之前已經同大家介紹過所有 Apple Watch 的功能及使用體驗，相信大家都知道 Apple Watch 點幫到大家啦。其實 Apple Watch 作為一隻智能手錶，同 iPhone 一樣都可以透過安裝 APPS 加強功能，又或者為唔同人的需要度身訂造所有功能。以下就等 Edward 同大家推介有邊 10 隻必裝 Apple Watch APPS 啦！
在介紹 APPS 之前，有一樣野要同大家講咗先，就係：點裝 APPS？係 iPhone 上面就自然簡單啦，係 App Store 下載程式就即刻用得，但係係 Apple Watch 上面無 App Store，又可以點做？其實大家要先明白：Apple Watch 獨立運作係無乜功能的，一定要配對 iPhone 先至可以發揮功能，所以下載 APPS 的步驟，仍然要係 iPhone 上面進行。當下載完 APPS 後，開啟 Apple Watch APP，再點按相關程式的設定，再選擇「顯示 App 於 Apple Watch」就可以了。另外，如果揀埋「顯示於概覽」，一有新訊息傳到 iPhone，大家在 Apple Watch 上亦可以睇得到，不過建議大家按需要選擇，例如：遊戲、記事、娛樂等程式，就建議唔洗 tick 了，費事哂電。
最後提一提，咁點樣係 Apple Watch 度刪除 APPS？方法就同係 iPhone 上面刪除 APPS 一模一樣，只要按住 Apple Watch 熒幕不放，APPS 圖示就會震下震下，之後點按要刪除 APPS 圖示右上角的「X」圖示，就可以刪除了，十分簡單。
另外，相信大家都會問：咁係 App Store 入面，我點知邊隻 APPS 有提供 Watch 介面？其實大家在瀏覽 App Store 時，會在程式名稱下方見到「提供 iPhone 版的 Apple Watch App」，如果見到呢句就證明有 Watch APP 啦。另一個可以睇的，就係一般有提供 Watch APP 的程式，都會係下載版面提供 Watch APP 介面的擷圖，見到有先裝就實無死。
Apple Watch 最大功能，就係幫大家「郁多啲」！雖然內建已有運動程式，但想再玩專業一點，其實可以揀 RunKeeper，只要係 iPhone 上面揀好做咩運動，然後就可以收起手機，再係 Apple Watch 上面開啟 RunKeeper 程式，再按下「Go Running / Cycling….」，就可以開始運動架啦。當然，運動個時，Watch 會從 iPhone 的 GPS 及其他感應器，讀取用家的運動速度、位置等，當完成運動後數據就會儲存在 iPhone 內。
▲開始後，會顯示過了多少時間、跑了多遠及時速。
▲而一切資料係會從 iPhone 上擷取。
▲完成運動後，該次運動的數據亦會儲存在 iPhone 的用戶 account 內，方便監察成效。
下載連結：https://itunes.apple.com/hk/app/runkeeper-gps-running-walk/id300235330?l=zh&mt=8
如果提起記事，相信大家都聽過 Evernote。最近 Evernote 都更新了程式，能支援 Apple Watch。當想加入記事時，只要係 Watch 上面開啟 Evernote 程式，然後點按「+」按鍵，再以語音輸入內容，就可以將事件記下來。不過似乎暫時只支援英文記事，Edward 試過用廣東話，係辨認唔到的。
▲點按「+」號再講出記事內容就可以了，不過 Edward 建議內容唔好太長，而且英文要講得字正腔圓一點，否則是會辨認失敗的。
▲還可以點按左下角的時鐘按鍵設定提醒時間，完成後點按儲存就可以了。
▲只要同步後，就算之前的 Evernote 記事都可以係 Apple Watch 上面睇得番呢！
下載：https://itunes.apple.com/hk/app/evernote/id281796108?l=zh&mt=8
其實 Apple Watch 上面都有天氣程式，不過就只係提供 AccuWeather 的資訊，始終唔夠「本土化」。如果想身處香港唔同區份都知道該處天氣，可以下載香港天氣呢款程式，入面由天氣報告到未來數天的天氣預報都有，比 AccuWeather 好得多啦！
▲連未來數日的天氣預告都有，AQHI 空氣健康指數都睇得到添！
下載：https://itunes.apple.com/hk/app/xiang-gang-tian-qi/id286262858?l=zh&mt=8
一般新聞程式，只提供一個 source 的資訊，如果想多元化一點，甚至連外國新聞網的消息，都想係 Apple Watch 上面睇到，可以下載 Flipboard，只要係 iPhone 上面設定好預訂哪些頻道，當一有新 news，無論是從哪個頻道傳來，都可以即時係 Apple Watch 上面睇到概覽。不過缺點係未必睇得哂全文，同埋唔可以係 Watch 度揀頻道，如果做得埋呢兩項功能，咁就真係 perfect 池了！
▲如果新聞太長，滑到最底時會顯示「在 iPhone 上繼續閱讀」，此時大家就唯有拿出 iPhone 睇全文了。
下載：https://itunes.apple.com/hk/app/flipboard-nin-sui-shen-she/id358801284?l=zh&mt=8
其實唔少初期的 Apple Watch APP，都係圍繞生活同埋健康。無辦法啦，都市人生活繁忙，總係要一啲電子「助手」提提大家忙還忙，健康都要注意。就好似呢隻 WaterBalance 程式，大家每次飲水或飲其他飲品的時候，都可以將種類同埋份量，透過 Apple Watch 輸入到數據庫，令大家可以無時無刻管理身體的水份是否足夠，好體貼呢！
▲有多種飲品俾大家揀，之後輸入份量再按 tick 號就可以了。
▲透過呢個介面，大家就知道身體的水份是否足夠了。
下載：https://itunes.apple.com/hk/app/waterbalance/id517657679?l=zh&mt=8
如果你是女生，相信都會鍾意玩 selfie，不過齋影又好似悶咗啲？美拍呢款程式，就可以令大家有唔同濾鏡，影出得意的相片或者影片，又可以透過 GPS，搵到身邊有咩人都係有用呢隻 APP，又影到有趣的相片影片。佢最近更支援 Apple Watch，只要係 Watch 上面開啟程式，就可以點按「遙控拍攝」，然後將 iPhone 放上手機腳架，再選擇係影相片定係影片，之後再禁一下制，要影出有幾過癮的自拍影片相片都得啦！
下載：https://itunes.apple.com/hk/app/mei-pai-zui-huo-duan-shi-pin/id847334708?l=zh&mt=8
其實 Apple Watch 未出之前，Edward 就覺得每次都要拿出 iPhone 再開啟計數機 APP 計數，都幾麻煩，如果可以直接係手機度計，咁就好了。tiziCalc 就可以為大家實現係手錶度計簡單算術的「夢想」，而且介面設計都算簡潔（其實感覺有啲似 Android……唔好打頭唔好打頭~~~），只係禁落去要等半秒先有反應，希望未來更新會有改善啦，但用落都方便嘅。
下載：https://itunes.apple.com/hk/app/tizi-calc-watch-calculator/id983672635?l=zh&mt=8
唔知有幾多 unwire 讀者會好似 Edward 咁，平時得閒會鍾意走入廚房煮番幾味？有時遇到唔太熟的菜式，無辦法下一定要睇住食譜來煮，但以前要係 iPhone 上面睇，手又油淋淋，真係幾難搞。Kitchen Stories 呢隻程式，就可以讓大家係 Apple Watch 度揀想煮的菜式，然後一步步按指示做，連手機都唔洗拿出來就可以煮好一餐美味「九大簋」，都咪話唔爽！
▲用落好簡單，揀啱菜式後，第一頁就會列出有咩材料需要預備，同埋是幾多人份量及預備時間。
▲之後就一步步跟住做就可以了，而且圖文並茂，唔驚唔識做啦！（雖一缺點係簡體字囉……）
下載：https://itunes.apple.com/hk/app/kitchen-stories-free-video/id771068291?l=zh&mt=8
相信唔少港人，平時未必會再買碟，因為有唔少俾一人月費就可以任聽新歌的串流音樂服務俾大家揀，KKBOX 就係其中一個好受歡迎的選擇。最近 KKBOX 就更新了程式，可支援 Apple Watch，大家係 Watch 上面唔止可以操控音樂播放，仲可以睇歌詞跟住唱，甚至臨時按唔同心情轉換唔同電台欣賞都得，真係幾方便架！
▲KKBOX 支援 Apple Watch 支援得好深入，唔洗入 APP 都可以睇到而家播緊咩歌同埋該歌曲的唱碟封面。
▲入左 APP 入面，唔止可以操控音樂播放，仲可以睇到歌詞添！
▲最正係禁 Menu 制，仲可以按心情轉換歌單或者其他電台，真係轉歌都唔洗拿部 iPhone 出來呀！
下載：https://itunes.apple.com/hk/app/kkbox/id300915900?l=zh&mt=8
既然講開聽歌，最後一款同大家介紹的 Apple Watch 程式，就來多個音樂 APP 啦。唔知大家有冇試過平時聽歌，聽到一首好熟嘅歌，但又講唔出佢嘅歌名？以後遇到呢個情形，Shazam 呢隻 APP 就幫到大家啦。大家只要將 Apple Watch 移近播歌的音源，再點按程式中間的藍式圖示，辨識一會兒後，就有機會辨認得出首歌叫咩名啦，仲有歌詞碌住去，等大家隨時隨地都可以唱卡拉 OK 添！
▲入咗 Shazam，然後將 Apple Watch 移近音源，再點按中間的藍色圖示，就會出現以上辨識中的介面，此時大家要等一會兒。
▲當辨識到，就會顯示出歌曲名稱、該歌曲的唱碟封面，以及歌手名稱添。
▲點按「歌詞」仲可以睇到成首歌的歌詞，大家隨時隨地想玩卡拉 OK 都無問題！
下載：https://itunes.apple.com/hk/app/shazam-yin-le-shen-sou/id284993459?l=zh&mt=8
好了，介紹了 10 隻必裝 Apple Watch APPS，相信大家都知道點樣係生活入面，盡情讓 Watch 成為大家的貼身助手啦。不過 Edward 身邊有啲已經用緊 Apple Watch 的朋友就同我投訴，話隻 Apple Watch 用用下愈來愈熱，仲要點差電都差唔入，問我隻錶做咩咁「化學」，咁容易壞？洗唔洗拿番去 Apple Store 換？後尾個位朋友就自行發現咗，原來裝咗一隻可以係 Apple Watch 上面玩的遊戲，佢會係背景不停打怪升 level，亦因為佢一直都不停 run，所以先搞到隻錶咁食電，同埋咁熱。所以大家下載 APPS 去 Apple Watch 度用或者玩個時，就要留意有冇一啲 APPS 會令隻 Watch 表現反常？如果有，就建議將它剷除，一陣搞到大家誤會隻錶有問題，就唔係咁好啦。
