Apple 在去年三月初記招，宣佈推出車載系統 CarPlay 後，已明言會同多間車廠合作，而唔少相關車款在去年年底已經陸續推出。而首批預載 CarPlay 的私家車終於登陸香港！unwire 的 Edward 同 Duncan 就與擁有呢架 Ferrari California T 的讀者，一齊分享下係香港實試 CarPlay 的初體驗！
輕觸芒操控‧有中文介面
首先就等我 Edward 同大家介紹下 Apple CarPlay 呢個平台啦。基本上 CarPlay 說不上是一個車載平台，因為在這部 Ferrari California T 入面既系統並唔似 iPhone、iPad 咁內置 iOS，而係需要每次用 Lightning 線將 iPhone 與車接駁，然後就會將 iPhone 介面用類似「串流」模式傳送到車內的觸控熒幕先可以使用。不過連接手機的 Carplay 介面設於儲物箱之內，小編認為某方面是車廠避免司機在駕駛時使用手機，而且可以保證手機有足夠電量在駕車時長時間使用 CarPlay。雖然出發點很好，不過車主卻表示這個設計令自己成日落車時忘記帶走手機，而且在香港長時間揸車的情況極少，所以整體來講，呢種設計壞處比好處多！
▲暫時可支援 CarPlay 的新車唔多，Ferrari California T 是其中一部。
▲本身只預載車廠本身的系統。
▲禁右上角的 Apple CarPlay 按鍵，就會叫車主將 iPhone 與汽車接駁。
▲然後用線接駁收藏於儲物箱內的特別 USB端子就可以了，暫時可以支援 CarPlay 的裝置包括 iPhone 5、5c、5s、6 及 6 Plus，而 iPad 及 iPod Touch 是不支援的（前者太大放唔到入儲物箱，後者就……太舊吧）。不過留意如果手機處於鎖定狀態，需要解鎖後先至用到 CarPlay。
▲成功進入 CarPlay 介面。
至於功能上，暫時 Edward 睇到有 8 項：通話、音樂、地圖、訊息、現在播放（音樂）、返回汽車本身系統、Podcasts 及其他第三方軟件（如今次車主就有用 Spotify）。至於操控上，因為車入面配備了觸控熒幕，加上圖示及介面都同 iPhone 一樣（包括返回主頁的 Home 制圖示都同 iPhone 一樣），所以整體用起來同用 iPhone 差唔多，設計整體性都幾高。不過唔知係法拉利問題定點，據車主表示呢部車落地短短時間，不過 Edward 同 Duncan 在操作 touchscreen 時成日都遇上點兩、三次先有反應的情況，看來車廠在選擇觸控熒幕上仍有待改善。
▲導航時如果有來電，只要按一下熒幕的電話 Icon 就可以通話了。
▲CarPlay 可以支援少量第三方 Apps，例如訪問中的車主就可以係 CarPlay 上面用到 Spotify 來聽歌。
▲當使用 CarPlay 時，在汽車錶板上都可以見到 CarPlay 字樣。
另外，前文都提及 CarPlay 係類似由 iPhone「串流」個介面去汽車熒幕度使用，所以只要係手機設定做中文介面，在汽車熒幕上面都會變成中文（當然手機採用英文介面，汽車熒幕都自然會顯示英文啦！）。而無論使用中文定英文介面，係上面都睇得到中文字，中文歌名同歌手名都睇得到無亂碼，呢樣真係抵讚。
▲如果 iPhone 設定為中文介面，CarPlay 就會自動顯示為中文。要留意 CarPlay 本身係唔可以切換語言的。如果要轉其他語言，就要係 iPhone 設定。另外，係呢張圖大家都可以見到，如果有未讀訊息，都會好似係 iPhone 咁右上角有個紅底數字顯示，介面同 iOS 整合度十分高。
▲顯示中英文歌手、歌曲名都無問題。
語音操控為主‧支援廣東話！
當然駕車時，要下下用手指篤個觸控熒幕去操控 CarPlay 係一啲都唔 make sense 的動作啦！所以 CarPlay 的「靈魂」，自然係 Siri 語音操控功能上面。CarPlay 的 Siri 係用番 iPhone 的 Siri database，所以要用 Siri 控制 CarPlay 的功能，基本上同係手機以 Siri 操控相同功能係一樣的。例如要打電話時講「通話」，要聽歌時講「播放音樂」、想飛歌就講「下一首」等。而啟動 CarPlay Siri 亦同係 iPhone 一樣，只要禁實熒幕上面的 Home 鍵就可以啦。不過駕車時要啟動 Siri，就有個更方便的方法，以今次實測的 California T 為例，係軚盤左邊後方就有個按鍵，禁一下就可以啟動 Siri，咁樣駕車時操控 CarPlay 就更方便。
▲啟動 Siri 的按鍵位於軑盤左後方，按一下就可以講野，小編覺得幾方便。
▲用廣東話操控 Siri 無難度。
另外在操控 Siri 時，佢會按照車主 iPhone 的 Siri 語系而接收該種語言，例如：係手機設定 Siri 用英文，佢就只會聽英文；手機設定用廣東話，就可以聽得明廣東話！Edward 就試過係設定英文為語言時用廣東話操控 CarPlay Siri，就出現不能使用的情況，呢一點大家要留意了。而測試左一陣，發覺 Siri 係辨識上十分準確，基本上只要語言設定準確，Edward 在短短半個鐘試玩時間入面，未試過出現辨識錯誤或辨識不到的情況，呢一點又係值得一讚的。至於講個時，由於 CarPlay 會用番車入面的音響系統，所以啟動 Siri 後以正常坐姿直接講出指令就可以了，毋須靠近熒幕講。
▲廣東話的辨認率幾準，差不多次次都認到，但係地圖的 Database 有待改善。
▲可能法拉利的音響比較好啦，車主只需要正常駕駛坐姿講出指令就操控到 Siri。
功能設計體貼駕駛者
另外 CarPlay 在設計上，其實都幾體貼駕駛者，而呢項優點係幾方面上睇得出，首先如果在駕車時，有朋友向車主傳送 SMS，接收到時唔會係熒幕顯示出訊息內容，而係會選擇透過喇叭讀出來，等車主可以聽到訊息。不過 Edward 試過，如果 SMS 係中英混合，中文字似乎係讀唔到出來，呢一點似乎有待改善。
另一項體現出呢個優點的，就係導航時如果有電話打入，雖然熒幕會顯示出通話介面，但當要轉彎或有新導航指示時，會以彈出式訊息的形式，在熒幕頂部顯示出來，讓車主即使煲「電話粥」，都唔驚因為睇唔到地圖而行錯路。而且比 iPhone 更好的係，係呢個情況如果車主想轉番去地圖，只要點按左欄的圖示就可以切換程式，唔洗好似 iPhone 咁禁兩下 Home 制先做到切換，整體來講確實係體貼嘅。
▲即使係導航期間有來電，仍然會在上方提示用戶路面的方向，而按一下左上方的地圖 Icon 就可以切換回到大地圖。
Duncan 試後感：操作幾方便但係地圖信唔過！
Edward 向各位讀者介紹和測試過不同的 CarPlay 功能，而相信各位車主則會特別關心 Carplay 的導航功能了。說穿了不論地圖或者是導航功能都只是 Apple iOS 內置的地圖。小編特別測試了幾個地點看看定位和導航功能的表現如何。
另一方面，小編在車箱中亦試以廣東話說出目的地，Carplay 系統辨認廣東話的準繩度亦很高（相信可能亦和靚車內置的喇叭和咪質素較高有關），基本上說得出的地點 Siri 都可以認得到。而小編以「明愛醫院」、「西九龍廣場」進行測試，系統顯示了多個相關結果，只要在熒幕上按一下確認想去的地點便可以開始導航。 雖然導航指示的方向大致正確，途中亦有轉彎提示，不過去到興華街和順寧道交界時，導航卻指示前往反方向的李鄭屋邨！而最後目的地更指示小編停在保安道街市！！My God！！！如果小編真的有急事去醫院便大件事了。幸好導航到西九龍廣場則沒有問題 …… 此外，部份地點如：黃金商場、高登電腦商場雖然成功辨識出來，不過地圖卻無法尋找相關資料，可見 iOS 的地圖資料有待改善。有得揀的話，小編都係會用 Google Map 搵路感覺比較可靠。
▲有關明愛醫院的資料準確，亦有顯示預計到達時間、跨離及可選擇路線。
▲有時未去到路口已經自動幫司機顯示處於下一條街，稍一不慎好容易「轉錯彎」後果可大可小！！！
▲長沙灣道前往明愛醫院期間，在下一路口轉彎的提示亦算清晰。
▲問題來了！來到興華街和保安道交界，明明應該要左轉前往明愛醫院，但是地圖導航卻指示小編右轉 ……
▲最後導航功能在保安道街市對面商場指示小編已經到達目的地 …… 導航測試失敗！
總結：升級太貴……有點雞肋
整體來講，Apple CarPlay 係各方面功能及使用上係幾好，不過係對車主最重要的導航上，卻因為地圖 database 未夠完善而出現找不到資料、甚至導航方向錯誤的情況！這種失誤，真係再多體貼功能都無用。看來 Apple 真係要係地圖資料上多下苦功，先有機會追到 Google Map 了（其實如果可以俾車主揀係 CarPlay 度用 Google Map 咪問題解決囉……唉！）。
不過在訪問中，最令小編感到費解的，係車主表示 CarPlay 並非「Default」功能來的！！它是一個升級 Option，要另外比錢先可以用得到。以該車主的 Ferrari California T 為例，要升級用到 Apple CarPlay 就要額外付出差唔多 HK$56,000 先至得，認真「拿利」！（雖然本身架車都成廿幾萬歐羅，車主唔至在……）萬一第日其他車廠推出支援 CarPlay 的車（例如：日本車），本身車價都只係十零萬港幣，如果要為咗個 CarPlay 加幾萬蚊，相信唔少車主都會選擇放棄吧，因為佢始終唔係必須功能，小編就覺得有啲雞肋。所以 CarPlay 能否係香港普及？Edward 就有啲保留了。或許，如果你遇上朋友有呢項功能的車，應該係為咗「身份象徵」而咁做吧。
分享到 :
最新影片
