大家都知啦，香港地寸金尺土，要買間上車盤「蝸居」，係今時今日都唔係咁容易。間屋又要擺床又要放飯桌，其餘家品自然就有幾智能得幾智能。今日 Samsung 記者會推出的洗衣機，仲可以內置「洗手盆」？唔係掛？！抱著好奇心，編輯小編 發揚「住家精神」，一於為 unwire 讀者們實試一下有幾好洗。
呢款稱為 Active Dual Wash 的洗衣機，當打開蓋後，可以在頂部加入一個膠盆，按個制就可以注水。當然，小編 初睇都以為係洗手盆，但 Samsung 職員立即糾正：「當然唔係拿來洗手！！」咁個膠盆拿來做乜？其實係俾大家用來洗需要手洗的衣物，或者特別污糟，需要在機洗前先做 pre-wash 的用途。最好用的係，洗完之後唔洗煩點倒走啲水，直接倒入洗衣機內排走就可以啦，好方便。當然啦，大家唔好懶叻一早放定衫入去先來做 pre-wash，唔係啲水就會即刻整污糟入面啲衫啦！（編按：啲衫本來就污糟架啦，驚咩？）（小記按：無計，有潔癖……）
▲禁個制就可以揭開，然後注水就可以手洗衣物或者為衣物進行 pre-wash 步驟。點做？睇下面小編 實試條片大家就知道了。
▲個洗衣滾筒都算深，可以最多洗到 7.5kg 衫，二、三人小型家庭洗一個星期的衫都好夠用。
▲操控面板全部都係獨立按鍵，上手唔難。而且有多種模式供大家選擇，如果夜晚臨訓前想開機洸衫，但又唔想咁嘈，可以揀「夜間洗」，都幾體貼。
[divider]
作為「住家小編 」，自然唔止睇洗衣機啦，在場 Samsung 都展出咗其他家電，而家就等小編 帶大家去睇睇。
▲Samsung 亦新推出了 Chef Collection 的大型雪櫃。
▲嘩，可以放到好多食物，而且每格分門別類，可以擺到好齊整。（編按：小編 ，即刻買！快啲買！公司周年自助餐靠你了！）
▲除咗雪櫃及洗衣機，Samsung 仲推出了智能自動吸塵機 POWERbot。據官方表示，會比一般吸塵機吸力大 60 倍。
