自從 HTC 推 Desire 816 後，機海攻勢就愈來愈凌厲，甚至小編 都唔太記得 Desire 系列出過幾多個型號，而今日佢地發表的 Desire 826 dual sim，除了規格升級，更重要係前鏡頭升級為 UltraPixel，唔知自拍效果同 Desire Eye 差得遠唔遠呢？（以下有更多資料。）
數字上 Desire 826 dual sim (下稱: Desire 826) 是 Desire Eye 以外最高階型號，兩者設計很相似，尤其機身用了相同的夾心色，而且 Desire 826 更多了白杏色。手感方面，由於配備 5.5 吋屏幕，機身會比 Desire Eye 闊身，這方面感覺較似 Desire 820，單手仍可操作，但拿起有少少「墜手」。此外，Desire 826 都有 BoomSound 設計，但機面就唔見咗啲「窿窿」，原來這次設計把喇叭收藏到屏幕上下嘅小罅隙中，外表更討好，而且有埋 Dolby 效果，現場睇片時音量都僅僅夠，效果不錯。
▲ 機身設計似 Desire Eye，但屏幕有 5.5 吋，手感接近 Desire 820，而且有少少「墜手」。
▲ 側邊採用夾深色 (dual tone) 設計，而小編 手上的是新的白杏色。
▲ 機背設計比較簡若，中間只有 HTC Logo 及左上角的主鏡頭。(機內配備 2,600mAh 電池)
▲ 喇叭特別藏於罅隙中，設計比之前美觀，而且還支援 Dolby 音效。
▲ 小編 現場嘈吵環境下試播 Youtube，發現音量最大時都算僅僅足夠。
既然 Desire 826 可同 Desire Eye 相提並論，重點當然離唔開前鏡頭，雖然佢冇 1,300 萬像素鏡頭，但用了 One M7 時代的 UltraPixel，雖然像素只有 400 萬，但好處是低光拍攝佳，小編 在現場試拍後發現細節非常「Sharp」，頭髮同眼捷毛等細位都很清晰，個人認為表現甚知勝過 Desire Eye。至於主鏡頭，雖然擁有 1,300 萬像素及大光圈，但拍出來效果冇前鏡頭咁驚喜，原因主要細節唔「Sharp」，而且雜訊亦比較明顯。
▲ 前鏡頭使用 UltraPixel 鏡頭。
▲ 前鏡頭採用 UltraPixel 技術，雖然像素只有 400 萬，但相片細節非常「Sharp」。
▲ 主鏡頭有 1,300 萬像素，但相片質素只是普通。
▲ 相機都有提供「分鏡拍攝」及「貼紙相機」等功能，而且拍攝時亦提供實時美顏。
Desire 826 規格不像 Desire Eye 用頂級配置，機內搭載 Qualcomm Snapdragon 615 八核處理器及 2GB RAM，雖然性能冇 Snapdragon 801 咁強，但勝在支持 64bit 可完全配合 Android 5.0 運作。此外，佢同其他 Desire 一樣都支持雙卡雙待，兩個 Nano-Sim 卡槽都支持 4G LTE (中港)，並有 Dymanic Switch 可隨時切換主卡。不過，它最值得一讚是 MicroSD 有獨立卡槽，不像很多手機把卡槽整合到 SIM 槽內。
▲ 搭載 Qualcomm Snapdragon 615 處理器及 2GB RAM，於 Antutu 成績約有 34,000 分。
▲ 機內提供 16GB 儲存空間，但可用空間只有約 8GB。
▲ 旁邊提供 2 個 Nano SIM 卡槽，而 MicroSD 卡槽就設在旁邊。
▲ 有雙卡雙待，並支持 Dymanic Switch 可切換主 SIM 卡。
▲ 5.5 吋 1080p 屏幕，材質為 SLCD3，因此感覺同 One M8 差唔多。
▲ 預載介面為 Sense 6.0，同之前一樣提供 BlinkFeed 功能。
Desire 826 dual sim 雖然只係一部中價手機，但除了配置唔係 Snapdragon 800/801 外，其他配置都用一部高階手機接近，有 1080p 屏幕、4G 雙卡，而且還有 UltraPixel 前鏡頭，自拍效果仲要非常唔錯。不過，講到重點係定價只是 $3,398，價錢只係比 Desire 820 ($2,998) 貴少少，但配置就強一節，尤其係屏幕！所以小編 呢次都有少少心動買返部…
售價：$3,398
查詢：HTC (3077 5588)
