MicroSD 擴充！
▲ 搭載 Qualcomm Snapdragon 615 (2nd gen) 處理器，於 Antutu 可錄得約 38,000 分。閒置 Free RAM 大約 600-800MB，而儲存空間實際有 10GB 左右。
▲ 支援 4G LTE 制式包括香港 FDD 及內地 FDD 制式。
▲ 預載 Android 5.0 及 MIUI 6.5 介面。
HDR 效果唔錯、相片「油畫」明顯
今年相機鏡頭興鬥大光圈，因此「小米 4i」亦搭載了 1,300 萬像素 F/2.0 光圈主鏡頭及 500 萬像素 F/1.8 光圈前鏡頭，拍攝時小編 覺得對焦及儲存算特別快，但值得留意是 HDR 如之前發佈會所講，拍出來顏色的確比較鮮色，而曝光計算都幾準確又可即時調整 EV 值，又有「手動模式」可調 ISO 及快門，但可惜前後鏡頭都有「油畫」的致命傷，放大睇其實睇到細節，但可能 NR（Noise Reduction）捽得太重手，故此小編 只好評為「純網上分享」水平。
▲ 1,300 萬像素 F/2.0 前鏡頭，雖然能攝取到細節，但過份 NR 令相片出現「油畫」情況。
▲ 啟用 HDR 後，相片除了曝光增加，紅色及綠色睇落都會更鮮色。
▲ 500 萬像素前鏡頭在現場唔太光環境，質素都算唔錯。（小編 ：今日終於唔洗自拍試鏡頭！）
▲ 拍攝介面都有唔少模式選擇，當中最厲害是提供手動模式（ISO 100-3200、快門 1/1000s – 2s）。
小編 ：規格唔差 有中港 4G、但最衰冇插卡
「小米手機 4i」今次冇旗艦級配置有點失望，但考慮 $1,599 已經有 1080p IPS 屏幕、雙卡 4G 及 Snapdragon 615 處理器，「呢個價錢、咁嘅規格」其實真係唔差，當然有人會講俾多少少 Zenfone 2 有 4GB RAM，但佢始終有中港 4G 制式的優勢，唯一真係缺點係竟然冇 MicroSD 擴充，因此只好多用 OTG 手指或雲端儲存作備份。
售價：$1,599（16GB、2GB RAM）
查詢：小米（3001 1888）
分享到 :
最新影片
