時到四月，春天氣息已經感覺得到，而天氣其實乍暖還寒，可是見到好天又點會唔想出外踩車，但在濕度高的日子，點先踩得精明？今次就同大家分享一下。
穿車衫外出踩車的朋友，可能很多時候都覺得，踩到一段時間身體實在「痴立立」，感覺不爽。事實上春天氣溫雖然不冷不熱，但濕度高，長時間出汗但揮發得不好，真係令人覺得渾身不自在，身體散熱能力亦會有所減慢。這時可以考慮一下買件 Base layer 著上身，出車前先穿 Base layer 才穿車衫，令汗水可以更快揮發、令身體乾爽。當然，Base layer 本身就是為著夏天踩車而來，在春天也一樣發揮到作用。
歌詞都有唱：「撥著大霧默默地在覓我的去路」，春天踩車，尤其是早朝或夜晚，大霧令能見度低，視野有限，更甚的是如大家踩馬路的話，周遭車輛真係隨時睇你唔到，萬一出意外就真係可大可小。想令其他駕車人士或單車友易於識別的話，前後燈當然必需，更好是選擇強力的款式。
這裡講的強力款式並不是照到你盲的強力電筒，而是說高亮度的 LED 前後燈。LED 前後燈有省電的特點，更有高亮度但不刺眼的效果，不妨前後燈都選擇 LED 的款式。另外，在起霧中的路上，最好將後燈調成閃燈模式，令其他人更易知道你所在。若覺得一盞尾燈不夠，可以選擇綁多一盞尾燈在頭盔上，又或者袋於車衫的尾袋中使用。
既然會預上大霧，地面濕滑就是預料之中的吧！最「大鑊」的是單車行進時，後輪會將地上的水帶起來，幾乎是十成十會濺在身上，尤其是pat pat位及背脊位置，長時間被水濺濕真的不好受。唔想再咁樣，買個Ass saver就解決問題啦！
Ass saver 物如其名，就是保障大家的 pat pat，令踩車時不會因為車輪濺地的水弄濕身。Ass saver 長長的一條，非常纖薄，只要夾在單車坐墊的路軌上面就用得，防止後輪濺起水花彈濕身。Ass saver 因為纖巧，所以可屈起來收藏，如果大家用開車尾袋，絕對可以從容收起 Ass saver，就算沒用車袋，也可以收納在車衫的尾袋上，十分方便。
希望以上的小物小 Tips，可以令大家在春天季節踩車時更得心應手！
