唔知幾時開始，相機都鍾意用 「Mark II / III」作為型號名稱，好似今日發佈的 OM-D E-M5 Mark II 唔講都知係 E-M5 後繼型號，要知道 E-M5 都推出 2 年多，規格甚至比入門 E-M10 還稍微落後，唔知呢次 Mark II 會否挽回中階地位呢？（以下有更多資料。）
「Mark II」俾人印象好多時都係換湯不換藥，但這次 E-M5 Mark II 竟然連外殼都重新設計過，部機比之前厚同重少少，但感覺最唔同係按鍵分佈同 E-M5 / E-M10 完全唔同，風格似 E-M1，而且換了新轉盤，外觀上跟 E-M10 明顯較「Pro」。至於 E-M5 Mark II 同 E-M10 重點分別，除了依舊為鎂合金機身、五軸防震、及防水滴，今次設計上仲多了傳統式「鈕芒」，轉換角度更方便，還可用來自拍（有點重），而屏幕追加了輕觸功能，EVF 亦升級至 E-M1 同級。手感方面，作為 E-M10 前用家，小編 拿起 E-M5 Mark II 覺得感覺唔差好遠，分別可能係手柄深少少，最大問題仍是最尾兩根手指要放機底，換言之同 E-M10 一樣都係要加手柄先最舒服。
▲ 手感似手柄加厚了的 E-M10 ，但最大分別係機身明顯較重。
▲ 新增「鈕芒」設計，可 180 度反來自拍。
▲ 機頂換了新轉盤，感覺紮實更 「Pro」。
▲ 旁邊依舊提供 Mic-In 及 HDMI 輸出，但仍不能 USB 充電。
▲底部有景深預覽等按鈕。
▲ 電池都係 BLN-1 可拍攝約 310 張相片。
▲ 機頂繼續保留冇內置閃燈的設計，想用就須加外置閃光燈。
近年 m4/3 規格缺乏驚喜，這次 E-M5 Mark II 都唔會例外，配置都係 1,610 萬像素 Live MOS 及 TruePic VII 影像處理器，規格同 E-M10 及 E-M1 相同，連拍速度增至 11fps，拍片保持 1080p 60p 沒有 4K 支援，唯一特別係快門最快支援 1/16000s（電子），其次新機亦加返 WiFi 等標準功能，老實說「無驚喜」。因此 E-M5 Mark II 會加入拍攝 4,000 萬像素相片、My Clips 及拍片快慢動作等新功能，先說「4,000 萬像素相片」，原理是透過防震系統拍攝 8 張相片經處理合成一張高解像相片，原理複雜，而且必須使用腳架，感覺同手機功能 (Find 7) 很似；至於 My Clips 係一個「剪片」功能，可將幾段短片剪埋一齊，並加入特效及背景音樂，用途純粹節省在電腦後製的步驟，但此功能最大問題係需在錄影前先選擇，換言之只限短片，功能感覺都係同手機差唔多。
▲ 「4,000 萬像素相片」可拍攝超高解像度相片，相片細節可更清楚，但缺點是只適合靜態拍攝及要求腳架。
▲ 拍攝先可選擇快慢動作。
▲ 拍片都用到 5 軸防震功能。
▲ My Clip 功能可以把多條短片合為一條綜合短片，而且仲可加入特效及背景音樂。
由於 E-M5 Mark II 規格冇大改變，表現同 E-M10 / E-M1 接近已屬預料之內。ISO 方面，依舊都係維持 ISO 3200-6400 左右，再上的話雜訊就開始非常粗糙。對焦反應，感覺好似同 E-M10 差唔多，但最明顯唔同係快門非常靜。至於鏡頭， E-M5 Mark II 會跟一支 M.Zuiko Digital ED 14-150mm F4-5.6 II 新套裝鏡頭，鏡頭好處係「一鏡走天崖」，但同舊的 M.Zuiko Digital ED 12-50mm 1:3.5-6.3 EZ 相比就冇咗 Macro 及電 Zoom 功能，相比之下小編 會比較鍾意舊果支。
▲ ISO 測試原圖
▲ ISO 3200
▲ ISO 6400
▲ ISO 12,800
E-M5 Mark II 其實只係彌補 E-M5 原本應該有的定位，規格睇落同 E-M10 差唔多，但畢竟佢有防水滴同五軸防震，單純評價相機本身，小編 覺得都應有盡有。不過，問題就在於香港定價淨機身都要 $9,590，Kit 鏡套裝更要 $13,490，先唔講呢個價錢買唔買到 Full Frame，但問題係呢個價錢甚至比同門 E-M1 還貴（市價：約 $8,000 淨機；約 $12,500 連 12-40mm F2.8），試問睇完價錢點解唔直接購買 E-M1 呢？再者 E-M5 Mark II 都係冇內閃，要方便輕巧亦可考慮更平嘅 E-M10，因此小編 暫時都諗唔通咁貴要考慮 E-M5 Mark II 的理由。
售價：$9,580（淨機身)、$13,490 (連 14-150mm F4-5.6 Kit 套裝)
查詢：Olympus（2376 2150）
